Rasijskija vajenkary zajaŭlajuć, što straty dasiahnuli nieprymalnaha ŭzroŭniu. «Čakaje nas remiejk vosieni 2022 hoda»
Rasijskija pravajennyja błohiery i «vajenkary» ŭsio čaściej pišuć pra paharšeńnie situacyi na froncie i rost strat. Pavodle ich słoŭ, ukrainskija vojski zdoleli viarnuć pieravahu ŭ vykarystańni bieśpiłotnikaŭ i pačali masavana bić pa rasijskaj łahistycy.
Aŭtar telehram-kanała «Rieportior Filatov» śćviardžaje, što ŭkrainskija siły faktyčna znoŭ atrymali pieravahu ŭ «nižnim niebie» — prastory, dzie dziejničajuć FPV-drony. Pavodle jaho słoŭ, rasijskaje vojska, atrymaŭšy pieravahu ŭ kolkaści takich bieśpiłotnikaŭ i ŭ dalnabojnych dronach typu «Šachied» («Hierań»), «supakoiłasia i dačakałasia».
Z-błohier śćviardžaje, što ŭkrainskija vojski navučylisia kompleksna vyvodzić z ładu rasijskuju abaronu ad dronaŭ i paśla hetaha pačali masavana atakavać łahistyku na hłybini da 50—60 kiłamietraŭ, vykarystoŭvajučy novyja častoty suviazi, jakija ciažej zahłušyć.
«Što my možam supraćpastavić? Ničoha. Choć śpiecyjalisty ŭžo hod kazali: praciŭnik adychodzić ad standartnych rašeńniaŭ i raźvivaje svaje «iksy» — narakaje aŭtar.
Padobnyja acenki hučać i ŭ inšym Z-kanale — «Fiłołoh v zasadie», aŭtar jakoha pryvodzić paviedamleńni svaich znajomych vajskoŭcaŭ z Dabrapolskaha napramku.
Jašče ŭ pačatku lutaha jamu paviedamlali pra značnuju aktyvizacyju ŭkrainskich dronaŭ na Mirnahradskim napramku. Pa słovach ananimnaha vajskoŭca, na hety ŭčastak, vidać, prybyli vopytnyja apieratary bieśpiłotnikaŭ, jakija «palać mašyny ŭ tavarnaj kolkaści ŭžo niekalki dzion».
Pavodle jaho, ukrainskija drony faktyčna pačali palavańnie na łahistyku. Nočču ciažkija bieśpiłotniki typu «Baba Jaha» skidvajuć miny na darohi, a ŭdzień FPV-drony kantralujuć maršruty i atakujuć transpart. U vyniku dabracca z Navahrodaŭki ŭ Mirnahrad stanovicca vielmi niebiaśpiečna — sam aŭtar śćviardžaje, što za niekalki dzion dvojčy traplaŭ pad ataku dronaŭ.
Jon taksama adznačaje, što ŭkrainskija bieśpiłotniki pačali dziejničać navat na tych maršrutach, jakija raniej ličylisia adnosna biaśpiečnymi. Asnoŭnaj prablemaj, pavodle vajskoŭcaŭ, zastajecca niedachop sistem radyjoelektronnaj baraćby, zdolnych hłušyć drony, jakija pracujuć na častotach ad 6 da 10 HHc.
«Ź plusaŭ: uzdoŭž darohi rasstaŭleny pasty — kali bačać «komik» (dron-kamikadze — NN), pačynajecca stralanina, i ty zahadzia čuješ heta, jość čas spynicca i vyskačyć z mašyny».
Jak vynikaje z paviedamleńnia, dasłanaha aŭtaru kanała ŭ pačatku sakavika, pierachod ukrainskaha boku na novyja častoty i raźvićcio mahčymaści vykarystańnia dronaŭ u lubych umovach nadvorja istotna ŭskładnili pracu rasijskich sistem radyjoelektronnaj baraćby. Pavodle ananimnaha vajskoŭca, na ich učastku frontu «znoŭ uzros FPV-teror».
Jon śćviardžaje, što sistemy REB «Pakroŭ», «Impuls» i «Navalnica», jakimi karystajucca rasijskija padraździaleńni, zastajucca faktyčna na ŭzroŭni pieršaj pałovy minułaha hoda. Raniej jany choć častkova pieraškadžali kiravańniu FPV-dronami — heta možna było zaŭvažyć pa niestabilnym palocie i manieŭrach bieśpiłotnikaŭ. Ciapier ža, pavodle jaho, drony na hetyja sistemy amal nie reahujuć.
Vajskoviec miarkuje, što ŭkrainski bok źmianiŭ nie tolki kanały pieradačy videa, ale i sistemy kiravańnia, mahčyma vykarystoŭvajučy inšyja dyjapazony častot, ličbavuju abaronu suviazi i niekalki kanałaŭ adnačasova. Pry hetym jon pryznaje, što častku prablem možna było b śpisać na pamyłki ŭłasnych padnačalenych, adnak, pavodle jaho, skarhi na nieefiektyŭnaść rasijskich sistem REB nosiać masavy charaktar.
Situacyja, sa słoŭ vajskoŭcaŭ, praciahvaje paharšacca. Hetymi dniami jany ŭžo pišuć pra faktyčny kałaps łahistyki na niekatorych učastkach frontu.
«Naśpiavaje poŭny pisiec. Łahistyka ŭ 15‑kiłamietrovaj zonie faktyčna pamierła — navat pieššu. My da svaich NPšak (naziralnych punktaŭ — NN) idziom pa 3—4 dni», — cytuje aŭtar kanała paviedamleńnie z frontu.
Jak śćviardžaje vajskoviec, ciapier ukrainskich FPV-dronaŭ «vielmi šmat paŭsiul — navat tam, dzie ich nie bačyli ŭžo ceły hod». I heta niahledziačy na toje, što, pavodle jaho słoŭ, «kryzis Starlinka pieraadoleny prykładna na 60%».
Pry hetym, pavodle jaho acenki, efiektyŭnaha adkazu na novy ŭzrovień atak dronaŭ pakul niama.
Jon adznačaje, što ŭ vojski jašče letaś pieradali peŭnuju kolkaść sistem radyjoelektronnaj baraćby «Navalnica», raźličanych na častoty, aktualnyja na 2024 hod, paśla čaho, pavodle jaho słoŭ, istotnaha abnaŭleńnia srodkaŭ supraćdziejańnia nie adbyvałasia.
Aŭtar paviedamleńnia taksama śćviardžaje, što naziralnyja pasty suprać pavietranych celaŭ, ukamplektavanyja z roznych padraździaleńniaŭ — bataljonaŭ achovy i abarony, zienitčykaŭ abo tankistaŭ biez tankaŭ, jakich vykarystoŭvajuć jak piachotu, — u značnaj svajoj častcy «nie vyłaziać ź blindažoŭ».
«Kali tak budzie i dalej, čakaje nas remiejk vosieni 2022 hoda», — papiaredžvaje nieviadomy vajskoviec, zhadvajučy katastrafičnaje adstupleńnie Rasii pad Charkavam.
Sam aŭtar telehram-kanała śćviardžaje, što nie śpiašaŭsia publikavać hetyja paviedamleńni, spadziejučysia, što situacyju vypraviać, adnak «pryjšoŭ miesiac, situacyja tolki dehraduje samym tryvožnym čynam».
Ciapier čytajuć
Mižnarodny kryminalny sud pačaŭ rasśledavańnie złačynstvaŭ, ździejśnienych režymam Łukašenki20
Kamientary
[Zredahavana]