Na pačatku asabisty ŭspamin.
U adzin z hadoŭ milicyja «paviazała» hrupu hramadzian, jakija sabralisia ŭšanavać hadavinu Słuckaha zbrojnaha čynu. «Paviazali» i mianie. Aficer milicyi dapytvaŭsia ŭ mianie, jakaja maja nacyjanalnaść. Ja ž tłumačyŭ hetamu čynoŭniku, što nie abaviazany nazyvać svaju nacyjanalnaść, što takoje hrafy niama ŭ pašparcie i što takoje prava (nie nazyvać svaju nacyjanalnaść) dadziena mnie Kanstytucyjaj. Jak vyjaviłasia, dla «orhanaŭ» Kanstytucyja — nie zakon. U ich, u sistemie Ministerstva ŭnutranych spraŭ, akazvajecca, jość błanki, u jakich majecca hrafa «nacyjanalnaść». I hety błank naležnym čynam treba zapoŭnić. Heta našturchnuła mianie na dumku, što našy słaŭnyja «orhany», musić, vyvodziać u siabie niejkuju statystyku nakont taho, jakaja nacyja źjaŭlajecca samaj pravaparušalnaj. Inakš rastłumačyć najaŭnaść hetaje hrafy ŭ błankach dakumientaŭ niemahčyma.
Z «orhanaŭ» što voźmieš? Jany jakraz tym i viadomyja, što masava parušajuć pravy čałavieka. Uvieś śviet ciapier čytaje, jak abychodzilisia supracoŭniki MUS z kamierunskim futbalistam Hi Fransua Tukamam u słavutym izalatary na vuł. Akreścina ŭ Miensku.
Pra toje, što ŭ Biełarusi rasizm praktykujecca aficyjna, śviedčać i paviedamleńni kryminalnaj chroniki, zasnavanyja na milicejskich zvodkach. U infarmacyjnych materyjałach pra złačyncaŭ ci zapadozranych u złačynstvach abaviazkova padkreślivajecca ich prynaležnaść da cyhanskaj nacyjanalnaści, u toj čas, jak u infarmacyjnych materyjałach ab pravaparušeńniach, učynienych pradstaŭnikami inšych nacyjanalnaściaŭ, čytačam pra ich nacyjanalnuju prynaležnaść nie paviedamlajuć.
U cyvilizavanym hramadstvie pryniatyja dźvie aksijomy: usie hramadzianie roŭnyja; u złačyncaŭ niama nacyjanalnaści. Liču, što Biełaruś u peŭnaj miery cyvilizavanaja kraina. Tamu hramadskaść maje prava spytacca ŭ «orhanaŭ»: kali z błankaŭ ankiet, pratakołaŭ i h. d. budzie prybrana hrafa «nacyjanalnaść»? Kali ŭ infarmacyjnych materyjałach ab učynienych pravaparušeńniach źniknie ŭkazańnie na prynaležnaść pravarušalnikaŭ da cyhanskaj nacyjanalnaści?
***
Anatol Sidarevič, namieśnik staršyni Biełaruskaj
