U Breście 4 lipienia było aštrafavana jašče kala 10 čałaviek, zatrymanych padčas maŭklivaj akcyi pratestu 29 červienia.
Pavodle źviestak pravaabaroncy Ramana Kiślaka, sud Leninskaha rajona Bresta pryznaŭ ich vinavatymi va ŭdziele ŭ niesankcyjanavanym mierapryjemstvie (č. 1 art. 23.34 KoAP).
«Dva čałavieki pryznali svaju vinu va ŭčynieńni hetaha złačynstva, — paviedamiŭ Kiślak. — Adzin ź ich, na pracesie jakoha ja prysutničaŭ, aštrafavany na piać bazavych vieličyniaŭ. Astatnim, jakija nie pryznali svaju vinu, pryznačany štrafy ad 10 da 12 bazavych vieličyniaŭ. Atrymać u sudzie infarmacyju pra toje, kolki ŭsiaho było razhledžana 4 lipienia takich administracyjnych spraŭ, na hety čas mnie nie ŭdałosia».
Na dumku pravaabaroncy, u dačynieńni da čałavieka, jaki pryznaŭ svaju vinu i vykazaŭ hatoŭnaść zapłacić štraf, było parušana zakanadaŭstva. «U vypadku kali sankcyja č. 1 art. 23.34 KoAP nie praduhledžvaje nižniuju miažu štrafu i pry pryznańni viny i hatoŭnaści apłacić hrašovaje spahnańnie, hramadzianinu pa zakonie štraf ustanoŭleny ŭ pamiery pałovy bazavaj vieličyni — 17,5 tys. rubloŭ», — skazaŭ Kiślak.
Siońnia, pavodle jaho infarmacyi, u sudzie Leninskaha rajona Bresta budzie praciahvacca razhlad administracyjnych spraŭ zatrymanych 29 červienia. Usiaho pačynajučy z 30 červienia na padstavie č. 1 art. 23.34 KoAP sud aštrafavaŭ bolš jak 25 čałaviek. Pamiery štrafaŭ skłali ad 4 da 15 bazavych vieličyniaŭ.
Viečaram 29 červienia ŭ akcyi maŭklivaha pratestu ŭ Breście ŭziali ŭdzieł nie mienš jak 600 čałaviek. 75 udzielnikaŭ akcyi byli zatrymany.
