Łukašenka daručyŭ praanalizavać, ci jość mahčymaści ŭ minskich uładaŭ dla ŭviadzieńnia biaspłatnaha prajezdu dla staličnych studentaŭ, paviedamlaje BIEŁTA.
U suviazi z hetym staršynia Minharvykankama Mikałaj Ładućka adznačyŭ, što takaja mahčymaść isnuje ŭ ramkach datacyi, vydzielenaj haradskim biudžetam, dla pracy hramadskaha transpartu. Jon zajaviŭ taksama, što adpaviednaje rašeńnie budzie pryniataje nie paźniej za paniadziełak.
Nahadajem, što 17 śniežnia 2007 h. ustupiŭ u siłu Zakon Respubliki Biełaruś ad 14 červienia 2007 hoda № 239-Z «Ab dziaržaŭnych sacyjalnych ilhotach, pravach i harantyjach dla asobnych katehoryj hramadzian». Jon pazbaviŭ studentaŭ i navučencaŭ prava na lhotny prajezd u hramadskim transparcie. Łukašenka zajaviŭ tady, što «zadača dziaržavy — nie vydzialać padački ŭ vyhladzie lhot, a stvarać umovy dla taho, kab hramadzianin mieŭ mahčymaść zabiaśpiečyć sabie hodny ŭzrovień žyćcia. A dziaržaŭnaja padtrymka pavinna akazvacca małazabiaśpiečanym, sacyjalna nieabaronienym ludziam, jakija nie ŭ stanie pakłapacicca pra siabie sami». Napeŭna, naprykancy 2007 hoda studentaŭ pierastali adnosić da katehoryi «małazabiaśpiečanych i sacyjalna nieabaronienych».
Pierad vybarami 2010 hoda pačali lichamankava viartać lhoty na prajezd dla haradskich školnikaŭ. Ciapier pryjšła čarha minskich studentaŭ.