Rasija rychtuje letniaje nastupleńnie. Ci voźmie jana Słaviansk i Kramatorsk?
Rasija rychtujecca ŭzmacnić nastup na ŭschodzie Ukrainy i ŭžo da vosieni realizavać svaju metu — zachapić usiu terytoryju Danbasa. Jana ŭžo pierakidaje siudy reziervy. Prynamsi, takija danyja pryvodzić ukrainskaja vajskovaja raźviedka. Hałoŭnakamandujučy Uzbrojenych sił Ukrainy Alaksandr Syrski 22 krasavika zajaviŭ, što rasijskaja armija «pravodzić pierahrupoŭku i padciahvaje reziervy». Nakolki vialikija šancy na pośpiech hetaha nastupleńnia, analizuje Ukrainskaja słužba Bi-bi-si.
Pavodle danych analitykaŭ, nastupleńnie Rasii moža pačacca na praciahu nastupnaha miesiaca, kali pavialičycca «zialonka» i ŭstalujecca tumannaje ci daždžlivaje nadvorje na ŭschodzie Ukrainy, jakoje zaminaje BPŁA, ale spryjaje piachotnym i miechanizavanym šturmam.
Na hety momant pad kantrolem Ukrainy zastajecca kala 20% terytoryi Danieckaj vobłaści i klučavaja dla jaje abarony miaža — «pojas krepaściaŭ», heta značyć ahłamieracyja Słaviansk — Kramatorsk — Družkoŭka — Kanstancinaŭka. Heta najbolš abaronieny inžynierna-fartyfikacyjnymi zbudavańniami ŭčastak ziamli va usioj krainie.
Z poŭnačy i paŭdniovaha zachadu jaje prykryvajuć jašče dva mahutnyja ŭmacavanyja rajony — harady Liman i Dabrapolle.
Nastojlivaje patrabavańnie Kramla vyvieści USU z hetych terytoryj dla nibyta zaviaršeńnia vajny ŭkrainskija ŭłady adchilajuć. Pavodle słoŭ Uładzimira Zielenskaha, ZŠA taksama cisnuć na Ukrainu adnosna vyvadu vojskaŭ z Danbasa.
Adnak u Kijevie majuć sumnievy, što takija sastupki nasamreč sucišać apietyty Maskvy. Terytoryi zachodnich rajonaŭ Danieččyny źjaŭlajucca padrychtavanymi abarončymi rubiažami dla abarony susiednich Charkaŭskaj i Dnieprapiatroŭskaj abłaściej.
Tamu, kali Ukraina adchilaje varyjant z vyvadam vojskaŭ, dyk ci sapraŭdy Rasija zdolnaja siłaj uziać Danieččynu, jak jana heta dekłaruje?
Havorka idzie, u pryvatnaści, pra horad Słaviansk, jaki maje i «simvaličnuju vahu» jak nasieleny punkt, adkul u 2014 hodzie pačałasia rasijskaja hibrydnaja ahresija na uschodzie Ukrainy i dzie armija Rasii paciarpieła pieršuju parazu ad ukrainskich vojskaŭ.
Upłyŭ reljefu
«Naša armija ruchajecca ŭ napramku Słavianska. Niedaloka toj dzień, kali my vyzvalim i Słaviansk, i Kramatorsk — heta ŭsio danieckaja ziamla», — zajaviŭ 21 krasavika načalnik Hienštaba US RF Valeryj Hierasimaŭ, inśpiektujučy pazicyi hrupoŭki vojskaŭ «Poŭdzień» na froncie.
Pavodle jaho słoŭ, rasijanie ŭžo nablizilisia na adlehłaść 12 km da Słavianska i 7 — da Kramatorska.
Praŭda, OSINT-analityki admaŭlajuć hetyja danyja. Naprykład, amierykanski «Instytut vyvučeńnia vajny» (ISW) pakazvaje, što, pavodle jaho padlikaŭ, rasijskija vojski ciapier znachodziacca na adlehłaści 14 km ad Kramatorska i 9 — ad Słavianska.
