Siońnia ŭ polskim Sopacie zaviaršyŭsia dvuchdzionny samit ministraŭ zamiežnych spraŭ krain Eŭraźviazu i dziaržaŭ-kandydataŭ na dałučeńnie da abjadnanaj Eŭropy: Tureččyny, Makiedonii, Čarnahoryi, Charvatyi dy Iślandyi. U časie sustrečy pad kiraŭnictvam Ketryn Eštan razmova viałasia i pra sytuacyju ŭ Biełarusi.
U časie vynikovaj presavaj kanferencyi paśla zaviaršeńnia narady ministraŭ, viarchoŭny pradstaŭnik EZ pa zamiežnych spravach i palitycy biaśpieki Ketryn Eštan zajaviła, što pazycyja 27 krainaŭ-čalcoŭ źviazu što da Biełarusi zastajecca niaźmiennaj:
«My, kaniečnie, adznačyli apošnija padziei ŭ Biełarusi — niekatoryja zajavy i zachady, ale paŭtarusia, što my patrabujem vyzvaleńnia i reabilitacyi ŭsich palityčnych źniavolenych. Heta była i jość našaja pazycyja. Pazycyja, jakoj my budziem ćviorda prytrymlivacca».
U časie spatkańnia byli abmierkavanyja taksama pytańni dapamohi Libii, dačynieńni z Syryjaj dy dalejšaje supracoŭnictva z krainami — susiedziami Eŭrapiejskaha źviazu, u tym liku padrychtoŭka da samitu Ŭschodniaha partnerstva ŭ Varšavie, što zaplanavany na kaniec vieraśnia.
«My na dobrym šlachu, što tyčycca pryniaćcia važnych rašeńniaŭ pra pačatak pieramovaŭ u spravie stvareńnia abšaraŭ volnaha handlu z Hruzijaj i Małdovaj, a taksama zaviaršeńnia takich pieramovaŭ z Ukrainaj», — zajaviŭ ministar zamiežnych spraŭ Polščy Radasłaŭ Sikorski.
Miž tym 2 vieraśnia ŭ Biełastoku staršynia Eŭrapiejskaha parlamentu Ježy Buzek taksama zakranuŭ temu mahčymych pieramovaŭ z aficyjnym Mienskam.
«Ciapier Eŭraźviaz ni ŭ jakim vypadku nia pojdzie na jakija-kolviečy parazumieńni i pieramovy (ź Biełaruśsiu — aŭt.) ŭ kredyt. Spačatku prezydent Łukašenka pavinien vyzvalić usich palitviaźniaŭ, akreślić budučyja ŭmovy dziejnaści niezaležnych arhanizacyj, niezaležnych medyjaŭ, harantvać svabodu navuki, pieramiaščeńnia. Kali heta ŭsio budzie zroblena, to Eŭraźviaz, kaniečnie, budzie adkryty dla supracoŭnictva, supolnych prajektaŭ, u tym liku i dla ekanamičnaj padtrymki», — skazaŭ Ježy Buzek.
