2 vieraśnia la Prezidenckaha pałaca rychtujecca mitynh — tut baćkoŭski forum polskich škoł Litvy maje namier pratestavać suprać Zakona ab adukacyi, jaki ŭstupiŭ u siłu. Taksama rychtujecca zabastoŭka — z 2 vieraśnia vučniaŭ zaklikajuć nie chadzić u škołu.
Jak śćviardžajecca ŭ raspaŭsiudžanym paviedamleńni, na mitynhu buduć pratestavać suprać prymusovaha ŭviadzieńnia dvuchmoŭnaha navučańnia ŭ škołach nacyjanalnych mienšaściaŭ, adnolkavaj prahramy navučańnia litoŭskaj movie i ekzamienu dla litoŭski škoł i škoł nacyjanalnych mienšaściaŭ.
«Padtrymajem mitynh la prezidenckaha pałaca 2 vieraśnia, a 10.00 hadzinie! Davajcie dałučymsia da strajku — z 2 vieraśnia nie pojdziem na ŭroki!», — zaklikajuć u zvarocie. «Niachaj hety strajk stanie pačatkam admieny dyskryminacyjnaha Zakona ab adukacyi!», — zaklikaje baćkoŭski forum polskich škoł Litvy.
Abjaŭlajecca, što mitynh padtrymlivajuć Sajuz palakaŭ Litvy, Tavarystva nastaŭnikaŭ polskich škoł Litvy «Macierz Szkolna», Vybarčaja akcyja palakaŭ Litvy, partyja «Russkij aljans», Tavarystva nastaŭnikaŭ ruskich škoł Litvy.
Inicyjatary zabastoŭki — vučni?
«Nakolki mnie viadoma, strajk arhanizujuć sami dzieci — navučency starejšych kłasaŭ. Ja ich razumieju — ich mierkavańnie nie ŭličyli. U demakratyčnaj dziaržavie rašeńni tak nie prymajucca — u zachodniaj cyvilizacyi bolšaść nie prymaje rašeńni, kali jany nie zadavalniajuć mienšaść. Pavinien być dyjałoh», — paviedamiŭ DELFI staršynia Vybarčaj akcyi palakaŭ Litvy (VAPŁ), jeŭraparłamiencior Valdemar Tamašeŭski.
Na dumku Tamašeŭskaha, dla taho, kab nie było zabastoŭki, Zakon ab adukacyi nieabchodna papraŭlać. Kolki budzie praciahvacca strajk, budzie zaležać ad rašeńniaŭ Ministerstva adukacyi i navuki. Staršynia VAPŁ ličyć strajk vialikim minusam kiroŭnaj bolšaści.
«U demakratyčnaj dziaržavie nie zabaroniena strajkavać. Tak vyjaŭlajecca vola i abureńnie novym Zakonam ab adukacyi, sposabam jaho pryniaćcia. Jak viadoma, jon byŭ pryniaty pa pryncypie buldoziera, całkam nie ličačysia z hramadskaściu — było sabrana bolš za 60 000 podpisaŭ baćkoŭ, jakija nie žadajuć pieramienaŭ», — skazaŭ sakratar Sajuza palakaŭ Litvy Edvard Trusievič.
Pavodle jaho słoŭ, choć podpisy ŭručany i prezidentu Dali Hrybaŭskajte, i śpikieru Siejma Irenie Dehutenie, zakon usio ž pryniali, i jon ustupaje ŭ siłu 1 vieraśnia. «Pikiet — heta vyraz abureńnia, niezadavalnieńnia. Strajkavać možna, ale heta pavinna rabicca sankcyjanavana», — skazaŭ jon.
Pa źviestkach Trusievič, pakul heta budzie papieradžalnaja akcyja, meta jakoj — źviarnuć uvahu, što nielha «balšavickimi mietadami prymać pravavyja akty suprać voli baćkoŭ, hramadstva». Kali heta nie dapamoža, chutčej za ŭsio, buduć zrobleny inšyja zachady.
Da mitynhu rychtujucca nie ŭsie
«Nakolki ja čuła, baćki źbirajucca jechać. Moža, niekatoryja voźmuć z saboj i dziaciej. Škoła ŭ hety dzień budzie pracavać, uroki buduć prachodzić», — skazała dyrektar himnazii imia Fierdynanda Ruščyca ŭ Rudaminie Žanieta Jankoŭska.
Namieśnik dyrektara himnazii im. Sv. Rafaiła Kalinoŭskaha ŭ Niamiežysie (Vilenski rajon) Jadviha Pumpałavičenie skazała, što ničoha nie viedaje pra mitynh i strajk. «Ja ničoha nie čuła, mahčyma, baćkoŭski kamitet niešta viedaje. 2 vieraśnia my arhanizujem adzin ź dziesiaci nietradycyjnych dzion — buduć prachodzić ekskursii, budziem narmalna pracavać. My dakładna nie budziem strajkavać», — pierakonvała jana.
Ściepanavičus: mitynhi — vyjaŭleńnie demakratyi
«Hety vyjaŭleńnie demakratyčnaha hramadstva. Ja chaču skazać, što mnohija krainy mahli b pazajzdrościć Litvie, dzie stvorany takija ŭmovy, jakija, pačynajučy z daškolnaha vychavańnia i zakančvajučy vyšejšaj adukacyjaj, pradastaŭlajuć mahčymaść atrymać adukacyju na rodnaj movie», — skazaŭ ministr adukacyi i navuki Hintaras Ściepanavičus u aŭtorak paśla sustrečy z prezidentam Dalaj Hrybaŭskajte.
Daradca prezidenta Dajva Ulbinajte vykazała mierkavańnie Hrybaŭskajte pra toje, što ŭ Litvie stanovišča nacyjanalnych mienšaściaŭ vielmi dobraje, a sistema adukacyi nacmienšaściaŭ ličycca adnoj z najlepšych u Jeŭropie.
Nahadajem, što, zhodna z pryniatym Zakonam ab adukacyi, u škołach nacmienšaściaŭ budzie pašyrana navučańnie na litoŭskaj movie, z 2013 hoda budzie ŭviedzieny adnolkavy ekzamien pa dziaržaŭnaj litoŭskaj movie dla pradstaŭnikoŭ nacmienšaściaŭ i tych, dla kaho litoŭskaja mova źjaŭlajecca rodnym.
Sioleta škoły nacyjanalnych mienšaściaŭ atrymajuć vučnioŭskija košyki na 21% bolšyja, buduć dadatkova zabiaśpiečany padručnikami, uletku dla nastaŭnikaŭ škoł nacmienšaściaŭ arhanizavanyja dadatkovyja kursy pavyšeńnia kvalifikacyi, praduhledžany lhoty pry acency vypusknoha ispytu.
