Lider abjadnanych demakratyčnych siłaŭ Biełarusi inicyjavaŭ vyłučeńnie Alaksandra Kazulina na prestyžnuju premiju Marcina Enałsa, pieršaha Hienieralnaha sakratara Amnesty International.
Premija Marcina Enałsa źjaŭlajecca adnoj z hałoŭnych uznaharodaŭ ruchu za pravy čałavieka. Jaje łaŭreatami stanoviacca ludzi, jakija źjaŭlajucca «simvałami baraćby za pravy čałavieka ŭ krainach, dzie abarona pravoŭ čałavieka i demakratyi pradstaŭlaje saboj niebiaśpiečny vid dziejnaści».
«Mužnaść i rašučaść Alaksandra Kazulina ŭ baraćbie za svaje pravy vyklikaje zachapleńnie. Jaho haładoŭka siońnia źjaŭlajecca simvałam imknieńnia ŭsich biełarusaŭ žyć u svabodnaj demakratyčnaj krainie. Pra jaje pavinien viedać uvieś śviet. Heta ŭznaharoda, pierš za ŭsio, stanie mahutnym mižnarodnym patrabavańniem da režyma ŭ Biełarusi – pačać vyzvaleńnie palitźniavolenych», – adznačyŭ Alaksandr Milinkievič.
Premija Marcina Enałsa źjaŭlajecca ŭnikalnaj supolnaj akcyjaj adzinaccaci viadučych nieŭradavych pravaabarončych arhanizacyj śvietu. U skład žury Premii ŭvachodziać pradstaŭniki «Mižnarodnaj amnistyi» (Amnesty International), «Chjuman Rajts Votč» (Human Rights Watch), «Chjuman Rajts Ferst» (Human Rights First), Mižnarodnaj fiederacyi pravoŭ čałavieka, Suśvietnaj arhanizacyi suprać katavańniaŭ, «Frant łajn» (Front Line), Mižnarodnaj kamisii jurystaŭ, «Dyjakoni-Hiermanija» (German Diakonie), Mižnarodnaj słužby pravoŭ čałavieka (International Service for Human Rights), «Internešnł Alert» (International Alert ) i arhanizacyi «Sistemy infarmacyi i dakumientacyi pa pravach čałavieka» (HURIDOCS).
U 2006 hodu łaŭreatami premii byli nazvanyja iranski žurnalist Akbar Hiandžy i juryst i adnačasova radyjokamientatar ź Zimbabve Arnold Cunha . Raniej Premijaj Marcina Enałsa byli ŭhanaravanyja: Achtam Naiss, Siryja (2005), Lidzija Jusupava, Rasija (2004), Aliryjo Urybie Muńos, Kałumbija (2003), Žaklin Mudiejna, Čad (2002), arhanizacyja «Pis Bryhiejdz Internešnł» (2001), Imakule Birachieka, Demakratyčnaja Respublika Konha (2000), Nataša Kandzič, Juhasłavija (1999), Ejad El Sarradž, Palestyna (1998), Samuel Ruiz Harsija, Mieksika (1997), Klemient Nvanko, Nihieryja (1996), Asma Džanhir, Pakistan (1995), Chary Vu, Kitaj (1994).
