Pra heta Chośni Mubarak abjaviŭ u zvarocie da naroda pa dziaržaŭnym telebačańni. Demanstranty sustreli hetyja słovy chvalaj abureńnia. Ludzi nie razychodziacca z płoščy Tachryr.
Chośni Mubarak začytvaje zvarot da nacyi.
Płošča Tachryr, Kair, 10 lutaha 2011. Fota JERA.
«Ja hanarusia narodam Jehipta», — pačaŭ prezident krainy svoj vystup. Mubarak pryznaŭ prava naroda na pratest i paprasiŭ prabačeńnia ŭ siemjaŭ zahinułych. Pry hetym jon padkreśliŭ, što nie paddasca na cisk zvonku. Prezident Jehipta zajaviŭ, što nie źbirajecca bałatavacca na bližejšych prezidenckich vybarach, ale budzie kiravać krainaŭ na praciahu pierachodnaha pieryjadu. Častku svaich paŭnamoctvaŭ da vieraśnia jon pieradaje vice-prezidentu Amanu Sulejnamu. Budzie admienieny zakon ab vajskovym stanoviščy.
Jon paabiacaŭ pakarać usich adkaznych za žorstki razhon demanstracyj i hibiel ludziej. Mubarak havaryŭ pra nieabchodnaść źmienaŭ vybarčaha zakanadaŭstva i kanstytucyi krainy. Heta nieabchodna dla taho, kab zabiaśpiečyć prazrystaść parłamienckich i prezidenckich vybaraŭ, jakija majuć adbycca ŭ hetym hodzie.
Mubarak paŭtaryŭ, što nie źbirajecca pakidać krainu i choča pamierci na svajoj ziamli. Jon padkreśliŭ, što Jehipiet vyšej čałaviečych ambicyj.
Demanstranty sustreli słovy Mubaraka chvalaj abureńnia. Ludzi nie razychodziacca z płoščy Tachryr. Jany skandujuć łozunhi: «Mubarak, sychodź!» Telekanał «Euronews» paviedamlaje pra nievialikija sutyčki ŭ natoŭpie pamiž praciŭnikami i prychilnikami režymu Mubaraka.
Uśled za Mubarakam z telezvarotam vystupiŭ vice-prezident Aman Sulejman. Jon zaklikaŭ ludziej razyścisia pa damach.«Prezident daručyŭ mnie ŭziać na siabie ŭsiu adkaznaść za stabilnaść u krainie. Kab nie dapuścić hvałtu i viarnucca da narmalnaha žyćcia», — zajaviŭ jon.
Aman Sulejman zaklikaŭ jehipcian zrabić svoj uniosak u hetu spravu. Jon paabiacaŭ zrabić usio mahčymaje, kab zabiaśpiečyć mirnuju pieradaču ŭłady, zajaviŭšy, što ŭsio nieabchodnaje dla hetaha jość. Vice-prezident zaklikaŭ moładź Jehipta razychodzicca i pačać pracavać.
«Vaša praca patrebna krainie. Nie słuchajcie spadarožnikavaje telebačańnie, jano choča pasiejać miž nami varažnieču. Słuchajcie svajo serca».
Amar Sulejman zajaviŭ, što mirnaja pieradača ŭłady pavinna hruntvacca na pavazie da kanstytucyi, ali i adnačasova na pavazie da patrabavańniaŭ hramadzianaŭ.
Sotni tysiač jehipcian u čaćvier vyjšli na vulicy Kaira ŭ čakańni zvarotu prezidenta Mubaraka da narodu. Z roznych krynicaŭ, u tym liku z-za miažy, pastupała infarmacyja pra toje, što Mubarak siońnia moža padać u adstaŭku.Pra mahčymy sychod zajaviŭ premjer-ministr Jehipta Achmiet Šafik. U svaju čarhu, ministr infarmacyi Anas al-Fiki abviarhaŭ hetyja słovy, a taksama paviedamleńni presy, nazvajučy ich čutkami. Pa jaho słovach, u svaim pasłańni Chośni Mubarak nie budzie adrakacca ad svajoj pasady.
