7 lipienia Vincuk Viačorka adznačaje 50-hodździe. Ź jubilejem paplečnika vinšuje Viktar Ivaškievič.
Vincuk Viačorka.
«Ź Vincukom my paznajomilisia jašče ŭ 1982-m. Jon zavierbavaŭ mianie ŭ nacyjanalna-vyzvolny ruch. I z taho času my razam u palitycy. Jon pryncypovy zmahar za Biełaruś, za biełaruskuju Biełaruś. I jon nikoli nie adździalaŭ svaje nacyjanalnyja pohlady ad demakratyčnych. Vincuk byŭ i zastajecca adkrytym da supracoŭnictva z usimi, chto padzialaje demakratyčnyja kaštoŭnaści. Toje, što Vincuk Viačorka zrabiŭ za svaje 50 hadoŭ — heta tolki siaredzina šlachu, pałova dasiahnieńniaŭ i zroblenaha. Usio jašče napieradzie».
Viktar Ivaškievič vinšuje jubilara sa śviatam i žadaje jamu ŭsiaho najlepšaha. «Naša Niva» dałučajecca da vinšavańniaŭ.
***
Vincuk Viačorka z 1979 hodu staŭ aktyŭnym udzielnikam nacyjanalnaha ruchu Biełarusi. Jon źjaŭlaŭsia inicyjataram niekalkich junackich kulturnych hrup i arhanizacyj: «Majstroŭnia» (1979—1984), «Tałaka» (1986—1989), Kanfiederacyi biełaruskich junackich arhanizacyj (1988—1989). Bałatavaŭsia u deputaty ŭ Viarchoŭny Saviet Respubliki Biełaruś. U 1988 hodzie źjaŭlaŭsia adnym z zasnavalnikaŭ Biełaruskaha Narodnaha Frontu «Adradžeńnie». Spadar Viačorka byŭ kiraŭnikom kamisii pa prahramnych dakumientach i čalcom kiravańnia partyi. U 1995—1999 hh. jon byŭ namieśnikam staršyni BNF. A z 1999 pa 2007 hod — lidaram PBNF.
