Uładzimir Niaklajeŭ padtrymlivaje ideju rady pa arhanizacyi pratestu 10

Uładzimir Niaklajeŭ padtrymlivaje ideju stvareńnia savieta pa arhanizacyi hramadzianskaha pratestu, adnak ličyć, što heta pavinna być nie peŭnaja arhanizacyja, a «virtualnaja reč» u formie narady. Pra heta jon zajaviŭ 3 žniŭnia na pres-kanfierencyi ŭ Minsku.

Kandydat u prezidenty na vybarach 2010 hoda, lidar kampanii «Havary praŭdu!» rasceńvaje akcyi maŭklivaha pratestu jak «vielmi efiektyŭnyja». Ale ciapier, ličyć Niaklajeŭ, da hetaj idei treba «stavicca aściarožna», kab jana «kančatkova nie zhasła». Pavodle mierkavańnia palityka, nie treba davać uładam nahody kančatkova zadušyć pratest, u suviazi z čym jon prapanuje zrabić u akcyjach pierapynak da vosieni.

U arhanizataraŭ maŭklivaha pratestu byli «jaŭnyja pamyłki», adnak, padkreśliŭ Niaklajeŭ,

jon nie žadaŭ by krytykavać ich.

***

Pačynajučy z 8 červienia ŭ roznych haradach Biełarusi prajšło dzieviać akcyj maŭklivaha pratestu, inicyjavanych internet-supolnaściu «Revalucyja praz sacyjalnyja sietki» (RPSS). Jany pravodzilisia kožnuju sieradu, pryčym u Minsku ich farmat nieadnarazova mianiaŭsia. Napiaredadni čarhovaj akcyi ŭ internecie źjaŭlałasia instrukcyja, jakoj prytrymlivalisia ŭdzielniki.

Pieršyja akcyi źbirali tysiačy ludziej u Minsku i sotni — u rehijonach, zatym lik udzielnikaŭ staŭ skaračacca. Apošniaja akcyja, 27 lipienia, stała samaj małalikaj i nieprykmietnaj.

Źnižeńniu hramadzianskaj aktyŭnaści šmat u čym spryjali žorstkija dziejańni ŭład: razhon i zatrymańnie ŭdzielnikaŭ akcyj i vypadkovych prachožych, jakija apynulisia ŭ peŭny čas u peŭnym miescy, štrafy i praciahłyja administracyjnyja aryšty najbolej aktyŭnych hramadzian.

29 lipienia ŭ sacyjalnaj sietcy «UKantakcie» byŭ apublikavany adkryty list adnaho z administrataraŭ internet-supolnaści RPSS Viačasłava Dzijanava, u jakim jon prapanavaŭ stvaryć saviet pa arhanizacyi pratestaŭ, kudy ŭvojduć palityki, analityki, palitołahi i inšyja viadomyja asoby.

Jak adznačana ŭ liście, jość ryzyka taho, što inicyjatyva «Revalucyja praz sacyjalnyja sietki» moža zajści ŭ tupik. «Ciažka heta pryznavać, ale my imkniemsia być ščyrymi adzin z adnym. My staralisia zrabić usio, kab abjadnać biełaruskaje hramadstva, ale nie ŭličvali važny faktar — nam nie chapała vopytu, dzieści našy idei byli maksimalistyčnyja. Z-za hetaha my sutyknulisia z šeraham prablem», — pryznaŭ Dzijanaŭ.

Tym nie mienš, pierakanany jon, ideja mirnych hramadskich pratestaŭ žyvaja. «Sacyjalnyja sietki — heta suviaź ź ludźmi, heta mahčymaść być pačutym i heta adzin ź miechanizmaŭ arhanizacyi i praviadzieńnia akcyj pratestu. Pakul ideja žyvaja i nie zabyta, treba zrabić usio mahčymaje, kab jana nie zhasła, kab tyja ludzi, jakija pavieryli, što možna pieramahčy hetuju ciemru, byli razam», — padkreślivałasia ŭ adkrytym liście.

Pavodle mierkavańnia jaho aŭtara, saviet pa arhanizacyi pratestaŭ moža kaardynavać svaju dziejnaść dystancyjna: «Skajp jość va ŭsich. Vyznačym čas, naprykład, adzin raz na tydzień, kali my zmožam abmierkavać važnyja pytańni i pryniać rašeńni pa akcyjach i pa dalejšaj dziejnaści; a my jak internet-aktyvisty zrobim usio mahčymaje, kab ažyćciavić našy ahulnyja płany».

Dzijanaŭ paviedamiŭ, što ideju daručyć «płanavańnie akcyj i stratehii prafiesijanałam i aŭtarytetnym ludziam» padtrymała bolš za 80% tych, chto ŭziaŭ udzieł u hałasavańni na staroncy internet-supolnaści «UKantakcie».

Jon taksama zajaviŭ, što na jaho inicyjatyvu «adhuknulisia vielmi viadomyja ludzi», pryčym «ich śpis papaŭniajecca štodnia». Pavodle słoŭ Dzijanava, pieršaja internet-narada prajšła viečaram 2 žniŭnia. Jon nie staŭ nazyvać proźviščy jaho ŭdzielnikaŭ, adznačyŭšy tolki, što heta «ludzi, jakija ŭdzielničajuć u palitycy» i jakija «sami mohuć dać intervju na hetu temu». Na naradzie abmiarkoŭvalisia kirunki dalejšaj dziejnaści. Pryniataje rašeńnie nieŭzabavie budzie vyviešana na staroncy hrupy RPSS «UKantakcie», skazaŭ Dzijanaŭ.

0

0

0

0

0

0

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH