U Biełarusi z pačatku hoda ad niaščasnych vypadkaŭ zahinuli 48 dziaciej

Pra heta paviedamiŭ namieśnik načalnika adździeła ŭpraŭleńnia prafiłaktyki Ministerstva ŭnutranych spraŭ Valeryj Mialeška 31 maja na pres-kanfierencyi ŭ Minsku.

Pavodle jaho słoŭ, za anałahičny pieryjad minułaha hoda zahinuła 54 dziciaci. Za ŭvieś minuły hod — 389 dziaciej. Niahledziačy na tendencyju da źnižeńnia niaščasnych vypadkaŭ z hibiellu dziaciej, Mialeška acaniŭ takija ličby jak «niesuciašalnyja».

Asablivuju zakłapočanaść MUS vyklikajuć «niedarečnyja» zdareńni, jakija paciahnuli hibiel dziciaci, jakoj možna było b paźbiehnuć. Naprykład, niekalki padletkaŭ małatkom raźbirali minu časoŭ Vialikaj ajčynnaj vajny, da hetaha minu bačyli baćki adnaho ź ich i nijak nie pieraškodzili trahiedyi. U vyniku adzin padletak zahinuŭ, troje atrymali ciažkija ranieńni.

Niaredkija taksama vypadki hibieli dziaciej u vyniku ŭtapleńnia ci pažaraŭ, jakija spravakavanyja «baćkoŭskaj i piedahahičnaj nieadukavanaściu».

Jak adznačyŭ Mialeška, u suviazi z hetym MUS pravodzicca «vialikaja praca» pa infarmavańni jak dziaciej pra biaśpiečnyja pavodziny, tak i ich baćkoŭ: tranślujecca sacyjalnaja rekłama, pravodzicca tydzień pravavych viedaŭ i inšyja śpiecyjalnyja mierapryjemstvy.

Jak paviedamiła staršy inśpiektar pa asablivych daručeńniach upraŭleńnia Dziaržaŭnaj aŭtamabilnaj inśpiekcyi MUS Hanna Banadyk, sioleta ŭ vyniku darožna-transpartnych zdareńniaŭ u Biełarusi zahinuła 14 dziaciej, 171 dzicia atrymała traŭmy i kalectvy. 50% DTZ učyniajecca z udziełam dziaciej-piešachodaŭ, ale, jak praviła, u takich zdareńniach traŭmy — mieniej ciažkija ŭ adroźnieńnie ad traŭm dziaciej-pasažyraŭ, jakija časta pamirajuć. Sioleta z 14 zahinułych u DTZ dziaciej šeść — dzieci-pasažyry, piać — dzieci-piešachody, dvoje — viełasipiedysty, pryčym adzin ź ich trochhadovy, i adzin matacyklist.

Pavodle słoŭ Banadyk, sioleta 80% DTZ z naniasieńniem traŭm dzieciam adbyłosia pa vinie vadzicielaŭ. Adnak čakajecca, što padčas letnich kanikuł uzraście lik DTZ, jakija adbyvajucca z-za taho, što dzieci pakinutyja biez nahladu abo parušajuć praviły darožnaha ruchu.

Jak adznačyła pradstaŭnik DAI MUS, u letni čas asablivaja ŭvaha budzie nadavacca pieravozcy dziaciej na ekskursii, teatralnyja śpiektakli, cyrkavyja pakazy, da miescaŭ masavaha i azdaraŭlenčaha adpačynku. Asablivaja ŭvaha taksama budzie nadavacca pieravozkam dziaciej aŭtobusami.

• 0
• 0
• 0
• 0
• 0
• 0
• 0
• 0