U čaćvier, 4 listapada, były načalnik UUS Hrodzienskaha abłvykankama pryjšoŭ da prakurora vobłaści Viktara Marozava, kab zdacca. Paŭhoda milicyja biezvynikova šukała hienierał-majora Hienadzia Chaćko pa ŭsioj Biełarusi i Rasii. Sam jon rastłumačyŭ, što znachodziŭsia ŭ Sankt-Pieciarburhu.
Dom, jaki pabudavaŭ hienierał Chaćko
Hienierał źnik nieŭzabavie paśla taho, jak u dačynieńni da jaho prakuratura raspačała kryminalnuju spravu pa č.3 art.424 KK «Złoŭžyvańnie ŭładaj ci słužbovymi paŭnamoctvami». Zdaryłasia heta 26 studzienia hetaha hoda.
U vinu Hienadziu Chaćko pastavili toje, što jon niezakonna vykarystaŭ resursy abłasnoha UUS pry budaŭnictvie katedža. Adnak praz dva z pałovaj tydnia, 13 lutaha, žonka hienierała pryjšła ŭ milicyju i zajaviła ab tym, što muž źnik. Na adnoj z pres-kanfierencyj novy načalnik UUS Hrodzienskaha abłvykankama Valancin Michnievič zhadaŭ, što žančyna ŭ milicyi raspaviadała ab źniknieńni muža spakojna, biez emocyj, dziejničajučy jak byccam pa zahadzia padrychtavanym płanie. Paśla hetaha raspačali jašče adnu spravu pa fakcie źniknieńnia čałavieka.
Hienadź Chaćko źjaviŭsia na minułym tydni ŭ kabiniet prakurora Hrodzienskaj vobłaści z pakajańniem. Pryznaŭ siabie vinavatym u złačynstvie, u jakim padazravaŭsia, i paabiacaŭ vypłacić škodu, naniesienuju dziaržavie.Apynułasia, što siońnia heta ŭsiaho tolki ... 11.000.000 rubloŭ. U chodzie rasśledavańnia suma moža pavialičycca, paviedamiŭ staršy pamočnik abłasnoha prakurora Viačasłaŭ Ihnacik.
Rynkavy košt samoha dvuchpaviarchovaha katedža, jaki pabudavaŭ hienierał, aceńvajecca ŭ dźvieście tysiač dalaraŭ. Siońnia hetaja nieruchomaść aryštavanaja. Jak stała viadoma, Hienadź Chaćko viernie sabie majomaść, kali pakryje abaviazak pierad dziaržavaj.
Pa słovach staršaha pamočnika prakurora vobłaści Viačasłava Ihnacika, u suviazi z raskajańniem, byłoha načalnika abłasnoha UUS nie aryštavali, a adpuścili pad padpisku ab niavyjeździe. Surazmoŭca udakładniŭ, što hienierała nie buduć karać za toje, što toj źnik padčas śledstva. Pryčyna takoj pabłažlivaści ŭ tym, što na momant źniknieńnia nie było vyrašana, jakuju mieru strymańnia abrać u dačynieńni da Hienadzia Chaćko. Padpisku ab niavyjeździe jon taksama nie padpisvaŭ.
Viačasłaŭ Ihnacik skazaŭ, što
pavodle Kryminalnaha Kodeksu RB Hienadź Chaćko moža raźličvać na spynieńnie kryminalnaj spravy, kali całkam kampiensuje škodu.Takuju mahčymaść daje art.88 KK RB «Vyzvaleńnie ad kryminalnaj adkaznaści ŭ suviazi ź dziejnym raskajańniem». Praŭda, dla hetaha Hienadziu Chaćko treba napisać prašeńnie na imia prezidenta i čakać rašeńnia. Zhadanym artykułam moža skarystacca čałaviek, jaki ŭpieršyniu ździejśniŭ złačynstva, jakoje nie ŭjaŭlaje vialikaj niebiaśpieki dla hramadstva. Šaniec jość i ŭ tych, chto abvinavačvajecca ŭ mienš ciažkim złačynstvie. Praŭda, takija ludzi pavinny raskajacca abo spryjać vyjaŭleńniu złačynstva, a taksama pakryć naniesienuju škodu.
Razam z tym hod nazad prezident užo skazaŭ svajo słova z nahody dziejańniaŭ 52-hadovaha hienierał-majora. Alaksandr Łukašenka Ukazam №530 ad 3 listapadzie 2009 hoda vyzvaliŭ Hienadzia Chaćko ad pasady načalnika UUS Hrodzienskaha abłvykankama z farmuloŭkaj «u suviazi sa ździajśnieńniem pravinaŭ, što dyskredytujuć zvańnie supracoŭnika orhanaŭ unutranych spraŭ». Ci možna kazać paśla hetaha ab daravańni, pakaža čas.
