30 kastryčnika pačaŭsia sud nad Źmitrom Daškievičam: jaho vinavaciać u dziejnaści ad imia niezarehistravanaj arhanizacyi «Małady Front»...
Sud nad Daškievičam
30 kastryčnika pačaŭsia sud nad Źmitrom Daškievičam: jaho vinavaciać u dziejnaści ad imia niezarehistravanaj arhanizacyi «Małady Front». 31 kastryčnika zatrymali moładzievych aktyvistaŭ Ivana j Illu Šyłu z Salihorsku, jakija pryjechali padtrymać viaźnia. Chłopcy, adnak, zdoleli vyrvacca.
Haładoŭki
25 kastryčnika pastaru pratestanckaj carkvy «Novaje žyćcio» Viačasłavu Hančarenku Vyšejšy haspadarčy sud pryhraziŭ štrafam u 200 bazavych vieličyniaŭ za admovu pakinuć pamiaškańnie. 26 kastryčnika žonki haładoŭnikaŭ sprabavali prajści na pryjom da mienskaha mera Michaiła Paŭłava, ale ich nie puściła achova harvykankamu. Śviatłanu Mackievič zatrymali j abvinavacili ŭ niepadparadkavańni supracoŭnikam milicyi. 27 kastryčnika jaje aštrafavali na 5 b.v. 28 kastryčnika haładoŭniki prypynili akcyju pratestu: im pryjšoŭ list, što staršynia Vyšejšaha haspadarčaha sudu apratestavaŭ raniejšaje rašeńnie pra kanfiskacyju majomaści.
30 kastryčnika spynili haładoŭku prafsajuznyja aktyvisty na zavodzie «Biełšyna» ŭ Babrujsku: mužčyny spasłalisia na toje, što źniasileli j nia mohuć vykonvać svaju pracu. Akcyju pratestu vyrašyła praciahvać tolki Alena Zachožaja.
23 kastryčnika: svaboda schodaŭ
Siarhiej Hoŭša, Viktar Syryca, Viktar Miaziak atrymali admoŭny adkaz z sudu Baranavičaŭ: jany abskardžvali, što harvykankam admoviŭ im u dazvole na mitynh na 10 vieraśnia. Razam z tym sud vynies pryvatnaje aznačeńnie na adras harvykankamu za toje, što ich adkaz zajaŭnikam byŭ niapoŭnym i naležnym čynam nie abhruntavany.
24 kastryčnika: Karnijenku nie vypuskajuć
Viktar Karnijenka padaŭ skarhu ŭ Čyhunačny rajadździeł milicyi Homielu: jamu admaŭlajucca davać dazvoł na časovyja vyjezdy za miažu.
U viciebskuju abłasnuju biblijateku na sustreču ź litaratarami nie puścili raspaŭsiudnika niedziaržaŭnaj presy Barysa Chamajdu.
U Śvietłahorsku milicyjanty j vajenkamat turbujuć baćkoŭ moładzievaha aktyvista Michaiła Naskova, jaki navučajecca za miažoj paśla viesnavych akcyjaŭ pratestu: chłopca šukajuć, kab pryjšoŭ na vajskovuju kamisiju.
25 kastryčnika: ździek z presy
Maci aktyvista Partyi BNF Ściapana Śvidzierskaha, jaki navučajecca pa prahramie Kalinoŭskaha ŭ Hdańsku, atrymała aficyjnaje patrabavańnie spłacić 65 tys.rub.: hetyja hrošy jon by atrymaŭ, kali b pajechaŭ na letniuju praktyku.
Stała viadoma, što aktyvistaŭ «Moładzi BNF» biez tłumačeńnia pryčynaŭ vyhnali z kaviarni «Supe Džekpot» kala siadziby BNF: aktyvisty ŭ pustym pamiaškańni mielisia abmierkavać svaje spravy. Paskardziŭšysia kiraŭnictvu ŭstanovy, jany atrymali piśmovy adkaz, što kaviarnia aranduje pamiaškańnie hałoŭnaha haspadarčaha kiraŭnictva spravaŭ prezydenta, a moładź miełasia atrymać vyhadu z svajoj dziejnaści ŭ kaviarni.
Uładalniku pryvatnaj kramy ŭ Słonimie ŭ rajvykankamie pastavili ŭltymatum: jon spynić prodaž niedziaržaŭnaj «Haziety Słonimskaj» albo jamu skasujuć damovu na arendu pamiaškańnia.
26 kastryčnika: zvalnieńnie i nahaniaj
U studentki žurfaka BDU Dašy Rumiancavaj kiraŭnictva fakultetu ŭziało padpisku, što jana nie pakinie miežaŭ Biełarusi biez dazvołu dekana fakultetu j Ministerstva adukacyi: da hetaha dziaŭčyna źjeździła ŭ Varšavu na treninh dla žurnalistaŭ.
Aktyvista BSDP(H) Ihara Barysava zvolnili z zavodu «Mahiloŭliftmaš», pierapyniŭšy pracoŭny kantrakt «z zhody bakoŭ».
27 kastryčnika: aryšt pikietoŭca
Barysaŭskaha žurnalista Alesia Abramoviča asudzili na 15 sutak aryštu za niesankcyjavany pikiet: napiaredadni jon vyjšaŭ da budynku Administracyi prezydenta ź plakatam «Svabodu Kazulinu i inšym palitviaźniam». Razam ź im zatrymali žurnalistak Halinu Abakunčyk i Ksieniju Alimavu, ale ich nieŭzabavie adpuścili.
U Śvietłahorsku kamisija dziaržaŭnaha industryjalnaha technikumu pastanaviła adličyć moładzievaha aktyvista Sieržuka Huminskaha za «parušeńnie praviłaŭ ustanovy j šmatlikija propuski». Kiraŭnik praktyki, jakuju prachodzić chłopiec, prapanavaŭ pravieści adpracoŭki, ale kamisija admoviłasia.
28 kastryčnika: kanfiskacyi zbroi
U haradzienskaha pravaabaroncy Viktara Sazonava kanfiskavali palaŭničuju zbroju, spasłaŭšysia na parušeńnie, zroblenaje paŭtara hodu tamu. 31 kastryčnika zbroju skanfiskavali taksama ŭ hramadzkaha aktyvista Paŭła Lachnoviča ź Pinsku.
29 kastryčnika: pomsta milinkievičaŭcam za premiju Sacharava
U Horadni zatrymali žurnalista Andreja Kusielčuka, daradcu Alaksandra Milinkieviča: jaho abvinavacili ŭ drobnym chulihanstvie j 30 kastryčnika zasudzili na 3 sutak aryštu.
Tym časam haradzienskija milicyjanty sprabavali naładzić pieratrus u chacie Julii Kockaj, supracoŭnicy pres-słužby Milinkieviča: nibyta majuć syhnał, što z domu vyvoziać śpirt. Kockaj doma nie było, a jaje maci admoviłasia jechać i adčyniać milicyjantam chatu.
Aktyvistaŭ polskaj mienšyni Anžaliku Borys, Terezu Sielivončyk, Andžeja Lisoŭskaha zatrymali na pamiežnym pierachodzie na litoŭskaj miažy j abvinavacili ŭ pieravozie narkotykaŭ.
Kamientary