«Biełtranshaz» u chutkim časie moža stvaryć sumiesnaje pradpryjemstva z «Hazpromam» na roŭnych umovach. Pra heta zajaviŭ premjer-ministar Biełarusi Siarhiej Sidorski ŭ časie vizytu ŭ Rasieju.
Biełaruska-rasiejskija pieramovy ŭ hazavaj sfery zaŭvažna aktyvizavalisia. U vieraśni adbyŭsia šerah sustrečaŭ, padčas jakich z abodvuch bakoŭ prahučali zajavy pra mahčymaje chutkaje vyrašeńnie prablemy. Pry hetym składvajecca ŭražańnie, što kožny z udzielnikaŭ pieramovaŭ pa-raniejšamu zastajecca pry svaim asabistym mierkavańni.
21 vieraśnia sustrakalisia kiraŭniki «Biełtranshazu» i «Hazpromu» Dźmitry Kazakoŭ i Alaksiej Miler. Padčas sustrečy abmiarkoŭvalisia pytańni dvuchbakovaha supracoŭnictva na reštu hodu, a taksama ŭmovy pastavak hazu ŭ Biełaruś u 2007 h. Išła havorka i pra niezaležnuju acenku rynkavaha koštu hazatranspartnaj systemy Biełarusi. Premjer Sidorski padčas vyzytaŭ u Rasieju namiaknuŭ na mahčymy varyjant raźviazańnia hazavaj prablemy: stvareńnie SP na bazie «Biełtranshazu» i «Hazpromu», za što Rasieja harantuje Biełarusi pastaŭki hazu pa svaich unutranych cenach. Pry hetym jon apelavaŭ da miždziaržaŭnaha pahadnieńnia 2002 h. ab stvareńni roŭnych umovaŭ u vobłaści cenavaj palityki: «Papiarednie my damovilisia ab tym, što pry stvareńni sumiesnaha biełaruska-rasiejskaha hazatranspartnaha pradpryjemstva zychodzim z taho, što košty na haz dla Biełarusi buduć ustalavanyja ŭ adpaviednaści z damovaj ab sajuznaj dziaržavie. Hetaja papiaredniaja damoŭlenaść zastajecca ŭ sile. My hatovyja pajści na takoje padvyšeńnie cenaŭ, na jakoje pojduć rasiejskija pradpryjemstvy».
Acenkaj rynačnaha koštu «Biełtranshazu» zajmajecca halandzki bank ABN Amro. Pa słovach Sidorskaha pracedura acenki maje skončycca ŭ listapadzie. Da kanca hodu baki musiać aznajomicca z vynikami acenki i vyznačycca z umovami stvareńnia SP i koštam pastavak hazu ŭ Biełaruś u nastupnym hodzie.
Kiraŭnik dyplamatyčnaj misii Rasiei ŭ Biełarusi Alaksandar Surykaŭ ličyć, što košty na haz dla Biełarusi nia musiać pieravyšać 100-120 dalaraŭ za tysiaču kubametraŭ. U toj ža čas jon papiaredžvaje, što termin dziejańnia vyšejuzhadanaha miždziaržaŭnaha pahadnieńnia, jakoje rasiejski bok tak i nie ratyfikavaŭ, skančvajecca ŭ krasaviku 2007 h. Kali ž Rasieja ŭ vyniku niazhody ź Biełarusiaj admovicca ad umovaŭ pahadnieńnia, heta daść joj nahodu nie pastaŭlać siudy haz pa ŭnutryrasiejskich cenach. Ale dyplamat na toje j dyplamat. A voś hazpramaŭskaje kiraŭnictva maje svajo bačańnie sytuacyi. «Pierachod na rynkavyja ceny ŭ vypadku ź Biełaruśsiu adbudziecca niezaležna ad vynikaŭ pieramovaŭ» – śćviardžaje kramloŭskaja krynica rasiejskaj hazety «Kommiersant'». U «Hazpromie» pytańni štohadovych pastavak hazu ŭ Biełaruś bačacca vyklučna z pazycyjaŭ kamercyi. Inšaja reč – stvareńnie sumiesnaha pradpryjemstva, jakoje razhladajecca ŭ jakaści stratehičnaha nakirunku supracoŭnictva ŭ hazavaj sfery. «Kali ŭ nas budzie stratehičnaje bačańnie supracoŭnictva ŭ hazavaj sfery, usie drobnyja pytańni, uklučna z štohadovymi stamlajučymi pieramovami napiaredadni zimniaha sezonu, adyduć na zadni plan», – miarkuje krynica ŭ Kramli. Heta aznačaje, što ŭzamien za atrymanyja aktyvy »Biełtranshazu» Biełarusi ciaham niekalkich hadoŭ dazvolać atrymlivać haz pa cenach, nižejšych, čym na Zachadzie. Rasiejskija partnery «Biełtranshazu» bačać u apošnich zajavach Sidorskaha zruch.
Pieraabrańnie Sidorskaha na pasadu premjera niezaležnymi ekspertami tłumačyłasia siarod inšaha i žadańniem pierakłaści na jaho adkaznaść u vypadku mahčymaha pravału pieramovaŭ ci zdačy «Biełtranshazu» Rasiei. Za pryhožaj šyldaj «stvareńnie sumiesnaha hazatranspartnaha pradpryjemstva» moža chavacca staraja schiema: zdača naviečna čarhovaha elementu nacyjanalnaha suverenitetu ŭzamien za jašče paru hadoŭ tannaha hazu.
❏
U 2006 u Biełaruś budzie pastaŭlena 21 młrd. kub. m hazu. My atrymlivajem haz z Rasiei pa canie 46,68 dalaraŭ za 1000 kub. m. Transpartny taryf składaje – 0,75 dał. za 1000 kub. m pry transpartavańni hazu pa sietkach AAT «Biełtranshaz» i 0,46 dał. – pa hazapravodzie «Jamał-Eŭropa».
❏
Fota Julii Daraškievič
