19 studzienia
Biełaruski Chelsynski kamitet vysielili
Biełaruski Chelsynski kamitet atrymaŭ list z Haspadarčaj upravy Kiraŭnictva spravaŭ prezydenta z paviedamleńniem ab prypynieńni arendy pamiaškańnia. Pravaabarončaj arhanizacyi było rekamendavana vyzvalić pamiaškańnie da 20 studzienia. Pazbaŭleńnie ofisu pahražaje BCHK jurydyčnaj likvidacyjaj. Adnak kiraŭnictva arhanizacyi nie źbirajecca prypyniać dziejnaści. Staršynia BCHK Taciana Proćka śćviardžaje, što arhanizacyja nia mieła zapazyčanaściaŭ pa apłacie arendy pamiaškańnia.
U adździele damoŭ hałoŭnaj haspadarčaj upravy Kiraŭnictva spravaŭ prezydenta admovilisia kamentavać pryčyny skasavańnia damovy z BCHK.
Van der Lindena nie puścili da Kazulina
Kiraŭnik Parlamenckaj Asamblei Rady Eŭropy (PARE) Rene van der Linden nie atrymaŭ dazvoł na sustreču z asudžanym Alaksandram Kazulinym. Jon mieŭ sustreču z žonkaj eks‑kandydata ŭ prezidenty Biełarusi Irynaj Kazulinaj.
Fłeš‑mob u padtrymku palitviaźniaŭ
170 čałaviek pryniali ŭdzieł u fłeš‑mobie ŭ padtrymku palitviaźniaŭ. Akcyja prajšła ŭ 20.30 la kinateatra «Aŭrora». Ludzi z zapalenymi śviečkami prajšli pa vulicy Prytyckaha i potym stali ŭ łancuh.
Niekalki maładych ludziej byli zatrymany pierad jaje pačatkam u rajonie stancyi metro «Frunzienskaja». Ich pratrymali ŭ amapaŭskim aŭtobusie hadzinu, a potym vypuścili. Paśla skančeńnia akcyi zatrymańniaŭ nie było.
20 studzienia
Akcyi pratestu na Mienščynie
U Salihorsku i Słucku adbylisia akcyi salidarnaści ź lideram niezarehistravanaha «Maładoha frontu» Źmitrom Daškievičam. U Salihorsku na centralnym placy była vyviešanaja raściažka «Svabodu Daškieviču!», a ŭ Słucku praviedzieny pikiet i razdača ŭlotak. Milicyjanty zatrymali šaścioch «maładafrontaŭcaŭ», što kiravalisia ŭ Słucak, Starobin i Staryja Darohi. U Salihorsku byli zatrymanyja Andrej Tyčyna, Ivan dy Illa Šyły, Źmicier Karnoŭ. Na Ivana Šyłu składzieny pratakoł pavodle art. 156 KoAP. Źmicier Karnoŭ pakarany tryma sutkami aryštu.
21 studzienia
Pačaŭ dziejničać zakon «Ab procidziejańni ekstremizmu»
Zakon tłumačyć paniaćci «ekstremizm» i «ekstremisckaja dziejnaść», vyznačaje asnoŭnyja pryncypy i kirunki procidziejańnia ekstremizmu, ustaloŭvaje subjekty procidziejańnia hetaj źjavie i ich paŭnamoctvy, uvodzić miery procidziejańnia ekstremizmu.
Siarod takich mieraŭ možna nazvać: prypynieńnie dziejnaści arhanizacyi; pryznańnie arhanizacyi, zarehistravanaj na terytoryi Respubliki Biełaruś, ekstremisckaj, zabarona jaje dziejnaści i jaje likvidacyja; zabarona dziejnaści ekstremisckich zamiežnych i mižnarodnych arhanizacyj; procidziejańnie vydańniu i raspaŭsiudžvańniu ekstremisckich materyjałaŭ; niedapuščeńnie ažyćciaŭleńnia ekstremisckaj dziejnaści pry praviadzieńni masavych mierapryjemstvaŭ; procidziejańnie publičnym zaklikam słužbovaj asoby arhanizacyi da ažyćciaŭleńnia ekstremisckaj dziejnaści.
Varta adznačyć, što na chutčejšym pryniaćci zakonaprajektu nastojvaŭ staršynia KDB Ściapan Sucharenka, jaki nazvaŭ jaho «vielmi nieabchodnym».
Adśviatkavali dzień narodzinaŭ Kalinoŭskaha
Aktyvisty hramadzianskaj kampanii «Za Svabodu!» praviali akcyju, pryśviečanuju dniu naradžeńnia Kastusia Kalinoŭskaha. Niekalki dziasiatkaŭ čałaviek stali ŭ łancuh na skryžavańni vulicy Vaniejeva i praspektu Rakasoŭskaha. U rukach jany trymali litary, jakija składali adnu z najbolš viadomych cytataŭ Kalinoŭskaha: «Nie narod dla ŭrada, a ŭrad dla narodu!» Praz 15 chvilin ludzi razyšlisia, nichto z udzielnikaŭ nia byŭ zatrymany.
23 studzienia
Sudziać palakaŭ
U sudie Kastryčnickaha rajonu Horadni pačaŭsia razhlad kryminalnaj spravy suprać kiraŭnika Haradzienskaha haradzkoha adździełu Sajuza palakaŭ u Biełarusi Miečysłava Jaskieviča. Jaho vinavaciać u pravakavańni bojki. Pavodle č.1 art. 339 KK (chulihanstva) Jaskieviču pahražaje pakarańnie ŭ vyhladzie hramadzkaj pracy, abo štrafu, abo aryštu da 6 miesiacaŭ, abo pazbaŭleńnia voli terminam da 2 hadoŭ. Nastupnaje pasiedžańnie sudu projdzie 30 studzienia.
