Łukašenka: Dziaržava budzie padtrymlivać talenavituju moładź

Ab hetym zajaviŭ Alaksandr Łukašenka siońnia na sustrečy z pradstaŭnikami tvorčaj moładzi.

«Kali ty talenavity, nastojlivy, addany svajoj mary, to abaviazkova dabješsia pośpiechu. My i ŭ dalejšym takich ludziej nie pakiniem biez padtrymki», — skazaŭ Alaksandr Łukašenka.

Adkryvajučy sustreču, Łukašenka nahadaŭ, što paŭtara dziasiatka hadoŭ tamu, kali stvaraŭsia fond Prezidenta pa padtrymcy talenavitaj moładzi, sioj-toj sumniavaŭsia, ci budzie ad hetaha tołk. «I siońnia, hledziačy na vas, možna skazać, što srodki, układzienyja ŭ samy darahi zdabytak — rozum i talent — nie prapali darma, — adznačyŭ biełaruski kiraŭnik. — Łaŭreatami i stypiendyjatami fondu stali amal 2 tys. maładych ludziej. My vyhadavali novaje pakaleńnie tvorčaj intelihiencyi, tych, kamu možna davieryć prymnažeńnie patencyjału ajčynnaj kultury».

Stvaryć umovy dla prafiesijnaha stanaŭleńnia adoranych asob, pavysić ich sacyjalnuju abaronienaść taksama dała mahčymaść realizacyja dziaržprahramy «Maładyja talenty Biełarusi» na 2006–2010 hady.

«Vychavańnie talentaŭ — sprava nie entuzijastaŭ-adzinočak, a adzin z važniejšych napramkaŭ sacyjalnaj palityki. U Biełarusi stvorana cełaja infrastruktura raboty z adoranymi dziećmi i moładździu», — adznačyŭ Łukašenka. Heta infrastruktura ŭklučaje bolš za 100 daškolnych raźvivajučych centraŭ, 29 licejaŭ, 215 himnazij, sotni pazaškolnych ustanoŭ, a taksama dziasiatki tysiač abjadnańniaŭ pa intaresach.

«U našaj krainie zachavana i paśpiachova raźvivajecca cełasnaja sistema mastackaj adukacyi, pačynajučy ad dziciačych škoł mastactvaŭ i zakančvajučy VNU kultury. Sfarmiravany nacyjanalnyja tvorčyja škoły. Dostup da hetaha duchoŭnaha bahaćcia maje luboje adoranaje dzicia», — skazaŭ Prezident.

Razam z tym kiraŭnik dziaržavy pieraściaroh tvorčuju moładź ad utrymanskich nastrojaŭ. «Siońnia ŭ kultury akramia tvorčych zdolnaściej jašče patrebna inicyjatyva, enierhija i pradprymalnaść», — padkreśliŭ biełaruski lidar.

Da pačatku sustrečy Alaksandr Łukašenka ŭ budynku Nacyjanalnaj biblijateki naviedaŭ vystaŭku, na jakoj pradstaŭleny tvorčyja raboty maładych aŭtaraŭ. U pryvatnaści, jamu prademanstravali mastackija i skulpturnyja raboty, adzieńnie maładych biełaruskich madeljeraŭ, architekturnyja prajekty, vyraby z kieramiki, mietału i škła, litaraturnyja tvory.

• 0
• 0
• 0
• 0
• 0
• 0
• 0
• 0