Łukašenka narešcie sustreniecca ź Miadźviedzievym

U ramkach padrychtoŭki sustrečy na najvyšejšym uzroŭni 7 červienia adbyłasia telefonnaja razmova Alaksandra Łukašenki i Dźmitryja Miadźviedzieva. Pavodle źviestak pres-słužby biełaruskaha prezidenta, baki vyznačyli «prykładny pieralik pytańniaŭ», jaki płanujecca abmierkavać na sustrečy. Čakajecca, što havorka pojdzie pra funkcyjanavańnie Mytnaha sajuza i pierśpiektyvy stvareńnia Adzinaj ekanamičnaj prastory troch krain.

Płanujecca abmierkavać taksama «šerah inšych aktualnych pytańniaŭ paradku dnia dvuchbakovaha biełaruska-rasijskaha supracoŭnictva».

Baki damovilisia «daručyć vice-prem`ieram uradaŭ, jakija kuryrujuć pytańni Mytnaha sajuza, padrychtavać da sustrečy kiraŭnikoŭ dziaržaŭ roznyja kampramisnyja varyjanty vyrašeńnia prablem, što strymlivajuć efiektyŭnaje funkcyjanavańnie hetaha sajuza i stvareńnie AEP».

«Lidery Biełarusi i Rasii adzinyja ŭ mierkavańni, što majučaja adbycca sustreča pavinna być maksimalna kankretnaj i vynikovaj. Jana zaklikana stać važnym impulsam u raźvićci intehracyjnych pracesaŭ z udziełam našych krain», — havorycca ŭ paviedamleńni.

Jak paviedamlaje pres-słužba Kramla, razmova adbyłasia pa inicyjatyvie biełaruskaha boku. Padčas razmovy «była paćvierdžana damoŭlenaść pradoŭžyć abmierkavańnie pytańniaŭ farmiravańnia Mytnaha sajuza ŭ śviatle rašeńniaŭ, pryniatych Rasijaj i Kazachstanam padčas pasiadžeńnia Vyšejšaha orhana MS na ŭzroŭni kiraŭnikoŭ uradaŭ u Sankt-Pieciarburhu 21 maja hetaha hoda».

21 maja ŭ Sankt-Pieciarburhu kiraŭniki ŭradaŭ Rasii, Biełarusi i Kazachstana pa vynikach šmathadzinnych pieramoŭ nie zmahli ŭrehulavać sprečki ab nabyćci mocy Mytnaha kodeksa z 1 lipienia hetaha hoda.

.

Prem`jer-ministr Rasii Uładzimir Pucin adznačyŭ tady, što roznahałośsi tyčylisia aŭtamabilnaj i avijacyjnaj pramysłovaści, mytnych pošlin, uvozu tavaraŭ fizičnymi asobami dla ŭłasnych patreb.

Pucin paviedamiŭ, što apošniaja pazicyja adčuvalnaja dla Kazachstana, aŭta- i avijapram — dla Rasii, u toj čas jak dla Biełarusi adčuvalnym pytańniem ź`iaŭlajucca ŭvaznyja mytnyja pošliny.

Prem`jer-ministr Biełarusi Siarhiej Sidorski udakładniŭ, što havorka idzie pra pošliny na naftu i naftapradukty.

«Dla ŭzhadnieńnia značnych ekanamičnych pazicyj, takich jak aŭtapram, avijacyja, tavary, jakija zavoziać hramadzianie dla asabistaha spažyvańnia, mytnyja vyvaznyja pošliny, — pa ich pradoŭžym kansultacyi samym najbližejšym časam. Heta pytańnie sur`ioznaje, i ŭ im nie pavinna być mituśni», — skazaŭ Pucin.

Roŭna praz tydzień u Sankt-Pieciarburhu prem`jer-ministry Rasii i Kazachstana damovilisia ŭvieści Mytny kodeks Mytnaha sajuza na dvuchbakovaj asnovie. Dakumient adkryty dla padpisańnia Biełaruśsiu. Kiraŭnik biełaruskaha ŭrada na pieramovy nie prybyŭ. Uładzimir Pucin zajaviŭ, što Rasija i Kazachstan buduć ustupać u SHA ŭdvuch, kali Minsk nie dałučycca da dahavoraŭ Mytnaha sajuza.

1 červienia na sustrečy ź pieršym vice-prem`ieram Rasii Iharam Šuvałavym, jaki ŭznačalvaje kamisiju Mytnaha sajuza, Alaksandr Łukašenka zajaviŭ, što «Biełaruś moža pajści na kampramisnyja rašeńni ŭ Mytnym sajuzie pry ŭmovie raŭnapraŭnych i pavažlivych adnosin z boku inšych udzielnikaŭ».

Jak paviedamiŭ Šuvałaŭ, prezident Rasii nakiravaŭ jaho ŭ Minsk dla taho, kab u rabočym klučy abmierkavać usie mahčymyja nastupstvy rašeńniaŭ pa farmiravańni Mytnaha sajuza, a taksama prainfarmavać biełaruski bok ab pazicyi Rasii, u tym liku pa pytańni źbirańnia ekspartnych pošlin. «Maje instrukcyi takija: znajści mahčymyja raźviazki, kab my mahli ruchacca dalej pa šlachu intehracyi», — zajaviŭ Šuvałaŭ.

• 0
• 0
• 0
• 0
• 0
• 0
• 0
• 0