Za abaronu hetych haradoŭ adkazvaje 11‑y armiejski korpus USU. Pres-sakratar hetaj hrupoŭki, padpałkoŭnik Dźmitryj Zaparožac, skazaŭ Ukrainskaj słužbie Bi-bi-si, što rasijskija vojski sapraŭdy bolš aktyŭna prajaŭlajuć siabie ŭ napramku Słavianska i addajuć pryjarytet atakam na hetym učastku.
U bok hetaha horada jany ruchajucca adrazu pa dvuch napramkach, jakija sychodziacca da adnoj mety: z paŭnočnaha ŭschodu rasijanie atakujuć uzdoŭž raki Sievierski Daniec, a z paŭdniovaha ŭschodu — paralelna darozie Słaviansk — Bachmut.
U pieršym vypadku bai iduć kala viosak Kaleniki, Raźnikoŭka (Minabarony RF 17 sakavika zajaviła pra ich zachop, Ukraina heta admaŭlaje) i Kryvaja Łuka. Kala trasy z Bachmuta bajavyja dziejańni adbyvajucca ŭ rajonie viosak Pryvolle, Mińkoŭka, Nikifaraŭka i Fiodaraŭka Druhaja (pra ich uziaćcie Rasija abviaściła na praciahu lutaha-sakavika).
Ukrainskaje kamandavańnie zajaŭlaje, što praciŭnik sprabuje padtrymlivać temp atak, pakolki płanuje vyjści na vyšyni kala Słavianska, kab mieć lepšyja pazicyi dla nastupleńnia.
«Słavianski kirunak bolš aktyŭny z-za hieahrafičnaha raźmiaščeńnia praciŭnika. Zaraz jon u nizinie, i pakul u nas jość navakolnyja vyšyni, to my ŭ vialikaj kolkaści majem mahčymaść źniščać praciŭnika», — kaža padpałkoŭnik Zaparožac.
Havorka idzie pra tak zvanyja krejdavyja skały, što ŭ miežach zapaviednika «Krejdavaja fłora» na ŭskrainie pasiołkaŭ Mikałajeŭka, Zakotnaje i Kryvaja Łuka. Zaraz tut iduć bai, USU zryvajuć sproby praciŭnika zamacavacca na ŭčastku.
«Vyšyni — heta kantrol luboj łahistyki. Chłopcy, jakija tam stajać, kažuć, što z vyšyń kala Kryvoj Łuki Słaviansk «jak na dałoni vidać». Heta daje mahčymaść dla prymianieńnia lubych bieśpiłotnych składnikaŭ, heta daje mahčymaść cisku na łahistyčnyja maršruty, jakija pralahajuć praz Słaviansk da taho ž samaha Kramatorska», — tłumačyć Dźmitryj Zaparožac.
Były načalnik ukrainskaha Hienštaba Viktar Muženka kaža, što vyšyni na hetaj miascovaści armija Ukrainy vykarystoŭvała jašče padčas vyzvaleńnia Słavianska letam 2014 hoda ŭ ramkach antyterarystyčnaj apieracyi.
«Tam pierapad vyšyń, tam jary, jakija dazvalajuć efiektyŭna vieści abaronu. Tak što šlach rasijan u napramku Słavianska nie budzie prostym i chutkim, jak jany, mahčyma, čakajuć», — kazaŭ hienierał u intervju «Radyjo Svaboda».
Zaraz hety ŭčastak frontu nie źjaŭlajecca «rekardsmienam» pa kolkaści bajavych sutyknieńniaŭ za sutki (tut lidzirujuć Pakroŭski i Kanstancinaŭski kirunki), ale rasijanie prykładajuć namahańni, kab prasunucca ŭ bok Słavianska nie tolki ad paŭdniovaha bieraha raki Sievierski Daniec z boku akupavanaha Sievierska, ale i z paŭnočnaha bieraha — z boku Sierabranskaha lesu, jaki Rasija zachapiła vosieńniu 2025-ha.
Tut jany imknucca vyjści da pierapraŭ praz vodnuju pieraškodu kala vioski Stary Karavan (hienierał Hierasimaŭ 21 krasavika zajaviŭ, što ŭ hetym nasielenym punkcie ŭžo iduć bai, OSINT-analityki heta nie paćviardžajuć).
