Pucin: Biełaruskaje kiraŭnictva ŭziało ćviordy kurs na intehracyju z Rasijaj

Niahledziačy na ŭskładnieńni pamiž Maskvoj i Minskam, biełaruskaje kiraŭnictva ŭziało vyrazny kurs na intehracyju ŭ śfiery ekanomiki z Rasijaj, zajaviŭ prem'jer-ministr Uładzimir Pucin 16 śniežnia padčas pramoj linii z rasijanami.

«Havaryć pra toje, što Rasija pavodzić siabie niekarektna, — takaja pastanoŭka pytańnia nie maje pad saboj nijakich padstaŭ. Jak by ŭ nas ni składvalisia adnosiny ź biełaruskim kiraŭnictvam, a tam iskryć čas ad času, ale ja, naprykład, nikoli asabista nie dazvalaŭ sabie nijakich vypadaŭ u adras biełaruskaha kiraŭnictva», — cytuje Pucina RIA Novosti.

«Treba skazać pra heta ščyra: usio-taki biełaruskaje kiraŭnictva ŭziało vyrazny, ćviordy kurs na intehracyju ŭ śfiery ekanomiki z Rasijaj.

I, biezumoŭna, hety vybar zasłuhoŭvaje padtrymki i pavahi», — padkreśliŭ Pucin, adkazvajučy na pytańnie, čamu jamu nie padabajucca lubyja dziejańni kiraŭnictva Biełarusi.

Pavodle słoŭ premjera, u Rasii z «vielizarnaj pavahaj» staviacca da biełaruskaha naroda. «I ŭsio, što robicca Rasijaj na praciahu dziesiacihodździaŭ dla padtrymki ekanomiki, sacyjalnaj śfiery, robicca ŭ intaresach biełaruskaha naroda. A robicca šmat», — zajaviŭ Pucin.

Jon, u pryvatnaści, nahadaŭ: pastaŭlajučy enierhanośbity pa «nikčemnych cenach», Rasija subsidziravała ekanomiki vielmi mnohich respublik byłoha Savieckaha Sajuza, u tym liku Biełarusi, na miljardy dołaraŭ. «I heta nie pierabolšańnie», — pierakanany Pucin.

Rasijski premjer nahadaŭ pra niadaŭnija damoŭlenaści Minska i Maskvy ab tym, što Rasija pastavić u Biełaruś na praciahu 2011 hoda 20–21 młn. ton syroj nafty biez pošlin.

«Heta budzie kaštavać našamu biudžetu 5 miljardaŭ 300 miljonaŭ dołaraŭ.

My damovilisia, praŭda, ab tym, što ŭsio, što budzie vypracavana z hetaj nafty ŭ vyhladzie naftapraduktaŭ, nam biełaruski bok viernie stopracentna ŭ naš biudžet», — skazaŭ jon.

Raniej padčas pramoj linii Pucin taksama zajaviŭ, što Rasija štohod niedaatrymlivaje 3 młrd. dołaraŭ z-za biaspošlinnaj pastaŭki ŭ Biełaruś hazu.

Nahadajem, Rasija zajaviła pra hatoŭnaść admianić ekspartnyja pošliny na naftu dla Biełarusi 1 studzienia 2011 hoda, kali Minsk ratyfikuje ŭsie dakumienty pa stvareńni Adzinaj ekanamičnaj prastory (AEP). Pry hetym Biełaruś zhadziłasia pieraličvać Rasii ŭvieś abjom ekspartnych pošlin na naftapradukty, što źbirajucca na miažy Mytnaha sajuza.

9 śniežnia ŭ Maskvie Alaksandr Łukašenka paabiacaŭ da kanca hetaha hoda ratyfikavać usie dakumienty pa farmiravańni AEP.

• 0
• 0
• 0
• 0
• 0
• 0
• 0
• 0