U troch dziasiatkach haradoŭ ludzi vychodziać na centralnyja płoščy kožnuju sieradu a 19-j i prosta hulajuć. Takaja inicyjatyva naradziłasia ŭ sacyjalnaj sietcy Vkontaktie. U Minsku dałučylisia aŭtamabilisty. Jany pryjazdžajuć u centr i sihnalać. Ludzi patrabujuć palityčnych i ekanamičnych pieramien.
Narodnyja hulańni ŭ stalicy.
Ludzi prosta vychodziać na centralnyja płoščy i hulajuć. A inšyja siadajuć u mašyny, jeździać vakoł płoščaŭ i sihnalać.
Ideja takoj niezvyčajnaj formy pratestu naradziłasia ŭ sacyjalnych sietkach.
Kali niechta vychodzić z łozunhami, jaho adrazu ž chapajuć. Tamu internaŭty prydumali: prosta vychodzić i hulać. Pryčapicca niama da čaho. Dyj dla zdaroŭja karysna.
Pieršyja akcyi ŚMI, u tym liku i «Naša Niva», navat nie zaŭvažyli.Zakliki na ich raspaŭsiudžvalisia tolki ŭ sacyjalnych sietkach, a vychodziła na płoščy para dziasiatkaŭ ludziej.
Adnak ideja spadabałasia svajoj prostaściu. I 15 červienia ŭ centr Minska vysypała stolki ludziej, što napałochanyja ŭłady zakryli dla vychadu stancyi mietro «Kupałaŭskaja» i «Kastryčnickaja» i zabłakavali turnikietami płoščy Kastryčnickuju i Svabody. Usio marna:
ludzi mirna viesialilisia na tratuarach.
U sacyjalnych sietkach zahadzia raspaŭsiudžvałasia schiema, dzie hurtavacca dla hulańnia ŭ vypadku błakavańnia Płoščy. Ale schiema pratestu nastolki «samaarhanizacyjnaja», što i tak usio jasna. Kali nie tut, dyk tam.
Pakul adny ludzi hulajuć na vulicach, druhija pryjazdžajuć u centr u aŭtamabilach i prosta pavolna jeździać pa vulicach vakoł centralnaj płoščy, sihnalačy.
Kadry ź Minska, kali ludzi prosta stajać na tratuarach i apładzirujuć, abyšli ŭsie telekanały.
«Revalucyja praz sacyjalnuju sietku» — tak nazyvajecca supołka «Vkontaktie», ź jakoj vyjšli pieršyja zakliki štosierady źbiracca miž 19.00 i 19.30. «Pieršyja sustrečy moža być mała ludziej, ale z kožnym razam nas budzie stanavicca ŭsio bolš», — vieryli arhanizatary supołki.
Na dadzieny momant jana naličvaje bolš za 9 tysiač udzielnikaŭ. U ich na avatarcy ścisnuty kułak i zaklik «Dapamažy blizkamu pieramahčy strach».
Ale jana nie adna. U internecie takich supołak šmat.
Niachitraja taktyka pracuje.
U minułuju sieradu ludzi vyjšli na płoščy tych haradoŭ, dzie hadami nie było nijakich akcyj pratestu. «U Śvietłahorsku było prosta supier», «Dumaŭ, što ŭ Słucku budziem adny z žonkaj, a tak pryjemna było!», «U Žodzinie ŭžo choć niešta». Heta typovyja zapisy «Vkontaktie» ŭdzielnikaŭ hetych akcyj. Ludziam nadakučyła «takoje žyćcio».
Dla Bresta paŭtysiačy čałaviek na płoščy Lenina — heta vialikaja ličba. U rehijonach da ŭdzielnikaŭ sacyjalnych sietak dałučylisia i aktyvisty apazicyi.
Sacyjalnaja sietka «Vkontaktie» źjaŭlajecca najpapularniejšaj u Biełarusi. Pa samych ścipłych padlikach, u joj zarehistravana 2 miljony 700 tysiač biełarusaŭ. Voś čamu mienavita ichniaja płatforma, a nie Fejsbuk była abranaja dla źbirańnia ludziej na płoščy. Darečy, akcyi padtrymki Narodnych hulańniaŭ u sieradu raspačalisia i ŭ Fejsbuku i Tvitary.
Pradstaŭniki ŭłady voziać junakoŭ-zavadataraŭ na prafiłaktyčnyja hutarki ŭ milicyju i prakuraturu, prasłuchoŭvajučy telefony. Mnohich zatrymlivali 15 červienia dla vyśviatleńnia asoby, u Hrodnie — horadzie, jaki vyklikaje va ŭładaŭ tradycyjny strach — užyvali siłu. Darečy, usio heta hruba parušaje kanstytucyjnaje prava na svabodu słova i schodaŭ. Adnak chvalu źbić nie ŭdajecca.
Pra heta z razdražnieńniem zhadvaŭ na pres-kanfierencyi 17 červienia Alaksandr Łukašenka.
«Minharvykankam vyznačyŭ. Tam — kali łaska: na aŭtamabilach, na pavozkach, na koniach, na sabakach, što zaŭhodna ŭ miežach prystojnaha pravodźcie.Ale kali ty błakuješ praśpiekt Niezaležnaści, palityčny praśpiekt, i pieraškadžaješ inšym ludziam, na heta treba reahavać žorstka», — skazaŭ jon.
Jon paabiacaŭ ministru ŭnutranych spravaŭ Kulašovu, što ŭ vypadku paŭtareńnia akcyi «Stop-bienzin», kali ŭ prateście suprać rostu cenaŭ ludzi zabłakavali centr Minska, jon moža pazbavicca pahonaŭ. Heta było b zabaŭna: za kryzis u adstaŭku nie syšoŭ nichto, a voś za pratesty karajuć.
Intryha nastupnych mierapryjemstvaŭ zaklučajecca ŭ tym, ci buduć Narodnyja hulańni narastać — ci chopić u zavadataraŭ kreatyvu.