Palitviaźni
14 lutaha prakuror Pieršamajskaha rajonu Miensku admoviŭ Maryi Fińkievič u prośbie sustrecca z synam Arturam.
Praces nad Źmitrom Kaśpiarovičam pačniecca 27 lutaha ŭ Maskoŭskim sudzie stalicy.
Mikołu Statkieviča, jaki adbyvaje termin pakarańnia ŭ Baranavičach, pieraviali 15 lutaha z chatniaha režymu ŭ specynternat u suviazi z «składanym aperatyŭnym stanoviščam».
Andreja Klimava 17 lutaha pieravieźli z Krupkaŭ u v.Barščoŭka (Rečycki r-n, Homielskaja vobł.).
Kryminalnyja spravy
Z pravaabaroncy Aksany Novikavaj, jakuju vinavaciać u vykarystańni falšyvaha pašpartu, 15 lutaha ŭziali padpisku pra niavyjezd.
Takuju ž padpisku z aktyvista hrupy A.Milinkieviča ŭ Astraŭcy Ivana Kruka 17 lutaha ŭziaŭ śledčy prakuratury.
Vyklučeńnie ŭ Baranavičach
Sieržuka Marčyka 18 lutaha vyklučyli z Baranavickaha dziaržuniversytetu paśla taho, jak sud aštrafavaŭ jaho na 580 tys.rub. za ŭdzieł u Dni salidarnaści 16 studzienia.
U Mahilovie
14 lutaha ŭ Mahilovie padčas vyviešvańnia raściažki da Dnia salidarnaści zatrymanyja moładzievyja aktyvisty Aŭhien Suvoraŭ i Kryścina Šacikava. U dačynieńni da Ja.Suvorava zaviali kryminalnuju spravu za ŭchileńnie ad vajskovaha abaviazku, choć pryzyŭnaja kamisija pryznała jaho nieprydatnym dla vajskovaj słužby: chłopiec maje kiepski zrok.
Z Mahiloŭskaha dziaržuniversytetu 14 lutaha vyklučyli studentku žurnalisckaha adździaleńnia fakultetu słavistyki Marynu Ćviatkovu, jakuju dvojčy zatrymlivali milicyjanty ŭ studzieni na vuličnych akcyjach. Aficyjnaja pryčyna — «niepaśpiachovaść».
U noč na 17 lutaha nieviadomyja złamyśniki ŭ Mahilovie ŭzłamali ofis Partyi BNF: z pamiaškańnia źnikła drukavanaja pradukcyja i dva telefony.
U Homieli
14 lutaha prakuratura Čyhunačnaha rajonu Homielu pieradała ŭ sud spravu hramadzkaha aktyvista Śviatasłava Šałamava: jaho zatrymali z ulotkami j nalepkami «Nam chłusiać» i abvinavacili ŭ parušeńni vybarčaha zakanadaŭstva.
Deputata Homielskaha harsavietu Jurja Hłušakova zatrymali 17 lutaha j kanfiskavali 11 tys. ulotak z karykaturami: bamžy źbirajuć na śmietnikach pustyja butelki. Na jaho skłali pratakoł za raspaŭsiud drukavanaj pradukcyi, źmiest jakoj nanosić uron dziaržaŭnamu i hramadzkamu paradku. 20 lutaha jaho aštrafavali na 10 bazavych vieličyniaŭ (290 tys.).
U Barysavie
14 lutaha padčas raspaŭsiudu ŭlotak da Dnia salidarnaści zatrymanyja Nasta Hryščanava, Ludmiła Majorava, Paŭlina Dzinisava. U ich kvaterach prajšli pieratrusy. Dziaŭčaty padali skarhu ŭ prakuraturu na niezakonnyja dziejańni milicyi.
Maci aktyvista Macieja Bialaja zatelefanavali 17 lutaha dadomu i pahražali, što jana stracić pracu, kali syn nia spynić palityčnuju dziejnaść.
19 lutaha pa padazreńni ŭ raspaŭsiudzie nalepak da Dnia salidarnaści zatrymanyja Michaś Kandrašoŭ i Aleś Maŭčanaŭ.
«Roŭnyja ŭmovy»
Kala Lidy 13 lutaha milicyja zatrymała aŭtamabil z aktyvistami hrupy A.Milinkieviča Anatolem Chackom, Siarhiejem Malčykam, Siarhiejem Antusievičam. Kanfiskavali 1200 asobnikaŭ hazety «Narodnaja Vola».
