Namieśnik staršyni Mienskaha abłvykankamu Anatol Marčuk pryznaŭ isnavańnie prablemy niedastatkovaha ŭvodu žytła ŭ Barysavie dy inšych bujnych pramysłovych centrach Mienščyny: Žodzinie, Salihorsku, Słucku, Maładečnie. Čynoŭnik ličyć, što pryčyna sytuacyi ŭ niedastatkovych mahutnaściach budaŭničych arhanizacyj.
Razam z tym, možna vykazać mierkavańnie, što jość i inšaja pryčyna daŭhich i na siońnia bieznadziejnych čerhaŭ mieścičaŭ, jakija žadajuć pabudavać kvatery, a tym bolš atrymać sacyjalnaje žytło. Pavodle infarmacyi Marčuka, jakoj jon padzialiŭsia z karespandentam BIEŁTA, na Mienščynie ŭ studzieni-vieraśni ŭviedziena kala 1265 chat na vioscy, što skłała 71% ad hadavoha zadańnia i 105,4% da letašniaha roŭniu analahičnaha peryjadu.
Na budaŭnictva žytła na vioscy sioleta vyłučana 132 miljardy rubloŭ kredytnych resursaŭ. Užo asvojena 92% hetaj sumy. «Na siońniašni dzień my sutyknulisia z prablemaj kredytavańnia i tamu byli vymušanyja źviarnucca va ŭrad, Ministerstva ekanomiki. Nacyjanalny bank, Biełarusbank i Biełahraprambank z prośbaj pavieličeńnia hetaj kredytnaj linii», – zajaviŭ Anatol Marčuk.
Adsiul možna zrabić vysnovu, što mienavita na budaŭnictvie tak zvanych ahraharadkoŭ zasiarodžanyja finansavyja resursy i kvalifikavanyja budaŭniki Mienskaj vobłaści, jakich vidavočna nie staje ŭ haradach.
