Adzin z najbolš tytułavanych biełaruskich bijatlanistaŭ Alaksiej Ajdaraŭ u novym sezonie budzie vystupać za zbornuju Ŭkrainy. Pavodle kiraŭnictva Federacyi bijatlonu Ŭkrainy, alimpijski pryzer, čempijon śvietu, šmatrazovy pieramožca piaršynstvaŭ Eŭropy i etapaŭ Kubka śvietu ŭžo źmianiŭ hramadzianstva. U Biełaruskaj federacyi bijatlonu paćvierdzili, što dazvoł na vystup Ajdarava za Ŭkrainu jość, ale pry hetym spartoŭcu ŭsio ž daviadziecca prapuścić čempijanat śvietu – kab nie stvaraŭ lišniaj kankurencyi biełarusam.
Kanflikt Alaksieja Ajdarava ź Biełaruskaj federacyjaj bijatlonu razhareŭsia napiaredadni zimovaj Alimpijady ŭ Turynie, kali spartoviec nie znajšoŭ svajho proźvišča ŭ śpisie alimpijcaŭ. Kiraŭnictva federacyi bijatlonu, jakuju ŭznačalvaje staršynia KDB Ściapan Sucharenka, paličyła, što 31-hadovy Ajdaraŭ nie nabraŭ nieabchodnaj spartovaj kandycyi, a tamu jahony ŭdzieł u Alimpijadzie niemetazhodny. Miž tym Ajdaraŭ – adziny biełaruski bijatlanist, jaki staŭ pryzeram Alimpijskich hulniaŭ u składzie nacyjanalnaj kamandy (Nahana, 1998 hod).
U Biełaruskaj federacyi bijatlonu dajuć zrazumieć, što ŭ pasłuhach Ajdarava patreby bolš nia majuć. Sam spartoviec padčas letnich zboraŭ u Raŭbičach zajaviŭ, što jašče nie stary i chacieŭ by vystupać dalej. I prapanavaŭ svaje pasłuhi zbornaj Ukrainy.
Napiaredadni prezydent Federacyi bijatlonu Ŭkrainy Ŭładzimier Brynzak aficyjna paćvierdziŭ: pytańnie z atrymańniem Ajdaravym ukrainskaha hramadzianstva vyrašanaje, i spartoviec zaličany ŭ skład kamandy.
U Biełaruskaj federacyi bijatlonu taksama paćvierdzili, što aficyjny dazvoł za podpisam hienerała Sucharenki na pierachod u kamandu Ŭkrainy Ajdaravu dadzieny, ale pry ŭmovie, što jon prapuścić usiaśvietnaje pieršynstvo 2007 hodu ŭ Anterselvie.
Havoryć dziaržaŭny trener pa bijatlonie Alaksandar Bialajeŭ:
(Bialajeŭ: ) «Kali hramadzianstva pryniaŭ, značyć, i vystupać budzie. Praŭda, za vyklučeńniem čempijanatu śvietu. Na etapach Kubka śvietu moža vystupać biez abmiežavańniaŭ».
U štabie ŭkrainskich bijatlanistaŭ na Alaksieja Ajdarava ŭskładajuć vialikija spadziavańni. U adroźnieńnie ad biełaruskich kalehaŭ, Uładzimier Brynzak pierakanany: ukrainskaj kamandzie taki daśviedčany prafesijanał nie paškodzić. Mała taho, Brynzak zajaviŭ, što Ajdaraŭ maje stać lideram zbornaj Ukrainy.
Strata Ajdarava – nie adzinaja dla biełaruskaj kamandy. «Zaviazali» sa sportam adrazu čatyry «veterany» – Aleh Ryžankoŭ, Uładzimier Dračoŭ, Vadzim Sašuryn i Alena Zubryłava. Pad pytańniem udzieł u spabornictvach i inšych daśviedčanych spartoŭcaŭ. Volha Nazarava, lider kamandy pavodle vynikaŭ minułaha hodu, maje plany druhi raz stać maci. Kaciaryna Ivanova amal va ŭltymatyŭnaj formie patrabuje vyrašeńnia kvaternaha pytańnia.
Chto pry takim raskładzie praciahnie tradycyi biełaruskaha bijatlonu? Prahnoz srebranaj pryzerki Alimpijskich hulniaŭ u Lilechamery Śviatłany Paramyhinaj niesuciašalny.
(Paramyhina: ) «Dzie toje pakaleńnie, pra jakoje časta havorać? Kolki ŭžo Novikavu i Symanu? Pa-mojmu, hadoŭ pa 26. Kali ja była ŭ zbornaj SSSR, trapiŭšy tudy ŭ 24 hady, mnie naŭprost skazali: hod pabudzieš, a potym budziem raźvitvacca. Maŭlaŭ, u takija hady ŭžo nia biehajuć. U bijatlonie kali niama vynikaŭ u 23 – 24 hady, čakać, što jany niekali źjaviacca, heta nierealna. Tamu kali my havorym albo niechta piša, što Novikaŭ raskryjecca na nastupnaj Alimpijadzie, to heta, prabačcie, nieabhruntavanyja spadziavańni».
Alaksiej Ajdaraŭ paŭnavartasna pačnie vystupać za zbornuju Ŭkrainy ad lutaha 2007 hodu, na adnym z etapaŭ Kubka śvietu. Ale pieršuju abkatku z novymi partnerami zrobić padčas nie zusim prestyžnych etapaŭ Kubka Eŭropy, na jakich zvyčajna prahladajecca perspektyŭnaja moładź.
* * *
15 listapada Alaksieju Ajdaravu spoŭnicca 32 hady. Ź jahonaj dapamohaj stabilna papaŭniałasia medalovaja skarbonka biełaruskaj zbornaj: pieršaje miesca ŭ kamandnaj estafecie (1999 hod); srebrany medal u 2001-m; bronzavyja medali ŭ estafecie i indyvidualnych honkach u 1996, 2001, 2003 i 2005 hadoch. Ajdaraŭ – uładalnik bronzavaj alimpijskaj uznaharody z Nahana. Najvyšejšaje jahonaje miesca va ŭsiaśvietnaj klasyfikacyi – 12-je ŭ ahulnym zaliku sezonu 1998/99.
Fota hicksnett.com
