U pres‑słužbie «Hazproma» BiełaPAN zajavili, što pakul «nie mohuć skazać ničoha peŭnaha» ab skaračeńni pastavak hazu ŭ Biełaruś. Nie kamientujuć infarmacyju ab skaračeńni pastavak i biełaruskija profilnyja viedamstvy.
Jak paviedamlałasia raniej, prezident RF daručyŭ «Hazpromu» pačać abmiežavańnie pastavak hazu ŭ Biełaruś, praciahvajučy pry hetym kansultacyi ź Minskam pa ŭrehulavańni doŭhu. Takoje daručeńnie było dadziena ranicaj 21 červienia na sustrečy Dźmitryja Miadźviedzieva z kiraŭnikom «Hazproma» Alaksiejem Mileram.
Miler paviedamiŭ, što «Biełaruś pryznaje doŭh za haz, ale prapanoŭvaje apłatu rabić mašynami, abstalavańniem i roznymi inšymi tavarami», na što Miadźviedzieŭ zaŭvažyŭ: u adpaviednaści z rasijskim zakanadaŭstvam zamiežnyja płaciažy mohuć prymacca tolki ŭ zamiežnaj valucie — inakš heta supiarečyć zakonu. «Hazprom» ničym nie moža prymać apłatu za doŭh: ni pirahami, ni masłam, ni syram, ni inšymi srodkami płaciažoŭ», — padkreśliŭ prezident RF.
Pavodle infarmacyi Milera, u adpaviednaści ź biełaruska‑rasijskim kantraktam «Hazprom» u takoj situacyi «pavinien uvieści abmiežavańnie pastavak hazu praparcyjanalna abjomu doŭhu». Abmiežavańni, dadaŭ jon, buduć uviedzieny z ranicy 21 červienia «pastupova, pa sutkach».
«Pačynajcie tady adpaviednuju praceduru, zachoŭvajučy ŭzajemadziejańnie ź biełaruskimi partniorami i schilajučy ich da vykanańnia dahavora i ŭ adpaviednaści z tymi praviłami, jakija isnujuć u «Hazproma» ź inšymi kontrahientami», — rasparadziŭsia Miadźviedzieŭ.
«Hazprom» patrabuje ad Minska pahasić zapazyčanaść u 192 młn. dalaraŭ za pastaŭki hazu ŭ 2010 hodzie.
U svaju čarhu, u Minsku zajaŭlajuć, što «Hazprom» vinien Biełarusi bolš jak 200 młn. dołaraŭ za tranzit hazu pa biełaruskaj terytoryi.