Situacyju dla Rasii uskładniaje toje, što ŭkraincy da hetaha času ŭtrymlivajuć pad kantrolem častku pasiołka Jampal, jaki apynuŭsia ŭ hłybini kantralavanaj praciŭnikam terytoryi. Utrymańnie pazicyj tut dazvalaje stvarać fłanhavuju pahrozu dla armii Rasii.
Kirunak na Kramatorsk
Što tyčycca Kramatorska, to rasijskija vojski mienš aktyŭnyja na hetym učastku, adznačaje pres-sakratar 11‑ha AK.
«Jany sprabujuć pieravažna ŭ bok Słavianska ruchacca, a nie Kramatorska. Bo kala jaho bolš padrychtavanyja inžyniernyja zbudavańni, bolš adkrytaj miascovaści i ruchacca na Kramatorsk ciapier — heta dla RF prosta biazhłuzda hublać svoj resurs. Tamu jany hetaha i nie robiać», — kaža Dźmitryj Zaparožac.
Na hetym učastku ŭmoŭnaj miažoj abarony źjaŭlajecca kanał Sievierski Daniec — Danbas. Niahledziačy na toje, što jon nie napoŭnieny vadoj, usio ž taki zastajecca pieraškodaj dla braniatechniki.
«Truby kanała Sievierski Daniec — Danbas da hetaha času adyhryvajuć fartyfikacyjnuju rolu, bo praciŭnik nie moža tak prosta padciahvać braniavanuju techniku. A heta davała b mahčymaść palepšyć ich łahistyku i nasycić piaredni kraj dla praciahu šturmavych dziejańniaŭ», — havoryć pres-sakratar 11‑ha AK.
Bajavyja dziejańni tut prachodziać na ŭschod ad kanała, u rajonie siołaŭ Mińkoŭka, Nikifaraŭka, Fiodaraŭka Druhaja i Pryvolle. Nivodzin z bakoŭ nie maje ŭpeŭnienaha kantrolu nad imi.
Akramia taho, padziei na Kramatorskim kirunku źviazanyja z tempami nastupu rasijan na susiednim Kanstancinaŭskim kirunku i kala Časavaha Jara.
Ukraincy da hetaha času ŭtrymlivajuć zachodnija ŭskrainy hetaha horada i adpaviedna strymlivajuć prasoŭvańnie rasijan u napramku Družkoŭki i Kanstancinaŭki.
Nie majučy istotnaha prasoŭvańnia piachoty, Rasija pačała bolš aktyŭna bambić harady ahłamieracyi z pavietra.
Vykarystoŭvajučy šmattonnyja KABy, jana raźbivaje kvartały, rujnuje łahistyku i sprabuje zrabić nasielenyja punkty nieprydatnymi da abarony.
Što tyčycca taktyki «na ziamli», to Rasija vykarystoŭvaje zachopleny ŭ śniežni 2025 hoda Sieviersk jak aporny punkt kancentracyi vojskaŭ dla dalejšaj ich infiltracyi ŭ susiednija sioły.
«U Sieviersk šmat rasijskich vajskoŭcaŭ zajechała. Tam usio kišyć ich asabovym składam, vielmi šmat techniki zajazdžaje tudy. Vierahodna, da poŭnamaštabnaha ŭvarvańnia tam stolki nie było nasielnictva, kolki zaraz tam ludziej jość», — skazaŭ Bi-bi-si suzasnavalnik OSINT-prajekta DeepState Rusłan Mikuła, jaki, u pryvatnaści, adsočvaje pieramiaščeńnie vojskaŭ.
Kali pačniecca nastupleńnie
Pavodle danych 11‑ha armiejskaha korpusa, na Słavianska-Kramatorskim napramku Rasija skancentravała kala 80 tysiač bajcoŭ, a taksama pierakidaje papaŭnieńnie z navučalnych centraŭ.
Ale hetych sił niedastatkova, kab prabić ešałanavanuju abaronu «pojasa krepaściaŭ». Tym bolš što ciapierašnija pazicyi armii Rasii nie spryjajuć prasoŭvańniu, adznačaje padpałkoŭnik Zaparožac:
«Pakul jany ŭ nizinie, my možam źniščać ich u vialikaj kolkaści, i ja maju sumnievy, što jany niejkija svaje płany zmohuć realizavać u najbližejšaj pierśpiektyvie, navat da kanca leta».
