Šasnaccacihadovy aktyvist ź Bieraścia Siarhiej Aleksijevič, jaki źjaŭlajecca administrataram supołki sietkavaj revalucyi «VKontaktie» paviedamiŭ, što siońnia, 5 lipienia, da jaho ŭ kvateru prychodzili z vobšukam. Jon asabista pry vobšuku nie prysutničaŭ, adnak maci paviedamiła, što
byŭ vyniaty kamputar, šukali lubyja elektronnyja nośbity infarmacyi.
3 lipienia ŭ kvateru Siarhieja Aleksijeviča naviedalisia dva supracoŭniki orhanaŭ: adzin u cyvilnym i adzin u milicejskaj formie. Prapanavali prajechać na hutarku. Paśla taho jak Siarhiej admoviŭsia, jaho maci była papieradžanaja ab tym, što chłopcu nielha vychodzić na centralnuju płošču Bieraścia — imia Lenina. Adnak uviečary jaho mienavita tam i zatrymali.
Siarhiej Aleksijevič: «U 10 hadzin ja išoŭ pa płoščy Lenina na kancert. Da mianie padyšli dva čałavieki ŭ cyvilnym. Adzin spytaŭsia: „Aleksijevič?“. Ja skazaŭ: „Tak“. Paśla hetaha mianie załamali, uziali pad ruki i paciahnuli. Čuŭ brydkasłoŭje ad supracoŭnikaŭ milicyi. Čuŭ, što ja ŭ niejkim śpisie. Vyklikali inśpiektara pa spravach niepaŭnaletnich, i vyjaviłasia, što na mianie składzieny rapart, nibyta ja išoŭ pa płoščy Lenina, maciukaŭsia i razmachvaŭ rukami. Choć ja išoŭ adzin, u mianie telefona nie było z saboju. Ja nijak nia moh maciukacca. Mianie pratrymali krychu bolš za try hadziny i adpuścili».
Pa infarmacyi Siarhieja Aleksijeviča i Źmitra Šurchaja, abłasnoha kiraŭnika BCHD pa Bieraściejskaj vobłaści, vobšuki pa spravach arhanizacyi i ŭdziełu ŭ maŭklivych akcyjach pratestu ŭ Bieraści adbylisia siońnia jašče ŭ niekalkich aktyvistaŭ.