14 lutaha milicyja ŭvarvałasia ŭ pryvatnuju kvateru Karnieja Piatroviča ŭ Baranavičach, dzie sabralisia Viktar Mieziak, Uładzimier Hoŭša, Mikoła Sieviercaŭ, Viktar Alachnovič, Michał Minin, Alaksandar Halkievič — aktyvisty hrupy A.Milinkieviča. Na ŭsich składzieny pratakoły za ŭdzieł u niesankcyjavanym schodzie: milicyjanty zajavili, što dazvoł na schod na pryvatnaj kvatery treba brać u harvykankamie.
15 lutaha z Haradzienskaha ŭniversytetu vyklučyli studenta 3-ha kursu Jaŭhiena Skrabutana, pakaranaha napiaredadni štrafam za raspaŭsiud kalandarykaŭ z partretam A.Milinkieviča. Administracyja zajaviła, što heta druhoje parušeńnie za čas navučańnia, što jość padstavaj dla vyklučeńnia.
15 lutaha Chrystafora Žalapava, kiraŭnika Viciebskaha štabu adzinaha kandydata, sud aštrafavaŭ na 58 tys.rub. (2 b.v.) za kalandaryki z partretam A.Milinkieviča, skanfiskavanyja ź jaho aŭtamabila pry pieravozcy pierad Novym hodam.
Byvajuć i takija pravakacyi: 16 lutaha ŭ Ašmianskuju prakuraturu vyklikali źbiralnikaŭ podpisaŭ Tacianu Klimovič i Aŭhiena Nievidomskaha: ich vinavaciać, što źbirali podpisy padmanam — vydavali siabie za aktyvistaŭ hrupy Łukašenki.
U Viciebsku 19 lutaha zatrymali ŭdzielnikaŭ ahitacyjnaha pikietu Ŭłada Tokarava j Kastusia Pierahuda. Ich źvinavacili ŭ niezakonnym pikietavańni: maŭlaŭ, ahitacyjnyja pikiety stavić niamožna.
Pinski harvykankam zabaraniŭ Siarhieju Kaściukoviču ładzić 24 lutaha pikiet «Niama demakratyi — niama pośpiechaŭ», bo ŭłady paličyli, što hety lozunh raspalvaje «sacyjalnuju varožaść u horadzie».
Nie puścili ŭ Miensk
Pad Lidaj i la Ščučyna zatrymali mašynu, u jakoj z Horadni ŭ Miensk na rehistracyju kandydataŭ u prezydenty 17 lutaha jechali S.Malčyk, Mikoła Lemianoŭski, Uładź Skapa.
17 lutaha supracoŭnik Ščučynskaha RUUSu Kuźniacoŭ P.N. vydaŭ pozvu na imia Laškieviča S.V., aformlenuju z parušeńniem p.1.art.216 KPK RB (całkam adsutničaŭ radok «u jakaści kaho»).
U Lidzie zatrymali Stanisłava Sudnika. Kala Vaŭkavysku zatrymanaja mašyna z 5 aktyvistami. U Voršy Vasilu Leŭčankavu skasavali papiarednie zamoŭlenaje miesca ŭ maršrutnaj taksoŭcy, jakoj jon mierkavaŭ jechać u Miensk. Moładzievamu aktyvistu Iharu Kaźmierčaku 16 lutaha ŭviečary niečakana prynieśli pozvu z vajenkamatu.
U Mastach u Źmitra Kuchleja milicyjant cikaviŭsia, ci maje toj mašynu, i patłumačyŭ, što šukajuć čałavieka, jaki źbiŭ piešachoda ŭvosień 2004 h.
Pry vyjeździe z Homielu byŭ zatrymany pryvatny mikraaŭtobus Uładzimiera Šycikava z 7 aktyvistami (siarod ich deputat Viarchoŭnaha Savietu CHIII sklikańnia Viktar Chomič, Uładzimier Siakierka), jakich pratrymali 3 hadziny.
U Śvietłahorsku zatrymali aŭtamabil aktvista apazycyjnaj Partyi BNF Uładzimiera Ramaniški, jaki jechaŭ u Miensk z 3 paplečnikami. U ich skanfiskavali plakaty «Śvietłahorsk — za Milinkieviča».
Pry ŭjeździe ŭ Miensk zatrymany lehkavik Valerja Rybčanki z Žłobina. Jamu paviedamili, što padazrajuć u zabojstvie taksoŭca, i adpuścili tolki paśla sustrečy A.Milinkieviča z vybarcami.
