Demanstrujecca kankretny prykład inšym universitetam Biełarusi, biznes-kiejs, kali chočacie. Dziejničajcie jak prafesijanały, prapanujcie aktualnyja adukacyjnyja prahramy, nie zakryvajciesia ad śvietu, i ŭ ramkach stratehii raźvićcia sistem adukacyi bałtyjskaha rehijonu amal lubaja ustanova biełaruskaj sistemy adukacyi moža atrymać hrošy i padtrymku.
Kali EZ pradstaviŭ svaju «stratehiju narmalizacyi Biełarusi», to analityki apisali hety dakument jak utapičny, bo jon prapanuje stratehiju pastupovaha demantaža sučasnaj post-BSSRaŭskaj ekanamičnaj i palityčnaj sistemy RB.
Prapanovy spynić palityčny pieraśled i abiacańnie adkryć eŭrapiejskija rynki biełaruskim tavaram buduć mieć sens tolki dla hipatetyčnaha demakratyčnaha ŭradu i ŭ inšaj ekanamičnaj sistemie. Biełaruskaja małaefiektyŭnaja ekanomika niazdolnaja skarystacca z handlovych ilhotaŭ, bo vialikaja častka našaha eksparta ŭsio ž nie adpaviadaje eŭrastandartam. Tupik dla abodvuch bakoŭ.
Ale boh ź im, ź ciapierašnim kiraŭnictvam RB. Jano moža ihnaravać prapanovy i mahčymaści, bo pavodzić siabie jak drobny savieckaj čynoŭnik pensijnaha ŭzrostu - našto niešta madernizavać, kali siońnia-zaŭtra na pensiju?
Eŭropa tym časam dakazvaje, što moža realna dapamahčy biełaruskim strukturam, jakija nie zaražanyja hetym pieradpensijnym marazmam: Rada Ministraŭ krain paŭnočnaj Eŭropy (Nordic Council of Ministers) padtrymlivajuć 11 bakalaŭrskich i mahistarskich prahram, jakija prapanuje Eŭrapiejski Humanitarny Universitet: suma 4.5 młn eŭra vydatkavanaja na finansavańnie samaho Ŭniversiteta i stypiendyi studentaŭ.
Rada ministraŭ paŭnočnaj Eŭropy ličać padtrymku demakratyi ŭ našaj krainie praz ustanovy adukacyi i NDA adnym z elemientaŭ svajoj stratehii ŭ dačynieńni da Biełarusi, pryčym u hetym jany supracoŭničajuć z Eŭrapiejskaj Kamisijaj, - pra heta zajaviŭ kiraŭnik Rady Pier Unkiel na kanferencyi 12ha śniežnia ŭ Vilni. Pier Unkiel dadaŭ, što hanarycca hetym novym nakirunkam dziejnaści Rady, bo dapamoha Biełarusi “paraŭnalnaja dapamozie bałtyjskim krainam u 1990ch hadoch.”
Takim čynam, demanstrujecca kankretny prykład inšym universitetam Biełarusi, biznes-kiejs, kali chočacie. Dziejničajcie jak prafesijanały, prapanujcie aktualnyja adukacyjnyja prahramy, nie zakryvajciesia ad śvietu, i ŭ ramkach stratehii raźvićcia sistem adukacyi bałtyjskaha rehijonu amal lubaja ustanova biełaruskaj sistemy adukacyi moža atrymać hrošy i padtrymku.
Žyćciova nieabchodnuju padtrymku, zaŭvažu, - našy ŭniversitety pieražyvajuć vielmi žorstki kryzys kvalifikavanych kadraŭ, i tamu prosta niazdolnyja adkazvać na sapraŭdnyja zapyty času i adaptavacca da novych ekanamičnych umovaŭ.
Daviedka: Krainy paŭnočnaj Eŭropy (Nordic region) - heta Danija, Finlandyja, Iślandyja, Narvehija i Šviecyja.
Pavieł Sołtan
Kamientary