U mianie jość svaja fokus-hrupa. Heta zaŭsiodniki spartovaha kompleksu na mienskaj uskrainie, dzie aŭtar hetych radkoŭ štoranicu trochi zmahajecca sa svaim paŭsonnym arhanizmam za zdarovy ład žyćcia :)
U piarestaj kampanii prychilnikaŭ fizyčnaje kultury — i navukoviec, i pałkoŭnik milicyi, i ŭčorašni vajskovy avijatar, i były namieśnik dyrektara vučelni, i biespracoŭny... Čym nia zrez hramadztva?
U pierapynkach miž praktykavańniami, sapučy, publika dyskutuje na palityčnyja temy.
Darečy, tut ja praviaraju tezy budučych artykułaŭ raniej, čym na ich nakinucca naviedniki błohu :)
A mierkavańni ŭ majoj fokus-hrupie niaredka palarnyja.
Pavał Ivanavič — pensyjaner, usio žyćcio adbarabaniŭ na budoŭli. Tych, što siadziać pa ŭstanovach, a nia robiać fizyčna, ličyć zbolšaha darmajedami. Zatoje za "baćku" — haroj.
Raniej uvieś čas davodziŭ: biez Rasiei my nichto! Chvaliŭ ajčynnaje kiraŭnictva za stabilnyja i adnosna niebłahija pensii.
Apošnim ža časam panehirykaŭ nie čutno. Uzdychaje: jak stanie pražyć na tuju pensiju paśla Novaha hodu?
Pakazalna, što zapeŭnivańniam dziaržaŭnych medyjaŭ Pavał Ivanavič nia vieryć ni kaliva. Upeŭnieny, što z padaražeńniem hazu košty siahnuć uhoru, jak šalonyja.
Siońnia, daviedaŭšysia ad mianie pra naviny ŭ dačynieńniach z Maskvoju, były budaŭnik z praletarskaj ščyraściu zajaviŭ, što pradavać "Biełtranshaz" ni ŭ jakim razie nielha.
— Svajo — heta svajo! — afarystyčna patłumačyŭ pensyjaner-fizkulturnik.
A na raźvitańnie daŭ nakaz: jak maha čychvości henych imperyjalistaŭ u svaich artykułach!
Samaje pikantnaje, što šanoŭny Pavał Ivanavič — rodam z Rasiei (nie adnojčy z honaram padkreślivaŭ).
Takaja ŭražalnaja evalucyja pradstaŭnika "ćviordaha elektaratu" našturchnuła na dumku: mo' niekali Mileru jašče naš orden daduć?
Za ŭniosak u spravu vychavańnia nacyjanalnaj samaśviadomaści :)
