U minskim mietro adbyŭsia vybuch. Pa papiarednich dadzienych, jon prahrymieŭ kala eskałataraŭ na stancyi «Kastryčnickaja», raźmieščanaj u samym centry biełaruskaj stalicy. Achviarami, pa roznych dadzienych, stali nie mienš za piać čałaviek, jašče bolš za 20 atrymali ranieńni. Naziralniki nie sumniajucca, što havorka idzie pra terakt i źviazvajuć jaho ź ciapierašniaj palityčnaj i ekanamičnaj abstanoŭkaj u respublicy, piša Hazieta.ru.
Pakul aficyjnych viersij zdareńnia biełaruskija ŭłady nie dajuć. Zrešty, sami minčanie ŭžo pačali budavać ułasnyja teoryi adnosna taho, što adbyłosia, piša Hazieta.ru. «Navat na miescy zdareńnia raziavaki kazali, što heta moža być źviazana ź ciapierašniaj našaj hrašovaj situacyjaj. Pačałasia, adnym słovam, kanśpirałohija», — cytuje vydańnie žychara Minska Maksima.
«Paśla 19 śniežnia napružańnie nie ścichaje, a tolki narastaje, praciahvajecca cisk na ludziej. Tamu nie vyklučana, što chtości pajšoŭ na hety žest adčaju, — ličyć dacent kafiedry palityčnaj teoryi MDIMA Kirył Koktyš. — Ale nielha vyklučać i taho, što jon byŭ zładžany dla taho, kab jašče bolš zakrucić hajki, tamu što ciapier u Biełarusi ciažkaja situacyja, charčovy i valutny kryzis, i ludzi niezadavolenyja».