Adnak rasijskija vajskoŭcy praciahvajuć pastupovaje nazapašvańnie sił i, vidavočna, čakajuć spryjalnych umoŭ nadvorja, kab pačać vialikaje nastupleńnie, adznačaje analityk Rusłan Mikuła.
Na jaho dumku, jany pasprabujuć dziejničać pa takoj schiemie: spačatku dacisnuć Kanstancinaŭku (ciapier bai viaducca ŭ paŭdniovych i ŭschodnich kvartałach horada), zatym pasprabujuć uziać ci akružyć susiedniuju Družkoŭku.
Nastupnaja zadača — uziać pad kantrol Liman (zajavy hienierała Hierasimava pra kantrol nad 70% hetaha horada admaŭlajucca ŭkrainskim bokam, kamandavańnie USU kaža, što rasijskich vojskaŭ u nasielenym punkcie niama) i prasunucca ŭzdoŭž raki Sievierski Daniec.
Heta im daść mahčymaść abstrelvać Słaviansk z paŭnočnaha bieraha i ŭ pierśpiektyvie stvaryć «abcuhi» dla zachopu.
Adnak ci realistyčna ŭsio heta zrabić na praciahu nastupnych 4 miesiacaŭ ci navat da kanca hoda?
Suzasnavalnik DeepState upeŭnieny, što rasijskaja armija zaraz nie ŭ tych kandycyjach, kab vykanać takuju zadaču.
«Zadačy takija jany staviać, ale heta nijak nie karelujecca z realnaściu», — skazaŭ jon.
Bolš za toje, analityki DeepState nie fiksujuć maštabnych pierakidańniaŭ vojskaŭ mienavita na Danieččynu. Pavodle słoŭ Mikuły, jość prykmiety taho, što Rasija, naadvarot, pieramiaščaje reziervy, u pryvatnaści desantna-šturmavyja vojski, u rajon Hulajpola (Zaparožskaja vobłaść).
Akramia taho, Rasija sprabuje prymusić Ukrainu pierakidać dadatkovyja siły na Sumščynu i Charkaŭščynu, dzie jaje vojski aktyvizavalisia za apošnija tydni na prymiežnaj terytoryi. Mienavita na hetym učastku zafiksavana najbolšaje prasoŭvańnie Rasii ŭ krasaviku.
Amierykanski vajskovy analityk Majkł Kofman upeŭnieny, što Kreml nie maje siłaŭ i resursaŭ dla šturmu Słavianska-Kramatorskaj ahłamieracyi.
«Pahroza dla hetych haradoŭ i ŭsioj ahłamieracyi ŭ tym, što rasijskija vojski padyduć dastatkova blizka, kab ich drony mahli svabodna lotać nad Kramatorskam i Słavianskam. Heta b prymusiła ich da evakuacyi, i tady hetyja harady paŭtaryli b los Pakroŭska pieryjadu kanca 2024 — pačatku 2025 hoda. Heta značyć, Ukraina niby i kantraluje horad, ale jon hublaje žyćciazdolnaść», — vykazaŭ jon svaju dumku ŭ intervju «Suśpilnamu».
Padobnuju pazicyju ahučyŭ i adzin z kiraŭnikoŭ siłavoha błoka Ukrainy.
«U ich užo niama sił na novaje vialikaje nastupleńnie», — tak acharaktaryzavaŭ jon mahčymaści praciŭnika ŭ razmovie z Ukrainskaj słužbaj Bi-bi-si.
Pavodle jaho słoŭ, ukrainskaja armija zaraz «upeŭniena staić na svaich pazicyjach».
Budanaŭ: Ukraina nie addaść Danbas
Ukraina prapanoŭvała pierajmienavać častku Danbasa ŭ «Doniłend» u honar Trampa
U HUR zajavili, što Rasija rychtuje viasnova-letni nastup i choča zachapić Danbas da vieraśnia
Samy karykaturny złodziej Słonima skončyŭ svoj šlach u miasnym šturmie na Danbasie
Zialenski zajaviŭ, što nie źbirajecca vyvodzić vojski z Danbasa
«Rasija ciśnie na ZŠA». Zialenski raskryŭ novyja terminy, pastaŭlenyja rasijanami dla zachopu Danbasa
Kamientary
[Zredahavana]