Za čas kiravańnia Łukašenki źniščana niamała haziet. Ale zamach na «Našu Nivu» i «Narodnuju volu» — heta asablivy vypadak. Jon aznačaje pierałom u adnosinach uładaŭ ź niezaležnymi ŚMI.
Navat carski ŭrad u pačatku XX stahodździa nie apuściŭsia da taho, kab začynić «Našu Nivu». Paskudstvaŭ rabili niamała, ale voś kab prosta nožykam pa horle — hetaha nie było. Padobna na toje, inšych arhumientaŭ — akramia nožykam — u ciapierašniaj ułady ŭžo nie zastałosia. Zdavałasia b: jana całkam manapalizavała hramadska-palityčnaje tele- i radyjoviaščańnie, dziaržaŭnyja haziety vychodziać tyražom niesuvymierna vialikim, čym niezaležnyja. A tołku — ledź. Aficyjnaja prapahanda cierpić poŭnaje paražeńnie. Nie darma paśla niadaŭnich vybaraŭ razbor palotaŭ skončyŭsia adstaŭkami dvuch vydatnych bajcoŭ ideałahičnaha frontu — Natalli Piatkievič i Alaksandra Zimoŭskaha. Nie spadabalisia Alaksandru Łukašenku vyniki hałasavańnia, nie spadabalisia ...
Padziei pieršych čatyroch miesiacaŭ 2011-ha — valutny kryzis, rost cenaŭ, terakt, — papularnaści kiraŭniku dziaržavy vidavočna nie dadali. I, miarkujučy pa ŭsim, prablemy ŭ ekanomicy buduć narastać.
Składvajecca ŭražańnie, što ŭłada pačynaje hublać kantrol nad situacyjaj. U hetaj situacyi lubaja alternatyŭnaja infarmacyja zdajecca joj niebiaśpiečnaj. Reakcyjaj na toje, što adbyvajecca staŭ niemy kryk: «Usim — maŭčać!»
Vidavočna, što atakaj na «Našu nivu» i «Narodnuju volu» sprava nie abmiažujecca. U bližejšy čas možna čakać «začystki» ŭ Internecie. Ad tych ŚMI, jakija nie patrapiać pad razdaču ciapier, zapatrabujuć «padcisnuć chvasty». Nastupaje pierałomny momant, kali prava na isnavańnie maje tolki adzin punkt hledžańnia —aficyjny ...
Adterminuje abo, naadvarot, paskoryć raźviazku staŭka na hrubuju siłu? Boh viedaje. Na forumie «NN» adzin z čytačoŭ napisaŭ:
«Byli čarnasociency I była «Naša Niva». «Naša Niva» zastałasia, dzie ciapier čarnasociency?
Byli balšaviki I była «Naša Niva». «Naša Niva» zastałasia, dzie ciapier balšaviki? ..
Jość «Naša Niva» i jość Łukašenka. Ja ni na što nie namiakaju, ale «Naša Niva» vyjšła ŭ finał».
Čym u vyniku skončycca hety pajadynak, u mianie sumnievaŭ niama.
