Minski haradski sud pakinuŭ bieź źmieny pryhavory, vyniesienyja sudom Leninskaha rajona stalicy eks-kandydatam u prezidenty Mikałaju Statkieviču i Dźmitryju Usu, a taksama jašče piaci ŭdzielnikam padziej 19 śniežnia 2010 hoda — Alaksandru Kłaskoŭskamu, Arciomu Hrybkovu, Alaksandru Kviatkieviču, Dźmitryju Bułanavu i Andreju Paźniaku. Takoje rašeńnie pryniała 19 lipienia sudovaja kalehija pad staršynstvam Siarhieja Chrypača.
Prakuror Anton Zaharoŭski zajaviŭ, što ličyć nieabhruntavanymi kasacyjnyja skarhi asudžanych. Pavodle jaho słoŭ, vysnovy abarony nie abhruntavanyja, tamu što abviarhajucca faktami ŭ pryhavory. Prakuror upeŭnieny, što ŭdzielniki masavych biesparadkaŭ sprabavali prarvacca praz ačapleńnie milicyi ŭ Dom urada. Aprača taho, miarkuje Zaharoŭski, znojdzienyja na płoščy pałki, žaleznyja pruty, butelki i inšyja pradmiety śviedčać pra zmovu ŭdzielnikaŭ masavych biesparadkaŭ na ŭčynieńnie supraćpraŭnych dziejańniaŭ.
Nahadajem, 26 maja sud pad staršynstvam Ludmiły Hračovaj pryhavaryŭ Statkieviča da šaści hadoŭ pazbaŭleńnia voli, Usa — da piaci z pałovaj hadoŭ pazbaŭleńnia voli ŭ kałonii ŭzmocnienaha režymu. Sud ustanaviŭ, što Statkievič i Us rychtavali masavyja biesparadki i nieadnarazova abmiarkoŭvali hetu temu. Aprača taho, Us źbiraŭ źviestki ab dysłakacyi padraździaleńniaŭ milicyi na Kastryčnickaj płoščy i kala Administracyi prezidenta i pieradavaŭ ich Statkieviču. Sudździa Hračova taksama zajaviła, što Statkievič i Us uznačalvali "natoŭp, jaki biasčynstvavaŭ", padčas šeścia pa praśpiekcie Niezaležnaści.
Alaksandr Kłaskoŭski pryhavorany da piaci hadoŭ pazbaŭleńnia voli ŭ kałonii ŭzmocnienaha režymu, Arciom Hrybkoŭ — da čatyroch hadoŭ pazbaŭleńnia voli ŭ kałonii ŭzmocnienaha režymu z prymusovym lačeńniem ad ałkahalizmu, Alaksandr Kviatkievič — da troch z pałovaj hadoŭ pazbaŭleńnia voli ŭ kałonii ŭzmocnienaha režymu, Dźmitryj Bułanaŭ — da troch hadoŭ pazbaŭleńnia voli ŭ kałonii ŭzmocnienaha režymu, Andrej Paźniak — da dvuch hadoŭ abmiežavańnia voli biez nakiravańnia ŭ papraŭčuju ŭstanovu adkrytaha typu.
Na siońniašnim pasiadžeńni sudovaj kalehii nivodny z asudžanych nie prysutničaŭ.
15 lipienia kalehija Minharsuda pakinuła bieź źmieny pryhavor eks-kandydatu ŭ prezidenty Andreju Sańnikavu. Najbližejšymi dniami Sańnikaŭ pavinien być etapavany ź Minska ŭ navapołackuju kałoniju.
