Dziaržaŭnyja ŚMI rekłamujuć rentnyja adnosiny. Raniej starych ludziej prymali ŭ domach-internatach i nie zabirajučy ichnich kvater.
Pierad Novym hodam, padčas naviedvańnia doma-internata dla vieteranaŭ vajny i pracy «Śvitanak» Alaksandr Łukašenka adobryŭ stvareńnie novaj sacyjalnaj schiemy, tak zvanych rentnych adnosinaŭ ź dziaržavaj.
Rentnyja adnosiny isnavali ŭ Biełarusi i raniej. Samotnaja babula moža adpisać kvateru svajmu susiedu, a toj abaviažacca dahladać piensijanierku. A kali babuli nie stanie, atrymaje kvateru.
Zhodna z Hramadzianskim kodeksam, zaklučacca rentnaja damova moža tolki miž piensijanieram i fizičnymi asobami. Ciapier dziaržava vyrašyła fizasobaŭ zamianić saboj: uvieści manapoliju na zaklučeńnie rentnych adnosinaŭ. Dziaržaŭnyja ŚMI z ułaścivaj im badzioraściu rekłamujuć takoje nou-chau.
«Ścipłaja adnapakajovaja kvatera ŭ staličnym 9-paviarchoviku. Nizkija stoli i vuzkaja leśvičnaja kletka. Usio samaje darahoje za 75 hadoŭ žyćcia Taisija Vasiljeŭna zmahła źmiaścić na tryccaci troch kvadratnych mietrach. Vyjšaŭšy na piensiju, były inžynier zastałasia sam-nasam z ułasnaj žyłpłoščaj. Znajści vychad z žyllovaha stuparu dapamahli sacrabotniki: u abmien na staruju kvateru jany prapanavali sastarełaj žančynie pažyćciova hrašovuju dapamohu, a taksama mahčymaść pierajechać u pakoj u śpiecyjalnym internacie...», — taki repartaž pakazali na telekanale STV.
Jakija ž varyjanty choča prapanavać dziaržava?
Jak paviedamili ŭ Minharvykankamie, ich dva. Adzinokija piensijaniery žyvuć na svajoj kvatery, jakaja pierachodzić da dziaržavy tolki paśla ich śmierci. A da hetaha sacyjalnyja rabotniki pavinny dahladać piensijaniera, im budzie vypłačvacca hrašovaja dapamoha (u dadatak da piensii).
Albo druhi varyjant: sastareły čałaviek pierajazdžaje ŭ dom-internat, dzie jon zabiaśpiečvajecca ŭsim nieabchodnym. A kvatera ŭ hety čas moža zdavacca sa zhody ŭłaśnika. Hrošy ž buduć pastupać u biudžet krainy. I ŭ hetym vypadku tolki paśla śmierci piensijaniera kvatera piarojdzie da dziaržavy.
Zhodna sa zhadanym repartažam STV, z čatyroch tysiač apytanych piensijanieraŭ 600 hatovyja da takoha abmienu. Što rabić inšym, chto choča pierajechać u internat i pakinuć kvateru? Adkazu na hetaje pytańnie čynoŭniki nie zmahli dać. Dakumienty, jakija dazvalajuć dziaržavie siońnia pracavać pa takoj schiemie, jašče nie pryniatyja. Ministerstva pracy i sacyjalnaj abarony i Kamitet pa pracy, zaniataści i sacyjalnaj abaronie Minharvykankama tolki pieradali ich na razhlad va ŭrad. Ale raźličvajuć, što papraŭki ŭ zakanadaŭstvie zapracujuć užo sioleta.
Tolki ŭ Minsku pražyvaje dziesiać tysiač adzinokich piensijanieraŭ, jakija ŭ svajoj ułasnaści majuć žyllo. Na hetyja kvatery i pazirajuć ułady.
Ale ŭźnikaje dva pytańni.
Pa-pieršaje,
raniej starych ludziej prymali ŭ domach-internatach i nie zabirajučy ichnich kvater. Prosta vyličvali ŭ ich ź piensii hrošy na prakorm i dahlad.Niaŭžo «dziaržava dla naroda» tak raspanieła, što i hetaje apošniaje prava niamohłych choča zabrać, jak zabrali prava na biaspłatny prajezd? Miž tym adpaviednaha zakona nichto nie admianiaŭ.
Pa-druhoje, u tym i jość pryncyp dziaržavy, što my płacim padatki nie tolki na patreby siabie ci svajoj siamji, a na patreby ŬSIAHO hramadstva. Heta značyć, u roŭnaj stupieni abaronienymi pavinny być i tyja staryja ludzi, što zastalisia adzinokimi.
Biednaj Taisii Vasiljeŭnie, jakaja «zastałasia sam-nasam z ułasnaj žyłpłoščaj», ci patłumačać, što jana maje prava pierajechać u internat i nie achviarujučy kvateraj? A kvateru maje prava pakinuć tamu, z kim, moža, ciapier i nie ładzić, chto, moža, ciapier i daloka, ale chto budzie hladzieć jaje mahiłu i stavić śviečki za jaje dušu. I dla hetaha zusim nie abaviazkova svaimi hrašyma spansiravać śpiecnaz i błandzinak z STV.
* * *
Zhodna z Zakonam «Ab piensijnym zabieśpiačeńni», piensijaniery, jakija pražyvajuć na poŭnym dziaržaŭnym zabieśpiačeńni ŭ domie-internacie, štomiesiac atrymlivajuć 10% pryznačanaj piensii, ale nie mienš za 20% minimalnaj piensii pa ŭzroście (63970 rub.).