Hrodzienski dziaržaŭny ŭniviersitet imia Janki Kupały pakul nie źbirajecca pieravodzić spravavodstva na biełaruskuju movu.
«Spravavodstva ŭ Hrodzienskim dziaržaŭnym ŭniviersitecie imia Janki Kupały pieravodzicca na biełaruskuju movu», — napisaŭ u internet-supłocy «Tolki biełmova» Ihar Słučak, jaki ź listapada minułaha hoda ładzić piersanalnuju kampaniju «Spravavodstva pa-biełarusku!» Raniej jon dasłaŭ u HrDU adpaviedny zvarot.
Va ŭniviersitecie na heta adkazali admoŭna: «Nie, pakul nichto nie pieravodziŭ dakumienty na movu. Dy i nie źbiralisia. Vy ž viedajecie, što ŭ nas dźviuchmoŭje».
Hetyja słovy paćvierdziŭ vykładčyk HrDU historyk Andrej Čarniakievič. Jon kaža, što pra biełarusizacyju dakumientacyi nichto nie čuŭ. Pa jaho słovach, u instytucie pavyšeńnia kvalifikacyi nastaŭnikaŭ, ź jakim univiersitet ščylna supracoŭničaje, nazirajecca advarotnaja situacyja — tut dakumientacyju pačali pierakładać na rasiejskuju movu. «Tak što hetyja zajavy pakul što vielmi aptymistyčnyja. Heta taja Harodnia, jak vy viedajecie, dzie nastaŭnica zabaraniła vieści dziońnik pa-biełarusku».
Tym nie mienš, jak śviedčyć dośvied Ihara Słučaka, aściarožnyja padstavy dla aptymizmu ŭsio ž jość. Niekatoryja z čynoŭnikaŭ, jakim jon šle zapyty, pačali adkazvać pa-biełarusku.
