Bilt pieraściaroh Łukašenku ad vykarystańnia teraktu dla cisku na apazicyju
Heta budzie abaviazkova zaŭvažana na Zachadzie, kaža kiraŭnik šviedskaha MZS.
Ministr zamiežnych spraŭ Šviecyi Karł Bilt vykazaŭ zakłapočanaść tym, što biełaruskija ŭłady mohuć «paviesić» vybuchi ŭ minskim mietro na pradstaŭnikoŭ Zachadu ŭ prapahandysckich metach.
«[Łukašenka] kaža, što aryštavaŭ hetych ludziej, i viedaje, chto jany, tak što možna čakać, što jon vykažacca pa hetych pytańniach u najbližejšy čas, - skazaŭ Bilt 14 krasavika ŭ Bierlinie ŭ intervju bruselskamu sajtu EUobserver. - Ale my možam aścierahacca horšaha».
Karł Bilt adznačyŭ, što paśla padziej 19 śniežnia Łukašenka abvinavaciŭ Niamieččynu i Polšču ŭ finansavańni apazicyi, jakaja nibyta na hetyja hrošy płanavała dziaržaŭny pieravarot.
Šviedski ministr pieraściaroh Łukašenku ad vykarystańnia teraktu ŭ minskim mietro dla dalejšaha cisku na palityčnych apanientaŭ.
Karł Bilt nazvaŭ «drennym znakam» ahresiŭny ton Łukašenki ŭ televizijnym vystupie 13 krasavika.
Na naradzie 13 krasavika Łukašenka, nahadajem, adznačyŭ, što saŭdzielniki i zamoŭcy teraktu ŭ mietro ŭsio jašče adšukvajucca. «Moža być, hetyja tak zvanyja palityki ad piataj kałony nam raskryjuć karty i pakažuć, chto ž zamoviŭ? Moža, chtości i z ułady? Usich dapytać. U miežach kryminalnaj spravy ŭsich pryciahnuć i dapytać, nie zvažajučy ni na jakuju demakratyju i vyćcio i stohny zamiežnych pakutnikaŭ», - skazaŭ aficyjny biełaruski lidar.
«Jon vielmi pahardlivy da Zachadu, da pravoŭ čałavieka, da apazicyi. Stvarajecca ŭražańnie, što jon usprymaje vybuch jak padstavu dla dalejšych represijaŭ,- ličyć Karł Bilt. - Isnuje novy ŭzrovień strachu [siarod aktyvistaŭ apazicyi ŭ Biełarusi], što davoli naturalna, kali jany čujuć hetuju rytoryku Łukašenki. Jany aścierahajucca, što heta moža ŭvachodzić u jaho namiery».
«
Z zdareńniami takoha rodu [terakt u mietro] varta pastupać u adpaviednaści ź viaršenstvam zakona. Stvarać atmaśfieru zapałochvańnia i strachu - nie sposab kiravać krainaj, navat nie sposab spraŭlacca z terarystyčnymi pahrozami.Jon pavinien viedać, što my budziem nazirać. Kali jon vykarystoŭvaje heta jak padstavu dla dalejšaj aktyvizacyi represijaŭ, heta budzie abaviazkova zaŭvažana», - zajaviŭ šviedski ministr.
Ciapier čytajuć
Šeść faktaŭ pra Andreja Švieda — byłoha hienprakurora, jaki ciapier staŭ staršynioj Viarchoŭnaha suda4
Kamientary