Siońnia ŭ šviejcarskim Ciurychu vyrašałasia, dzie projdzie čempijanat śvietu pa futbole ŭ 2018 hodzie. Na jaho praviadzieńnia pretendavali vyklučna jeŭrapiejskija krainy — Anhlija, Rasija, Bielhija i Hałandyja (supolna), Ispanija i Partuhalija (supolna).
Zajaŭku Rasii pradstaŭlali futbalist Andrej Aršavin, a taksama słavutaja lohkaatletka Alena Isynbajeva. A ministr sportu Vital Mutko navat zahavaryŭ pa‑anhlijsku.
Favarytam u bukmiekieraŭ była zajaŭka Anhlii, ale na spravie vyjšła inakš.
Zep Błater abviaściŭ, što čempijanat śvietu praz vosiem hadoŭ prymie Rasija. A ŭ 2022 — Katar.
Premjer‑ministr Rasii Uładzimir Pucin źbirajecca vylecić u Ciurych, kab pryniać udzieł u śviatkavańni pieramohi.
Matčy buduć prachodzić
na stadyjonach Maskvy i Maskoŭskaj vobłaści, Vałhahrada, Jekacierynburha, Kazani, Kalininhrada, Krasnadara, Nižniaha Naŭharada, Sankt‑Pieciarburha, Rastova‑na‑Donie, Samary, Saranska, Sočy, Jarasłaŭla.
Samymi vialikimi minusami praviadzieńnia mundyjala ŭ Rasii nazyvalisia vialikija adlehłaści pamiž haradami, nie najlepšyja transpartnyja znosiny, mahčymaja niebiaśpieka. U plusach nazyvałasia adnaznačnaja dziaržaŭnaja padtrymka, a taksama nieachvota funkcyjanieraŭ FIFA davać čempijanat dźvium krainam adrazu.
Dla biełaruskim zaŭziataraŭ futbołu heta dobraja navina — Rasija nie daloki śviet. Šmat chto z našych amataraŭ futbołu zmoža pahladzieć na hulni mundyjala.
Nahadajem, što naleta ŭ susiednich krainach — Polščy i Ukrainie — adbudziecca čempijanat Jeŭropy pa futbole. A nastupny čempijanat śvietu projdzie ŭ Brazilii ŭ 2014 hodzie.
