Na aŭkcyjon vystavili siadzibu Čačotaŭ, jakaja paźniej naležała Bochvicam, paviedamlaje sajt Region4. Siadzibny dom raźmieščany ŭ vioscy Padarosk.
Pabudavanaja ŭ siaredzinie XIX stahodździa siadziba Čačotaŭ (Bochvicaŭ) znachodzicca na trasie pamiž Vaŭkavyskim i Ružanami. Na terytoryi siadziby zachavaŭsia žyły dom płoščaj 120 kv. m., a taksama brama i aranžareja.
U ciapierašni čas adździeł ekanomiki Vaŭkavyskaha rajvykankama rychtuje ŭsie nieabchodnyja dakumienty dla aŭkcyjonu, na jakim miascovyja ŭłady spadziajucca znajści novaha haspadara histaryčnaj nieruchomaści.
Aŭkcyjon pa prodažy siadziby pryznačany na 15 śniežnia i adbudziecca ŭ Hrodnie. Startavaja cana — 86,5 miljona rubloŭ. Heta nie pieršaja sproba Vaŭkavyskich uładaŭ pradać siadzibu ŭ Padarosku. U sakaviku 2010 hoda jana ŭžo vystaŭlałasia na aŭkcyjon.
Prodaž staradaŭnich siadzibaŭ — nie redkaść dla Hrodzienskaj vobłaści. Tak u pačatku 2010 hady pajšoŭ z małatka pałacava-parkavy kompleks u vioscy Kraski Vaŭkavyskaha rajona Hrodzienskaj vobłaści. Kompleks staŭ ułasnaściu bahataha rasiejskaha biznesmena, jaki vykłaŭ za Kraski $100 tysiač. U ciapierašni čas u siadzibie poŭnym chodam idzie rekanstrukcyja.
U 2008 hodzie łatvijskija inviestary pasprabavali nabyć za simvaličnuju płatu siadzibu Śviackich ŭ pasiołku Połymia Sieńnienskaha rajona Viciebskaj vobłaści. Ale budynak siadziby svaich haspadaroŭ tak i nie dačakaŭsia. Jaho taksama płanujuć vystavić na aŭkcyjon.
A voś siadziba hrafa Umiastoŭskaha ŭ vioscy Žemysłaŭ Iŭjeŭskaha rajona Hrodzienskaj vobłaści była vykuplenaja za 9,5 młn. rubloŭ, ale paśla ŭmiašańnia Dziaržkantrolu jaje viarnuli va ŭłasnaść miascovaha SVK. Paśla pieraacenki majontka za jaho prosiać bolš za 1 młrd. rubloŭ.
U Biełarusi zaćvierdžany płan dziejańniaŭ pa pieradačy nievykarystoŭvajemych siadzibaŭ i histaryčnych pałacaŭ. Ułaśniki mohuć vykarystoŭvać lubyja formy pieradačy: biazvypłatna, na pravach arendy, a taksama kupić ich. Ad pakupnika patrabujecca zachavać aŭtentyčnaść takich abjektaŭ, stvaryć novyja pracoŭnyja miescy, u budučyni akazvać turystyčnyja pasłuhi.
Taksama ŭ bližejšy čas na aŭkcyjon budzie vystaŭlena siadziba druhoj pałovy XVIII-pačatku XX st. u vioscy Usielub Navahrudskaha rajona Hrodzienskaj vobłaści.
