«Tuzin. Unplugged» 8 lipienia: «Mutnajevoka» i N.R.M.

U čaćviertym kancercie z seryi «Tuzin. Unplugged» 8 lipienia hurt N.R.M. upieršyniu raśpiajecca na troch u akustyčnym farmacie i adkaža za ŭsio, a hurt «Mutnajevoka» paraźminajecca napiaredadni ŭdziełu ŭ feście «Sosiednij mir».

«Mutnajevoka» maje 6-hadovuju historyju, za hety čas hurt vydaŭ dva synhły i paŭnafarmatny albom. Na «Tuzinie Hitoŭ» jany ŭpieršyniu pakazalisia ŭ 2009 hodzie ź pieśniaj «Razryvaju». Jany pastajanna vystupajuć u mienskich klubach, siabrujuć z zakanadaŭcami mody ŭ biełaruskim panku — hurtom «Hołaja Manaška», a adnojčy navat dali solny kancert na płoščy Banhalor u miežach dnia jadnańnia narodaŭ Biełarusi i Rasiei. Nazvu muzyki ŭziali ad lehiendarnaj mienskaj kaviarni, dzie z hadoŭ 20 tamu źbiralisia aktory, muzyki dy mastaki. Jana mieściłasia ŭ byłym archirejskim domie, što na centralnym praspekcie i atrymała nazvu «Mutnaje voka». Na pačatku hetaha leta muzyki pieramahli ŭ biełaruskim adbory na bujny rok-fest «Sosiednij mir», jaki adbudziecca ŭ žniŭni na Azoŭskim mory. «Mutnajevoka» vystupić na hałoŭnaj scenie razam z takimi hurtami, jak «Lapis Trubiackoj», Noize MC, «Korol i Šut» dy inšymi. Napiaredadni adjezdzu muzyki syhrajuć svoj set na «Tuzin. Unplugged» i pakažuć svaje samyja viadomyja pieśni ŭ kamernym varyjancie.

Admysłova dla «Tuzin. Unplugged» svaju prahramu rychtuje hurt N.R.M., jaki ŭpieršyniu vystupić z paŭnavartasnym kancertam u Miensku paśla taho, jak Pit Paŭłaŭ, Alezis Dziemidovič i Juraś Laŭkoŭ vyrašyli praciahnuć dziejnaść bieź Lavona Volskaha. «Naš vystup budzie šmat u čym unikalnym, — kaža Pit. — U takim hučańni my jašče nie raśpiavali svaje pieśni na troch». Muzyki abiacajuć abaviazkovy hit-set z «Troch čarapach», «Pieśni pra kachańnie», «Odzirydzidziny», ale pry hetym miarkujuć syhrać niamała zusim śviežych piesień, niekatoryja ź ich upieršyniu. «Novych tvoraŭ u nas budzie bolej, čym na elektryčnych kancertach», — abiacajuć «eneremaŭcy». Da ŭsiaho, Pit, Alezis i Juraś hatovyja adkazać za ŭsio. Ciaham svajho 1,5-hadzinnaha seta jany buduć adkazvać na pytańni słuchačoŭ, navat na samyja niepryjemnyja i niazručnyja.

Vieści imprezu budzie lider hurta «Pałac» Aleh Chamienka, niaźmienny viadučy radyjoversii hit-paradu «Tuzin Hitoŭ», jakaja idzie na chvalach «Radyjo Racyja».

Kancert «Tuzin. Unplugged» padtrymlivaje hramadzkaja kampanija «Budźma biełarusami».

Kancert pačniecca ŭ 19:00 8 lipienia (piatnica) ŭ mienskim klubie «Hrafici» (zav. Kalinina, 16).

• 0
• 0
• 0
• 0
• 0
• 0
• 0
• 0