Były načalnik Upraŭleńnia pa rasśledavańni złačynstvaŭ Departamienta finansavych rasśledavańniaŭ KDK nie pryznaŭ u sudzie svajoj viny i zajaviŭ, što nie moža adkazvać za ludziej, jakija jaho atačajuć, a sam jon ničoha niezakonnaha nie ŭčyniaŭ.
Pa słovach Dźmitryja Adamoviča, abvinavačanaha ciapier byłoha hałoŭnaha finansavaha śledčaha Biełarusi, ni śviedki, ni sami paciarpiełyja nie pryznalisia, što jon ich da čahości schilaŭ ci ŭdzielničaŭ u pieramovach adnosna chabaru. Mienavita tamu, pavodle śćvierdžańnia Dźmitryja Adamoviča, abvinavačańnie suprać jaho niasłušnaje.
Padpałkoŭniku Dźmitryju Adamoviču inkryminujecca ŭčynieńnie złačynstvaŭ pa č. 1 art. 13, č. 2 art. 424 (padrychtoŭka da złoŭžyvańnia słužbovym stanoviščam abo słužbovymi paŭnamoctvami), č. 3 art. 425 (biaździejnaść słužbovaj asoby) Kryminalnaha kodeksa Biełarusi.
Na dumku abvinavačańnia, hałoŭny finansavy śledčy krainy udzielničaŭ u niezakonnym spynieńni kryminalnaha pieraśledu dvuch biznesoŭcaŭ. Hetuju pasłuhu jon nibyta akazvaŭ svajoj znajomaj, načalniku Upraŭleńnia pradprymalnictva i licenzavańnia kamiteta ekanomiki Minabłvykankama Irynie Iljukievič, jakaja abvinavačvajecca va ŭčynieńni złačynstvaŭ pa č. 5 art. 16, č. 2 art. 431 (padbuchtorvańnie da davańnia chabaru), č. 4 art. 209 (machlarstva), č.1 art. 13, č. 3 art. 424 (padrychtoŭka da złoŭžyvańnia ŭładaj abo słužbovymi paŭnamoctvami), č. 1 art. 14, č. 4 ar. 209 (sproba machlarstva).
Pavodle vysnovaŭ śledstva, Iljukievič uziała z dvuch biznesoŭcaŭ 50 tysiač dalaraŭ za toje. kab stanoŭča vyrašyć pytańnie z padatkovaj pravierkaj i nie raspačynać pa jaje vynikach kryminalnaj spravy. Nibyta Adamovič dapamahaŭ Iljukievič vyrašać pytańni pa siabroŭstvie, raźličvajučy ź jaje boku na anałahičnaje rašeńnie pytańniaŭ ź jaho