U Maładečnie na čyhunačnym vakzale milicyjanty zatrymali Alesia Kapuckaha: jamu zajavili, što jahonaja kurtka padobnaja da kurtki čałavieka, padazravanaha ŭ kradziažy žanočaj sumki. U pastarunku jaho ŭžo pierakvalifikavali jak śviedku złačynstva.
Pałochajuć ziemlakoŭ Milinkieviča
U Horadni 13 lutaha ŭ kvatery Andreja Mialeški i baćkoŭ aktyvista Vadzima Sarančukova adbyŭsia pieratrus: supracoŭniki milicyi pakazali pastanovu prakurora z Vaŭkavysku, dzie zaviedzienaja sprava pa palityčnych hrafici. Milicyja zabrała 7 blašanak farby, jakoj karystaŭsia baćka Sarančukova — mastak-vitražyst. U Mialeški kanfiskavali niekalki ŭlotak, vydadzienych u 1996 i 1999 h.
U Mastach pieratrus pa toj samaj spravie adbyŭsia 15 lutaha ŭ chacie deputata rajsavietu Alesia Zarambiuka, aktyvista PBNF, i ŭ Źmitra Kuchleja. U Kuchleja zabrali systemny blok kamputara, videakasety, dyski, drukavanuju pradukcyju.
U Rečycy
16 lutaha ŭ Rečycy paśla akcyi ŭ Dzień salidarnaści milicyjanty zatrymali Volhu Dzimitruk, Alaksandra Kryvašejeva i Alaksieja Bandarenku.
U Połacku
U Połacku paśla akcyi byli zatrymanyja Luboŭ Kučynskaja i Alaksandar Biełabarodaŭ. Na ich skłali pratakoły za raspaŭsiud drukavanych vydańniaŭ biez vychodnych źviestak.
Nia stoj sa śviečkami
17 lutaha ŭ Miensku adbylisia sudy nad moładzievymi aktyvistami, zatrymanymi padčas Dnia salidarnaści. Aleha Miacielicu asudzili na 15 sutak aryštu, chacia śviedki — milicyjanty A.Bachar i A.Jaraševič — nie zmahli nazvać miesca zatrymańnia. Paŭła Fihuryna, Barysa Hareckaha i Aleha Korbana asudzili na 10 sutak aryštu.
Pieramohi j parazy prafsajuzaŭ
Kab dyskredytavać lidera supołki prafsajuzu REP Uładzimiera Tuzava, administracyja Mahiloŭskaha zavodu štučnaha vałakna 15 lutaha pravieryła jaho na ŭžyvańnie alkaholu. Arhumenty Tuzava, što jon jak hipertonik prymaje štodnia śpirtaźmiaščalny preparat, paśla jakoha 2 hadziny nielha prachodzić test, plonu nie dali.
Aršanskaja prakuratura 14 lutaha abaviazała administracyju zavodu prapuskać na terytoryju pradpryjemstva staršyniu supołki Svabodnaha prafsajuzu metalistaŭ zavodu «Los» (h.Barań, Aršanski rajon, Viciebskaja vobłaść) V.Leŭčankava.
U Śvietłahorsku
Prakuratura Śvietłahorskaha rajonu (Homielskaja vobł.) 14 lutaha raspačała dyscyplinarnuju spravu suprać namieśnika načalnika Śvietłahorskaha rajadździełu milicyi Piatra Zykuna. Jaho vinavaciać, što źniščyŭ zajavu aktyvista TBM 19-hadovaha Andreja Muzyčenki.
U Astraŭcy
Milicyjanty praviali 17 lutaha «prafilaktyčnuju hutarku» z vydaŭcom i redaktaram biuleteniu «Infarmatar» (nakład 299 as.) Andrejem Šaduram z Astraŭca. Ich cikaviła, dzie i za jakija srodki vydajecca biuleteń.
Palakaŭ pamiatajuć
16 lutaha pamiežniki zabrali pašpart u Andžeja Pisalnika, jaki viartaŭsia z Varšavy ŭ Horadniu. U Polšču Pisalnik prajechaŭ praz Rasieju i Ŭkrainu. Analahičnaja sytuacyja ŭ Anžaliki Borys, jakaja viartałasia ŭ Biełaruś 18 lutaha.
19 lutaha ŭ Biełaruś nie puścili karespandenta «Gazety Wyborcziej» Vacłava Radziviłoviča, nie zvažajučy na biełaruskuju vizu i akredytacyju biełaruskaha MZS.
