u ich liku šeść zajaŭlenych miascovymi
Pavodle jaje słoŭ, pikietavańnie płanavałasia pravieści 11 i 13–17 červienia (na stadyjonie «Łakamatyŭ», kala centralnaha rynku na vulicy Puškinskaja, kala CUMa na praśpiekcie Mašerava, kala rynku «Łahuna» ŭ mikrarajonie Kavalova, kala kinateatra «Biełaruś» na piešachodnaj vulicy Savieckaja).
«U praviadzieńni pikieta 11 červienia na stadyjonie „Łakamatyŭ“, adzinym vyznačanym dla hetaha miescy ŭ horadzie, uładami admoŭlena na toj padstavie, što budzie prachodzić matč čempijanatu Biełarusi pa futbole siarod žanočych kamand. Usie astatnija pikiety zabaronieny, tamu što płanavalisia nie ŭ miescy, vyznačanym dla takich mierapryjemstvaŭ, heta značyć nie na stadyjonie „Łakamatyŭ“. Atrymlivajecca, što pikiety nielha pravieści nidzie», — zaznačyła Kanius.
Pavodle infarmacyi bresckaha aktyvista demsił, člena nacyjanalnaha kamiteta Abjadnanaj hramadzianskaj partyi Uładzimira Vujeka, 14 červienia z Bresckaha harvykankama pryjšoŭ adkaz na zajaŭku, jakuju nakiroŭvali abłasnyja arhanizacyi AHP, BSDP (Hramada), haradskaja struktura Biełaruskaj partyi levych «Spraviadlivy śviet» i rehijanalnaje adździaleńnie prafsajuza REP. Hetu akcyju płanavałasia pravieści 18 červienia na stadyjonie «Łakamatyŭ».
«U praviadzieńni pikieta taksama admoŭlena, tamu što, zhodna z kalendarom spabornictvaŭ, u hety čas na stadyjonie buduć prachodzić hulni pieršynstva vobłaści pa futbole siarod žanočych kamand, — zaznačyŭ Vujek. — My nie raz chadzili na hety spartyŭny abjekt u dni, kali płanavałasia pravodzić akcyi, i kožny raz upeŭnivalisia, što było dastatkova miesca, kab, nie pieraškadžajučy spartsmienam, pravieści i naš pikiet. My miarkujem, što ŭłady prosta bajacca akcyj pratestu i pad roznymi padstavami zabaraniajuć ich».
Metaj hetaha pikieta było vykazać pratest suprać rezkaha źnižeńnia ŭzroŭniu žyćcia, pavyšeńnia cen na tavary i pasłuhi, rostu biespracoŭja ŭ krainie, a taksama prainfarmavać hramadzian ab raspracavanaj AHP dla Biełarusi prahramie pa pieraadoleńni ekanamičnaha kryzisu.