Nahadajem, što
siońnia ŭ sudzie Kastryčnickaha rajona idzie praces nad byłym namieśnikam Hienadzia Chaćko pa haspadarčaj častcy. Siarhieja Rudnika taksama abvinavačvajuć u złoŭžyvańni słužbovymi paŭnamoctvami dla budaŭnictva katedža svajmu načalniku.Sankcyja artykuła, pa jakim abvinavačvajecca milicyjant, praduhledžvaje pakarańnie ŭ vyhladzie pazbaŭleńnia voli na termin ad troch da dziesiaci hadoŭ z pazbaŭleńniem prava zajmać peŭnyja pasady abo zajmacca peŭnaj dziejnaściu, z kanfiskacyjaj majomaści abo biez kanfiskacyi.
Zastajecca zahadkaj, jakim čynam doŭhi čas hienierał Hienadź Chaćko zmoh zastavacca niezaŭvažanym dla milicyjantaŭ. Tym bolš zmoh niezaŭvažna pierasiekčy miažu z Rasijaj, chaj i biez pašpartnaha kantrolu. Bo, da prykładu, na ciahniki i aŭtobusy mižnarodnaha paviedamleńnia možna kupić kvitok tolki z pradjaŭleńniem pašparta. Atrymlivajecca, što jamu treba było pierasoŭvacca na aŭtamabili, pry hetym pažadana było mieć kampańjona: u kiroŭcy supracoŭniki Dziaržaŭtainśpiekcyi mahli pravieryć dakumienty. Aściarožnaść treba było prajaŭlać i na terytoryi Rasii, bo tudy była nakiravana infarmacyja ab vyšuku Hienadzia Chaćko. Zrešty, sa źjaŭleńniem byłoha načalnika abłasnoj milicyi ščaśliva raźviejalisia šmatlikija čutki. Adna ź jakich: nibyta hienierał, chavajučysia ad kryminalnaha pieraśledu, źjechaŭ za miažu da dački. Mifam apynułasia i strašnaja historyja, pavodle jakoj u Viciebskaj vobłaści byŭ znojdzieny miortvy mužčyna vielmi padobny na byłoha kiraŭnika abłasnoha UUS.
Čym skončycca rasśledavańnie ŭ dačynieńni da hienierał-majora Hienadzia Chaćko, pakaža čas. «Viačorka» budzie sačyć za raźvićciom padziej.
Daśje
Chaćko Hienadź Jaŭhienavič. Naradziŭsia 29 žniŭnia 1957 hoda ŭ vioscy Kaŭpaki Hrodzienskaha rajona. Skončyŭ śpiecyjalnuju siaredniuju škołu milicyi im. M. Frunzie MUS SSSR i Hrodzienski dziaržuniviersitet im. Ja. Kupały. Słužbu ŭ orhanach pačynaŭ milicyjantam centralizavanaj achovy motaŭzvoda načnoj milicyi dyvizijona Hrodzienskaha rajadździeła milicyi. Zatym prajšoŭ šlach ad ŭčastkovaha da načalnika Kastryčnickaha RAUS Hrodna. Z 2005 pa 2009-y hod uznačalvaŭ milicyju vobłaści.
Ź intervju haziecie «Viečiernij Hrodno» ad 28 lutaha 2007 hoda.
Jaki pracent davieru da supracoŭnikaŭ UUS?
— Bolš za 30% hramadzian całkam daviarajuć milicyi. Heta narmalna. My nie artysty i nie spartsmieny, kab usim padabacca.
Čym adroźnivajecca supracoŭnik milicyi siońnia ad kalehi, jaki pracavaŭ 20-30 hadoŭ nazad?
— Siońnia ŭ milicyi vyšejšy intelekt. Milicyjanty bolš adkaznyja, nie bajacca prymać rašeńni i adkazvać za ich. Raniej takich było niašmat, ale tady ludzi byli psichałahična bolš ustojlivyja.
Vaša žonka dla vas — siabar?
— Adnadumca. Časam jana apošniaj daviedajecca pra niejkija padziei ź ŚMI.
Jak zdymajecie stres?
— Pryroda, łaźnia. Da niadaŭniaha času biehaŭ. Zaraz chadžu pieššu.
