Karespandent Intex-press naviedaŭ baćku byłoha kandydata ŭ prezidenty ŭ Baranavičach.
Viktar Statkievič.
Viktaru Paŭłaviču Statkieviču ŭ studzieni spoŭnicca 85 hadoŭ. Ruchajecca jon pavolna, vyhladaje vielmi słabym. Adkazvaŭ strymana i aściarožna i, padobna, nie zusim pavieryŭ, što razmaŭlaje z žurnalistam.
— Lepš spytać, što ŭ mianie nie chvoraje — na heta praściej adkazać. Amal ahłuch. Adno voka zusim nie bačyć, druhoje ledź-ledź... Na ŭliku ŭ ankałohii, jazva straŭnika. Šmat usiaho. Jašče ŭ junactvie na rasstreł vadzili, i voś žyvy zastaŭsia — baćka prykryŭ svaim ciełam. Nu, i ŭsio žyćcio takoje praklataje...
— A što vam viadoma pra Mikałaja, pra padziei ŭ Minsku?
— Viedaju ja i što tam było, vydatna viedaju, i vy heta vydatna viedajecie. Nie treba mianie ab hetym pytacca...
— Jak staviciesia da rašeńnia Mikałaja abviaścić haładoŭku?
— Ja prosta nie chaču adkazvać na hetyja pytańni. Vy ŭsio, usio vydatna sami viedajecie bieź mianie.
— Jak vy ličycie, čym skončycca ŭsio toje, što pačałosia 19-ha śniežnia?
— Ja jašče hod tamu nazad bajaŭsia hetaha. Tamu što vydatna viedaŭ, čym heta skončycca. A čym u nas moža skončycca inšym?..
— Vam chto-niebudź dapamahaje?
— Nu, vy ž viedajecie, što z synam...
— Akramia Mikałaja jość u vas chto-niebudź u Biełarusi?
— Nie, nikoha. Adzin jak voŭk.
Mikałaj Statkievič — adzin ź siami kandydataŭ u prezidenty, jakija prachodziać u jakaści padazravanych pa kryminalnaj spravie ab masavych biesparadkach u Minsku ŭviečary 19 śniežnia.
Pa dadzienych BiełaPAN, palityk, jaki znachodzicca ŭ SIZA KDB, abviaściŭ haładoŭku i admoviŭsia ad dačy pakazańniaŭ. Usiaho, pa dadzienych pravaabaroncaŭ, status padazravanych majuć 19 čałaviek.
19 i 20 śniežnia ŭ Minsku na vulicach i ŭ kvaterach było zatrymana bolš za 600 čałaviek.