Siońnia kala 14 hadzinaŭ Alena Zachožaja była dastaŭlenaja ŭ pryjomny pakoj «Marzonaŭskaj» bolnicy Babrujsku paśla taho, jak straciła prytomnaść na pracoŭnym miescy. Na pracoŭnym miescy joj u paŭprytomnym stanie pry medykach byŭ uručany zahad pra pazbaŭleńnie jaje premijalnych na 100%.
Nahadajem, Alena Zachožaja haładaje na pracoŭnym miescy ad 3 kastryčnika. Jana patrabuje zarehistravać piarvičnuju arhanizacyju Biełaruskaha niezaležnaha prafsajuzu ŭ orhanach miascovaj ułady (dla hetaha nieabchodna, kab AAT «Biełšyna» dała piarvičcy jurydyčny adras, adnak najmalnik admaŭlajecca heta rabić), vypłacić členam BNP premii j dapłaty na azdaraŭleńnie, jakija ŭžo atrymali astatnija rabotniki pradpryjemstva.
Pra stan Aleny Zachožaj viadoma nastupnaje: vysoki cisk, tachikardyja, źmieny ŭ mijakardzie.
Miž tym, 31 kastryčnika ŭdzielnikaŭ haładoŭki pratestu na AAT «Biełšyna» aznajomili z zahadam ad 20 kastryčnika, pavodle jakoha niekatorym členam piarvičnaj arhanizacyi Niezaležnaha prafsajuzu rabotnikaŭ AAT «Biełšyna» ŭsio-taki musili vypłacić hrašovyja premii dy kampensacyi. Čamu nia ŭsim – tajamnica. U zahadzie pryčyna takoj vybaračnaści nie adlustravanaja. Adnak navat hety zahad nia byŭ vykanany. Pa-raniejšamu ihnarujecca asnoŭnaje patrabavańnie – dać jurydyčny adras dla prachodžańnia pierarehistracyi arhanizacyi ŭ orhanach ułady.
