Sachaščyk kupiŭ daččynuju kampaniju vialikaha rasijskaha anłajn-rytejlera ŭ Bielhii
Paśla adychodu z pasady «ministra abarony» Cichanoŭskaj u žniŭni 2024‑ha Valeryj Sachaščyk zasiarodziŭsia na raźvićci siamiejnaha biznesu ŭ Polščy. A miesiac tamu Valeryj Sachaščyk kupiŭ bielhijskuju kampaniju Bygalamart B.V.
Bygalamart B.V. — heta ŭ minułym bielhijskaja daččynaja kampanija vialikaj rasijskaj rytejłavaj sietki «Hałamart».
«Hałamart» zapuściŭsia ŭ Bielhii ŭ 2019‑m i pradavaŭ praz sajt bytavuju techniku, kieramiku i kuchonny posud
Kampanija nie vyjšła na ŭstojlivy prybytak, a pa vynikach 2022 hoda pakazała hłyboki minus. Pačynajučy z 2023 hoda, jaje pačali rychtavać na prodaž: z bałansu źnik skład, zapazyčanaści vypłacili, bałansavy košt kampanii zraŭniaŭsia z sumaj statutnaha fondu — 25 tysiač jeŭra.
Z 1 sakavika 2026‑ha ŭ Bygalamart B.V. źmianilisia ŭłaśnik i kiraŭnictva. 100% akcyj kampanii ciapier naležyć Valeryju Sachaščyku. A dyrektaram staŭ ukrainiec Maksim Drabiazhoŭ — apieracyjny mieniedžar u polskaj budaŭničaj siamiejnaj kampanii Sachaščykaŭ «Sahaty».
U 2024 hodzie polski «Sahaty» pakazaŭ kala 145 tysiač jeŭra prybytku pry abarocie trochu mienš za 16 miljonaŭ jeŭra.
Rynak Bielhii Sachaščyk asvojvaje z kanca 2023 hoda. Samy značny prajekt — udzieł u budaŭnictvie bujnoha žyłoha kompleksu ŭ Miechielenie.
Vałodańnie bielhijskaj kampanijaj u teoryi sprościć Sachaščykam udzieły ŭ padradnych konkursach i tendarach, a taksama sprościć pracaŭładkavańnie supracoŭnikaŭ, u pryvatnaści, biełarusaŭ z pracoŭnymi vizami.
Pieravaha ŭ kupli takoj kampanii pierad adkryćciom novaj u tym, što ŭ jaje ŭžo jość kredytnaja historyja i adkrytyja rachunki.
Kamientary