Pałata pradstaŭnikoŭ Nacyjanalnaha schodu Biełarusi ličyć niemetazhodnym ŭnosić źmieny ŭ Zakon ab movach. Takaja sutnaść adkazu, jaki atrymaŭ z parłamienta žychar Homiela Ihar Słučak.
Byŭšy kaardynataram kampanii «Spravavodstva pa-biełarusku», Słučak razasłaŭ piersanalnyja listy kožnamu sa 110 deputataŭ Pałaty pradstaŭnikoŭ z prapanovaj unieści źmieny ŭ Zakon ab movach. Słučak prapanoŭvaŭ źmianić 28-y artykuł zakona, dzie havorka idzie ab viadzieńni spravavodstva na «biełaruskaj i (abo) ruskaj» movie. Hramadski aktyvist prapanuje prybrać z hetaj frazy słova «abo». Heta budzie aznačać patrabavańnie vieści spravavodstva na dźviuch movach adnačasova, što budzie aznačać ich realnuju, a nie farmalnuju, roŭnaść, ličyć Słučak.
U aficyjnym adkazie pastajannaj parłamienckaj kamisii pa adukacyi, kultury, navucy i navukova-techničnym prahresie skazana: «Vykładzienyja prapanovy ab uniasieńni źmianieńniaŭ u Zakon Respubliki Biełaruś «Ab movach» pryviaduć, na naš pohlad, da ŭskładnieńnia ŭ paradku vykarystańnia dziaržaŭnych movaŭ, da niepatrebnaha ŭ bolšaści vypadkaŭ dublavańnia tekstaŭ, a značyć — da značnaha pavieličeńnia hrašovych i materyjalnych vydatkaŭ. Zychodziačy z vyšej skazanaha, kamisija ličyć niemetazhodnym padtrymlivać pryviedzienyja prapanovy ab źmienie zakona».
Pry hetym aŭtaru lista paviedamlajuć, što ŭ 2011 hodzie na biełaruskaj movie rychtujucca prajekty zakonaŭ «Ab aficyjnych hieraldyčnych simvałach», «Ab dostupie da infarmacyi ab dziejnaści dziaržaŭnych orhanaŭ», «Ab vydavieckaj spravie», «Ab uniasieńni źmianieńniaŭ i dapaŭnieńniaŭ u zakon «Ab achovie historyka-kulturnaj spadčyny».
Kamientujučy atrymany z parłamienta adkaz, Słučak adznačyŭ: «Deputaty nie chočuć karystacca svaim pravam zakanadaŭčaj inicyjatyvy, bo ni adzin ź ich nie paličyŭ patrebnym ŭnieści na razhlad parłamienta zakon «Ab movach». Takoje važnaje pytańnie dla biełaruskaj nacyi źviazvajuć ź niemetazhodnaściu, bo heta vykliča materyjalnyja vydatki».
Na dumku kaardynatara kampanii «Spravavodstva pa-biełarusku», varta «pierahledzieć ekanamičnuju palityku krainy, a nie šukać šlachi vychadu z kryzisu za košt zaniadbańnia biełaruskaj movy i kultury». «U parłamiencie, jak akazałasia, niama čałavieka, jaki b zajmaŭsia abaronaj nacyjanalnych intaresaŭ biełaruskaha narodu. A taki čałaviek pavinien być. Spadziajusia, jon źjavicca paśla nastupnych parłamienckich vybaraŭ», — dadaŭ Ihar Słučak.
BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
