Niaŭžo i procistajańnie imperyi nia źmienić mentalnaści łukašenkaŭcaŭ? Piša Alaksandar Kłaskoŭski.
Mała kaho kranuła źviestka, što Instytut sacyjalna-palityčnych daśledavańniaŭ pry Administracyi prezydenta pierarablajuć u infarmacyjna-analityčny centar. Ci mała ŭ nas šyldaŭ mianiajuć?
Mahčyma, adnak, što heta symptom. Imavierna, ułada adčuła patrebu ŭ sapraŭdnaj analitycy zamiest navukapadobnaj apalahietyki. Žyćcio prycisnuła!
Pakul pampavali z Uschodu tannyja resursy, možna było płacić hrošy i za apaviańnie ŭnikalnaj «biełaruskaj madeli». Zaraz ža vidavočna, što mieli racyju niezaležnyja eksperty, na dumku jakich u načalstva była alerhija. Tyja jajkahałovyja daŭno dziaŭbli pra inavacyjny šlach, enerhietyčnuju niezaležnaść, patencyjał małoha dy siaredniaha biźniesu...
Siońnia va ŭłady jość šaniec naładzić kantakt ź niezaležnaj ekspertnaj supolnaściu. Dakładniej, tymi jaje vyspami, što jašče trymajucca.
Na Zachadzie kiroŭnaja elita ŭsmoktvaje nie tolki parady, ale i najlepšyja kadry z analityčnych centraŭ. Jaskravy prykład – karjera Kandalizy Rajs. Ale našamu načalstvu taki vobraz bačycca chiba ŭ načnych kašmarach.
Ź inšaha boku, vysokaje kiraŭnictva, mahčyma, i nia viedaje pra mnohija zusim nie palityzavanyja kanceptualnyja napracoŭki, što hienerujucca, naprykład, centram «Stratehija» na čale z ekanamičnym karyfiejem Leanidam Zaikam. Ci znojducca naviersie razumnyja i śmiełyja daradcy, kab źviarnuć uvahu na nie zapatrabavany intelektualny resurs?
Siońnia, kali ŭsich biare za harlak imperyja, uładzie dy intelektuałam znajści supolnuju movu patencyjna lahčej, čym jak za časami «bratniaj intehracyi».
Darečy, ciapier dziaržavie byŭ by nadta karysny i patencyjał apalnych humanitaraŭ. Tych, kaho zahnali ŭ andehraŭnd jak nacyjanalistaŭ. Bo staŭka na vypakładzienuju, zrusifikavanuju historyju Biełarusi vyłazić kiroŭnaj elicie bokam. Užo daŭno nie pracuje rytoryka nakont hnijeńnia ŭ akopach. U siońniašniaj sytuacyi procistajańnia imperyi było b lahična apelavać da hłybiniaŭ biełaruskaha patryjatyzmu. To bok uzdymać na ščyt pieramohu pad Voršaj, a zamiest dubovych idealahičnych cyrkularaŭ masava tyražavać knihi Sahanoviča dy Arłova.
U historyi jość prykłady, jak spakvala transfarmavalisia aŭtarytarnyja režymy, prycisnutyja patrebaj madernizacyi: Hišpanija, Paŭdniovaja Kareja...
Ale bolej imavierna, što naša ŭłada budzie vykarystoŭvać patencyjał ekspertnaj supolnaści dazavana i kańjunkturna. Kiroŭnym viarcham nadzvyčaj ciažka pierasiahnuć praz barjer mentalnaści «savieckich biełarusaŭ». Druhi tormaz – heta strach choć trochi raźniavolić niezaležnuju dumku. I voś hetyja čyńniki mohuć stacca fatalnymi.
