Łondanskaja palicyja pavialičyła kantynhient i atrymała prava stralać humovymi kulami.
Pahromy ŭ Łondanie pastupova zacichajuć. U stalicu ŭviedzienyja dadatkovyja siły palicyi, ahułam vulicy patrulujuć kala 16 tysiač supracoŭnikaŭ, što ŭtraja bolš, čym było ŭ paniadziełak. Łondanskaja palicyja atrymała prava prymianiać suprać maradzioraŭ humovyja kuli. Nazirajecca samaarhanizacyja siarod hramadzian. Tak, u Łondanie svaje kramy ad napadnikaŭ baranili pradstaŭniki tureckaj dyjaspary.
U aŭtorak chvala pahromaŭ pierakinułasia z Łondana na inšyja harady Anhlii, a ŭ paniadziełak pahromy prajšli ŭ pryharadzie šviedskaj stalicy. Pozna ŭviečary ŭ paniadziełak hrupa z 20-30 maładych ludziej pačali hramić stancyju mietro Hasselby Gaard. Kali pryjechała palicyja, to chulihany pačali zakidvać jaje kamianiami. Zatrymanyja niekalki čałaviek. Stakholmskaja palicyja pakul nie raić źviazvać padziei ŭ Šviecyi z pahromami ŭ Anhlii. Adnak, jak adznačaje miascovaja presa, stancyju mietro hramili dzieci mihrantaŭ, a heta navodzić na peŭnyja paraleli. Akramia taho, stakholmskija pahromščyki dziejničali arhanizavana: mieli maski na tvarach, kamiani pryhatavali zahadzia, adznačaje Sveriges Radio.
Z pačatku masavych biesparadkaŭ brytanskaja palicyja zatrymała bolš za 1,1 tysiačy čałaviek, ź ich prykładna 700 byli zatrymanyja ŭ Łondanie, paviedamlaje Hazieta.ru.
Usiaho za čas masavych biesparadkaŭ u Anhlii zahinuli 4 čałavieki. Pieršaja śmierć i stała pryčynaj zabureńniaŭ. U minuły čaćvier u rajonie Totenchem pry sprobie pravieryć taksoŭku palicyjantam daviałosia ŭstupić u pierastrełku z 29-hadovym Markam Dahanam. Jon byŭ zastreleny. Palicyja śćviardžaje, što pieršym streliŭ małady čałaviek, paraniŭšy pravaachoŭnika.
U subotu 6 žniŭnia kala palicejskaha ŭčastka sabraŭsia natoŭp, jaki patrabavaŭ «spraviadlivaha razhladu» spravy Dahana. Akcyja pierarasła ŭ biesparadki.
Masavyja biesparadki ŭ Łondanie ŭ 1980-ch
Padobnych zdareńniaŭ u Vialikabrytanii nie było ŭžo 30 hadoŭ. U 1981 hodzie chvalavańni ŭspychnuli ŭ łondanskim rajonie Brykstan. Ich vyklikaŭ rakavy streł palicyjanta ŭ vypadkovuju žančynu. Jana vyžyła. Ale ad ranieńnia źnieruchomieła. Achviaraj tych chvalavańniaŭ staŭ žurnalist The Telegraph.
Vosieńniu 1985 hoda ŭ Totenchemie, adnym z samych biednych rajonaŭ Łondana, nasielenym pieravažna ciemnaskurymi, ŭspychnuli masavyja biesparadki. Katalizataram, jak i ŭ vypadku ź sioletnimi padziejami, stała śmierć hramadzianskaj asoby ŭ chodzie palicejskaj apieracyi. U žycharki rajona, na vačach jakoj palicyja aryštavała syna, zdaryŭsia infarkt. Paźniej jana pamierła. Na vulicy vyjšli tysiačy ludziej, jakija ŭ litaralnym sensie pačali palavańnie na palicyjantaŭ. U vyniku sutyčak 60 palicyjantaŭ było paraniena, adzin zahinuŭ.
