Praces nad śledčym pa asabliva važnych spravach Hienieralnaj prakuratury Biełarusi Śviatłanaj Bajkovaj, jaki prachodzić u Viarchoŭnym sudzie, nabližajecca da finału. Prysud pavinien być abvieščany 2 žniŭnia, a 14 hadzinie.
Chacia hetyja źviestki u Viarchoŭnym sudzie nie paćvierdzili, paraiŭšy źviartacca pa infarmacyju ŭ pačatku žniŭnia.
Bajkova zajmałasia rasśledavańniem hučnych karupcyjnych spraŭ, naprykład, ab chabarnictvie i kantrabandzie na mytni «Zachodni Buh». Ale sama była abvinavačana ŭ złoŭžyvańniach, pieravyšeńni słužbovych paŭnamoctvaŭ, niezakonnych zatrymańniach i inšych złačynstvach — usiaho pa 5 artykułach kryminalnaha kodeksu.
Pa słovach viadomaha pravaabaroncy Hary Pahaniajła, hetyja abvinavačvańni — tolki adzin bok «spravy Bajkovaj»:
— My viedam sapraŭdnuju pryčynu, čamu Bajkovu pryciahvajuć da adkaznaści, jana zanadta hłyboka kapnuła. Vyjšła na tych fihurantaŭ, tak zvanych «niedatykalnych ludziej» u hienieralskich pahonach. Usio heta raśledvańnie epizodaŭ pa kantrabandzie, pa «kryšyvańniu» miažy, mytni zakranuła vysokija čyny, heta ŭžo akazałasia niedazvalalna i joj dali pa rukach, pryčym vielmi surjozna. Jaje adsunuli ad razhladu spravy, pasadziŭšy ŭ izalatar KDB.
Kryminalnaja sprava suprać Bajkovaj była ŭzbudžana 24 lutaha 2010 hoda staršynioj KDB Vadzimam Zajcavym. Paśla 6 miesiacaŭ znachodžańnia u SIZA KDB miera strymańnia dla jaje była źmieniena na chatni aryšt. Na sud jaje pryvozili pad vartaj. Pa niekatorych źviestkach, Bajkova ŭžo zvolniena z Hienieralnaj prakuratury, ale ŭ samoj prakuratury hetyja źviestki nie kamientujuć.
