Pa najhoršamu varyjantu raźvićcia situacyi ŭ Biełarusi prahnazujecca padtapleńnie pavodkavymi vodami nasielenych punktaŭ i terytoryj u 50 rajonach krainy,paviedamili ŭ pres-słužbie MNS.
Pavodle prahnozaŭ, čakajecca, što mohuć być padtopleny 4 rajony Bresckaj vobłaści, 10 - Viciebskaj, 15 - Homielskaj, pa 6 - Hrodzienskaj i Minskaj, 9 - Mahiloŭskaj. Najbolš vysokaja vierahodnaść padtapleńniaŭ u basiejnach rek Prypiać, Sož, Zachodniaja Dźvina, Nioman, Dniapro, Biarezina, a taksama Dzisna, Drysa, Uła, Pronia, Zachodni Buh, Ipuć i Vilija.
Hatoŭnaść halinovych i terytaryjalnych padsistem dziaržaŭnaj sistemy papiaredžańnia i likvidacyi nadzvyčajnych situacyj da reahavańnia na niehatyŭnyja nastupstvy viasieńniaj pavodki była adnoj z klučavych tem na pasiadžeńni Kamisii pa nadzvyčajnych situacyjach pry Saviecie Ministraŭ, jakoje prajšło 11 sakavika pad kiraŭnictvam vice-premjera Anatola Kalinina.
Pa vynikach pasiadžeńnia dadzieny daručeńni šerahu arhanizacyj. Tak, abłvykankamy, Biełkaapsajuz, Minhandal, Ministerstva achovy zdaroŭja, Minenierha sumiesna z zacikaŭlenymi pavinny da 20 sakavika zaviaršyć padrychtoŭčyja mierapryjemstvy dla zabieśpiačeńnia bieśpierabojnaj dastaŭki ŭ rajony, dzie moža być padtapleńnie, praduktaŭ charčavańnia, pitnoj vady, miedykamientaŭ i pradmietaŭ pieršaj nieabchodnaści, a taksama elektraenierhii.
Minžyłkamunhasu sumiesna z abłvykankamami, Minskim harvykankamam i inšymi zacikaŭlenym da 20 sakavika treba ŭmacavać vodazabornyja śvidraviny i luki kałodziežaŭ kanalizacyi, damby hlejevych placovak i paloŭ filtracyi, uzhadnić miescy zaboru piasku i stvaryć zapasy kamieniu, ščebieniu, mieškatary.
Departamient pa hidramietearałohii budzie kožnyja sutki kantralavać i analizavać mietearałahičnuju i hidrałahičnuju situacyju. Departamient pa mielijaracyi i vodnaj haspadarcy budzie pravodzić abśledavańni i kantrolnaje nivieliravańnie ziemlanych płacin i dambaŭ vadaschoviščaŭ, sažałak, abjektaŭ procipavodkavaj abarony i svoječasova vyjaŭlać miescy zatoraŭ dla praviadzieńnia vybuchovych rabot.