Rasijskaja ahientura vykarystała niejrasietku Claude dla kradziažu i dla ŭpłyvu na vybary
Spravazdača raspracoŭščykaŭ štučnaha intelektu vykryła novyja mietady złoŭžyvańnia moŭnymi madelami. Akramia aŭtamatyzacyi kibieratak i hienieracyi prapahandy, karystalniki źviartalisia da ałharytmaŭ pa dapamohu ŭ madyfikacyi virusaŭ, raspracoŭcy ŭzbrajeńniaŭ i praviadzieńni paklopnickich kampanij.
Kampanija Anthropic apublikavała spravazdaču ab złoŭžyvańniach svaimi madelami štučnaha intelektu ŭ pieryjad sa śniežnia 2025 pa žnivień 2026 hoda. Jak paviedamlaje BBC, adnoj z hałoŭnych pahroz stali sproby vykarystańnia čat-bota Claude dla navukovych daśledavańniaŭ, jakija mahli pryvieści da stvareńnia bijałahičnaj zbroi.
Karystalniki źviartalisia da niejrasietki pa dapamohu ŭ napisańni hrantavych zajavak na vyvučeńnie virusa čykunhuńja. Zapyty tyčylisia hienietyčnaj madyfikacyi patahienu dla pavieličeńnia jahonaj zaraznaści i zdolnaści abychodzić imunnuju sistemu čałavieka.
Vydańnie The New York Times udakładniaje, što padazronaja praca pavinna była pravodzicca ŭ vajskovym daśledčym instytucie. Technałahičnaja kampanija nie zmahła dakładna vyznačyć metazhodnaść takich ekśpierymientaŭ: jany mahli pryvieści jak da stvareńnia vakcyny, tak i da raspracoŭki bijałahičnaj zbroi. Z-za vysokaj ryzyki akaŭnty navukoŭcaŭ byli zabłakavanyja. U spravazdačy taksama fiksujucca sproby vykarystańnia štučnaha intelektu dla raspracoŭki prahramnaha zabieśpiačeńnia dla rakiet i bajavych dronaŭ z boku karystalnikaŭ z Rasii, Kitaja i Jemiena. Paśla hetych incydentaŭ Anthropic uzmacniła abmiežavańni ŭ svaich najnoŭšych madelach Claude Fable 5 i Mythos.
Aŭtamatyzacyja kibieratak i špijanažu
Štučny intelekt značna źniziŭ barjer dla praviadzieńnia maštabnych chakierskich apieracyj. Vydańnie CyberScoop pryvodzić danyja ab aktyŭnaści złamyśnika pad psieŭdanimam JackPoterz, čyje mietady supadajuć z rasijskaj dziaržaŭnaj hrupoŭkaj Midnight Blizzard. Jon vykarystoŭvaŭ Claude dla arhanizacyi špijonskaj kampanii suprać bolš čym dvaccaci ŭradavych i abaronnych ustanoŭ Ukrainy i Jeŭropy.
Niejrasietka bieśpierapynna manitoryła reakcyju antyvirusnych prahram na škodnasny kod, i pry vyjaŭleńni pahrozy aŭtanomnyja ahienty imhnienna pierapisvali prahramu. Takim čynam byli skradzienyja dakumientacyja na sistemy videabačańnia dla dronaŭ i sotni tysiač nacyjanalnych identyfikacyjnych zapisaŭ.
Technałohija taksama paskoryła dziejnaść inšych hrupovak. Kitajskija studenty z dapamohaj roja II-ahientaŭ znachodzili dziasiatki ŭraźlivaściej nulavoha dnia ŭ sietkavym abstalavańni na praciahu miesiaca. A kibierzłačynny sindykat ShinyHunters vykraŭ bolš za 2100 karparatyŭnych klučoŭ dostupu da vobłačnych servisaŭ Microsoft Azure usiaho za 34 hadziny.
Hienieracyja prapahandy i kradziež danych
Spravazdača apisvaje fakty vykarystańnia madelaŭ dla stvareńnia sietak falšyvych akaŭntaŭ. Jak adznačaje telekanał Sky News, rasijskija dziaržaŭnyja miedyja vykarystoŭvali Claude dla hienieracyi prapahandysckich materyjałaŭ, jakija maskavalisia pad niezaležnyja naviny dla ŭpłyvu na vybary ŭ Małdovie. Padobnyja kampanii taksama fiksavalisia z boku Irana i Turcyi.
Asobnym kirunkam złoŭžyvańniaŭ stała tak zvanaja dystylacyja — kradziež danych kitajskimi ŠI-łabaratoryjami. Kampanii Alibaba, DeepSeek i Moonshot AI stvaryli tysiačy falšyvych akaŭntaŭ dla hienieracyi da troch miljonaŭ zapytaŭ štodnia da starych viersij Claude. Atrymanyja adkazy vykarystoŭvalisia dla navučańnia ŭłasnych kitajskich niejrasietak.
Niekatoryja łabaratoryi ŭpotaj pieranakiroŭvali zapyty svaich karystalnikaŭ da amierykanskaj madeli, vydajučy jaje adkazy za svaje. Siarod pieradadzienych takim čynam danych apynulisia zapisy z kamier nazirańnia, jakija zapytvali pradstaŭniki kitajskaj armii.
Adstaŭka daśledčyka i prablema kantrolu
Publikacyja spravazdačy pra złoŭžyvańni adbyłasia na fonie ŭnutranaha kryzisu ŭ industryi. Z kampanii Anthropic zvolniŭsia adzin z daśledčykaŭ Džejkab Koksan. Svajo zvalnieńnie jon patłumačyŭ tym, što kankurencyja pamiž Anthropic i OpenAI viadzie da niekantralujemaha raźvićcia technałohij. Jon adznačyŭ, što niekatoryja jaho kalehi ličać mahčymym źniščeńnie čałaviectva štučnym intelektam da kanca hetaha dziesiacihodździa. Ekśpierty ŭ halinie kibierbiaśpieki padkreślivajuć, što situacyja, pry jakoj pryvatnyja karparacyi samastojna i biez demakratyčnaha nahladu vyznačajuć miežy biaśpiečnaha vykarystańnia štučnaha intelektu, stvaraje ryzyki dla hramadstva.
«Naša Niva» — bastyjon biełaruščyny
PADTRYMAĆInžynier z Anthropic zvolniŭsia, kab papiaredzić, što ŠI voś-voś moža vyjści z-pad kantrolu
«Nastupnyja hod-dva vyrašać los čałaviectva». Inžynier, jaki zvolniŭsia z Anthropic, raskazaŭ, što dumajuć unutry kampanii
Voś jak štučny intelekt moža źniščyć čałaviectva
Štučny intelekt rašyŭ zadaču Naŭje—Stoksa, jakuju ludzi nie mahli razhadać 90 hadoŭ. Historyja, adnak, abiarnułasia skandałam
Novaja madel GPT-6 Astra prosta ŭziała i prajšła ŭsie 48 uzroŭniaŭ kapčy «Ja nie robat»
Minčuk źniaŭ rolik pra čarhu ŭ paliklinicy, dzie było bolš za 150 čałaviek. Za heta na jaho napisali zajavu ŭ milicyju10
Kamientary
Čarhovy prykład što nijaki Skajniet nie prydumaje takich złačynstvaŭ jak čałaviek.