Heta vynikaje z začytanych 27 kastryčnika ŭ sudzie charaktarystyk Dźmitryja Kanavałava i Uładzisłava Kavalova.
Pavodle charaktarystyk ź siaredniaj škoły № 35 Viciebska, vydadzienych u rozny čas, Kanavałaŭ byŭ akuratny, mieŭ siarednija zdolnaści, pa bolšaści pradmietaŭ paśpiavaŭ na «zdavalniajuča» i «dobra», naviedvaŭ dadatkovyja zaniatki pa chimii, navat udzielničaŭ u rajonnych alimpijadach, sa starejšymi byŭ vietlivym, taktyčnym, spakojnym, vytrymanym. U toj ža čas na ŭrokach byŭ pasiŭny, biezynicyjatyŭny. U charaktarystycy, vydadzienaj paśla 10 kłasa, značycca, što Kanavałaŭ mieŭ vysoki intelekt, mieŭ asablivyja pośpiechi ŭ chimii. U atestacie paśla škoły ŭ jaho samaja vysokaja acenka 8 bałaŭ była mienavita pa chimii. U charaktarystycy taksama ŭkazvałasia, što Kanavałaŭ maje žorstki i ŭparty charaktar, u pracoŭnych spravach nie ŭdzielničaŭ, u škole nie zatrymlivaŭsia i zaŭsiody śpiašaŭsia damoŭ.
Jak stała viadoma z apublikavanych materyjałaŭ, jon vučyŭsia pa śpiecyjalnaści «technałohija vytvorčaści šviejnych vyrabaŭ» i staŭ kraŭcom
Padčas pracy hruzčykam u mahazinie «Viesta» vyznačaŭsia starannaściu. Z boku kiraŭnictva zaŭvah da jaho nie było.
Śpiecyjalnaść tokara Kanavałaŭ atrymaŭ u licei № 5 Viciebska, jaki skončyŭ ź siarednim bałam 7,3. U charaktarystycy adznačajecca jaho cikavaść da prafiesii i zdolnaści da jaje. Havorycca, što Kanavałaŭ byŭ nastojlivy ŭ dasiahnieńni vynikaŭ.
Stanoŭčaja charaktarystyka na jaho była vydadziena na Viciebskim zavodzie traktarnych zapčastak, dzie Kanavałaŭ pracavaŭ da i paśla armii. Jon nazvany starannym rabotnikam, uraŭnavažanym, spakojnym, nie schilnym da kanfliktaŭ. Parušeńniaŭ pracoŭnaj dyscypliny nie dapuskaŭ.
U charaktarystykach z usich miescaŭ vučoby i pracy adznačajecca, što Kanavałaŭ va ŭžyvańni ałkaholu i narkotykaŭ zaŭvažany nie byŭ.
Sa zdavalniajučaha boku Kanavałava acharaktaryzavaŭ miascovy ŭčastkovy. Pavodle jaho źviestkach, adnojčy jon pryciahvaŭsia da administracyjnaj adkaznaści.
U materyjałach jość try charaktarystyki, jakija adnosiacca da času słužby ŭ armii i paśla jaje. U pieršaj havorka idzie ab tym, što małodšy siaržant, namieśnik načalnika raźliku zarekamiendavaŭ siabie sa stanoŭčaha boku, u kalektyvie karystajecca aŭtarytetam, prajaŭlaje razumnuju inicyjatyvu. U adnoj z charaktarystyk, dadzienych u krasaviku 2011 hoda, Kanavałaŭ charaktaryzujecca ŭžo z admoŭnaha boku. Adznačajucca jaho nizkija arhanizatarskija zdolnaści, adsutnaść aŭtarytetu ŭ kaleh, schilnaść da padmanu, skrytnaść. Taksama paviedamlajecca, što paśla 6 miesiacaŭ słužby Kanavałaŭ praktyčna straciŭ da jaje cikavaść. Na krytyku starejšych načalnikaŭ reahavaŭ spakojna, ale naležnych vyvadaŭ nie rabiŭ. Pry hetym hrubych parušeńniaŭ voinskaj dyscypliny nie mieŭ.
U druhoj charaktarystycy Kanavałaŭ charaktaryzujecca jak sa stanoŭčaha, tak i z admoŭnaha boku.
Adznačajucca, u pryvatnaści, jaho nizkijamaralna-dziełavyja jakaści, adsutnaść razumnaj inicyjatyvy, spakojny charaktar.
Pavodle danych učastkovaha milicyjaniera, Uładzisłaŭ Kavaloŭ pryciahvaŭsia da administracyjnaj adkaznaści za raśpivańnie śpirtnych napojaŭ u hramadskich miescach, ale asablivych zaŭvah adnosna ładu žyćcia da Kavalova ŭčastkovy nie mieŭ. U charaktarystycy, vydadzienaj u SŠ № 35, adznačajucca siarednija zdolnaści Kavalova, źnižeńnie cikavaści da vučoby ŭ starejšych kłasach, adsutnaść inicyjatyvy, schilnaść da chłuśni. U školnyja hady Kavaloŭ zachaplaŭsia technikaj i muzykaj.
Na pradpryjemstvach u Minsku i Viciebsku, dzie paśla škoły pracavaŭ Kavaloŭ, taksama adznačali adsutnaść u jaho inicyjatyvy, pry hetym u charaktarystykach havorycca, što z daručanaj pracaj jon spraŭlaŭsia, byŭ technična adukavanym, dyscyplinu nie parušaŭ, byŭ vietlivy i taktyčny. Byłyja kalehi pa pracy charaktaryzujuć jaho sa stanoŭčaha boku, adnak ukazvajuć na jaho skrytny charaktar.
