Dostup da Prokopovi.ch abmiažujuć

Hienieralnaja prakuratura šukaje stvaralnikaŭ papularnaha ŭ Biełarusi sajta nielehalnaha abmienu valut,

paviedamiŭ 19 maja žurnalistam načalnik upraŭleńnia Hienprakuratury pa nahladzie za vykanańniem zakanadaŭstva i zakonnaściu pravavych aktaŭ Pavał Radzivonaŭ.

Pavodle jaho słoŭ, Hienprakuratura vyniesła pastanovu ab abmiežavańni dostupu da internet-resursu, jaki prapahanduje dziejnaść pa niezakonnym abmienie valuty. Abmiežavańnie dostupu da resursu raspaŭsiudžvajecca na dziaržaŭnyja ŭstanovy, skazaŭ Radzivonaŭ.

Nazyvać sajt jon nie staŭ, kab, pavodle jaho słovaŭ, nie stvarać jamu rekłamy. Adnak, jak stała viadoma, havorka idzie pra sajt prokopovich.net, stvaralniki jakoha pazicyjanujuć jaho jak «pieršy ŭ śviecie elektronny punkt najaŭnaha valutnaha abmienu».

Jak zajaviŭ pradstaŭnik Hienprakuratury, na sajcie ŭstanaŭlivajucca advolnyja kursy abmienu valuty i kanviersii, jakija nie adpaviadajuć kursach abmienu ŭ bankach. «Hienprakuratura kanstatuje, što prapahanda takoj dziejnaści źjaŭlajecca niezakonnaj i pavinna być spynienaja», — zajaviŭ Radzivonaŭ.

Jon adznačyŭ, što rekłama mahčymych valutnych apieracyj pryciahvaje złačyncaŭ i asoby, jakija karystajucca pasłuhami takich sajtaŭ, mohuć stać abjektam złačynnych zamachaŭ ašukancaŭ. Radzivonaŭ taksama nie vyklučyŭ hvałtoŭnych dziejańniaŭ u adnosinach da fizičnych asob. Pradstaŭnik Hienprakuratury paviedamiŭ, što ŭžo zaviedziena kryminalnaja sprava ŭ dačynieńni da maładoha čałavieka, jaki z vykarystańniem internetu ašukanskim šlacham zavałodaŭ 66 młn biełaruskich rubloŭ. Jon źmieščany pad vartu, paviedamlaje BiełaPAN.

Pavodle Radzivonava, Hienprakuratura zaklikaje «ŭstrymacca ad niezakonnych uhodaŭ pa abmienie valuty, stroha vykonvać zakanadaŭstva, nie dajučy mahčymaści zrabić siabie achviarami złačyncaŭ».

Jon paviedamiŭ, što Hienprakuratura praciahnie vyjaŭleńnie takich sajtaŭ i dziejnaść pa abmiežavańni dostupu da ich. U adpaviednaści z zakanadaŭstvam rašeńnie Hienprakuratury vykonvaje Biełaruskaja dziaržaŭnaja inśpiekcyja pa elektrasuviazi.

Miarkujučy pa reakcyi pradstaŭnika Hienprakuratury, dla jaho stała adkryćciom, što na partale tut.by źjaviŭsia resurs, jaki pradstaŭlaje mahčymaść hramadzianam ažyćciavić abmien valuty.

Apošnija tydni sajt Prokopovi.ch staŭ adnym z samych papularnych u Biełnecie. Učora na im pabyvali 37600 naviednikaŭ

(źviestki ličylnika Akavita.by). Heta vyvieła sajt na 13-ju pazicyju ŭ ahulnym rejtynhu biełaruskich resursaŭ. Dla paraŭnańnia: sajt NN.BY učora naviedała 22 tysiačy čałaviek.

Sajt vykarystoŭvajecca biełarusami ŭ jakaści svojeasablivaj elektronnaj biržy — ludzi damaŭlajucca pamiž saboj nakont kupli/prodažu valuty i ŭdvaich iduć u bank.

Pieršy pradaje valutu pa aficyjnym kursie, druhi adrazu ž jaje kuplaje, a paśla za miežami abmieńnikaŭ dapłačvaje pieršamu roźnicu ŭ aficyjnym i realnym kursie.

Tak i zakony farmalna nie parušajucca, i ludzi zdabyvajuć sabie deficytnuju valutu.

Pra niazvykły sajt napisali ŚMI roznych krain: takoha cudu nidzie na śviecie bolš niama.

Akramia płatformy dla abmiennych apieracyj, na staroncy jość i navinnaja častka. Fejsam samaha nieardynarnaha sajta staŭ samy nieardynarny bankir: Piatro Piatrovič Prakapovič.

Sajt stvaryŭ zvyčajny małady prahramier, pakul nijakich prybytkaŭ jon nie maje i zachoŭvaje ananimnaść.

• 0
• 0
• 0
• 0
• 0
• 0
• 0
• 0