Jehipieckija vajskoŭcy aficyjna pryznali prava naroda na pratest, ale pry hetym padkreślili, što buduć vymušanyja razahnać akcyju pratestu, kali demanstranty nie pryznajuć pieradaču ŭłady ad Mubaraka da vice-prezidenta Amara Sulejmana. Taki varyjant źmieny ŭłady ŭ Jehipcie, jak adzin z samych vierahodnych, ahučyli ŚMI. Kiraŭnictva zabaronienaj partyi «Braty-musulmanie» zahadzia nazvała taki varyjant putčam.
Šmattysiačnyja akcyi pratestu ŭ Jehipcie tryvajuć 17-y dzień. U sutyčkach z palicyjaj i prychilnikami Mubaraka zahinuła kala 300 čałaviek, tysiačy byli paranienyja. Kraina paniesła vielizarnyja ekanamičnyja straty: kožny dzień demanstracyj aceńvajucca pryblizna ŭ 310 miljonaŭ dalaraŭ.
Da pratestoŭcaŭ dałučylisia vykładčyki ŭniviersitetaŭ, miedyki, sudździ, supracoŭniki Sueckaha kanała, dziaržsłužboŭcy.
***
Daviedka «Radyjo Svaboda»
Chośni Mubarak – ehipiecki vajskovy, palityčny i dziaržaŭny dziejač, prezydent Ehiptu ŭ 1981-2011.
Mubarak naradziŭsia ŭ 1928 h. u małoj vioscy ŭ delcie Niłu. U 1949-1974 hh. jon słužyŭ u armii, u jakoj dajšoŭ da pasadaŭ kamandujučaha vajskova-pavietranymi siłami i namieśnika ministra abarony krainy. U 1959-1960 i 1964-1965 hh. Mubarak abučaŭsia ŭ SSSR, u tym liku ŭ Vajskovaj akademii imia Frunze ŭ Maskvie.
U 1975 h. prezydent Ehiptu Anvar Sadat naznačyŭ Mubaraka vice-prezydentam krainy. Kali Sadat byŭ zabity isłamistami padčas vajskovaha paradu 6 kastryčnika 1981 h., Mubarak staŭ prezydentam i ŭvioŭ u krainie nadzvyčajnaje stanovišča.
Prezydent Mubarak byŭ pieraabrany bolšaściu hałasoŭ na referendumach u 1987, 1993 i 1999 hadach. Hałasavańnie prachodziła pa adzinaj kandydatury. Nieabchodnaść referendumaŭ abhruntoŭvałasia zachavańniem nadzvyčajnaha stanovišča ŭ krainie, vyklikanaha abvastreńniem isłamskaj prablemy.
26 vieraśnia 1999 h. u Ehipcie prajšoŭ referendum ab padaŭžeńni na šeść hadoŭ prezydenckich paŭnamoctvaŭ Mubaraka, pa vynikach jakoha jon zachavaŭ pasadu prezydenta, atrymaŭšy padtrymku ŭ 93,79% hałasoŭ.
U 2005 hodzie byli pryniatyja papraŭki da Kanstytucyi, dziakujučy jakim partyi atrymali prava vyłučać svaich kandydataŭ na pasadu prezydenta. Pieršyja vybary pa novaj systemie prajšli 7 vieraśnia 2005 hoda. Jak i čakałasia, Mubarak atrymaŭ pieramohu. Zakonnaść hetych vybaraŭ stavicca pad sumnieŭ, pakolki było zafiksavana mnostva parušeńniaŭ.
29 studzienia 2011 h., piać dzion paśla pačatku vuličnych pratestaŭ suprać svajho kiraŭnictva, Mubarak naznačyŭ vice-prezydentam Amara Sulejmana, jaki da taho času byŭ šefam ehipieckaj specsłužby.
