Alaksandr Łukašenka siońnia na pastajanna dziejučym sieminary kirujučych rabotnikaŭ respublikanskich i miascovych dziaržaŭnych orhanaŭ na temu «Impartazamiaščeńnie jak važniejšy faktar dasiahnieńnia zbałansavanaha raźvićcia ekanomiki Respubliki Biełaruś» vystupiŭ z krytykaj u adras kiraŭnikoŭ za biezhaspadarčaść i biurakratyzm.
Jon pryvioŭ niekalki prykładaŭ biezhaspadarčaści. Dva hady budavali kacioł na miascovych vidach paliva ŭ Hrodzienskim rajonie, choć u płanach było čatyry miesiacy. Jašče ŭ dva razy daŭžej ciahniecca pierachod na efiektyŭnuju sistemu aciapleńnia na Lidskaj ptuškafabrycy. «Čamu ja pryvodžu hetyja prykłady?
Mohuć skazać: nie prezidencki ŭzrovień leźci ŭ hetyja detali.Ale viedajecie, z takich voś drobiaziej, z takich kankretnych, byccam by małaznačnych u maštabie krainy faktaŭ — tam niedakruciŭ, tam nie ŭstanaviŭ, patraciŭ hrošy, ale nie zrabiŭ, vałakiciŭ — składvajecca realnaja ekanomika i kančatkovy vynik našaj raboty», — skazaŭ Łukašenka.
Pavodle jaho słoŭ, heta tyja tysiačy miljonaŭ ton pieraraschodu nafty, hazu, mietałaŭ, jakija paśla pieratvarajucca ŭ pahražalnyja ličby admoŭnaha salda ŭ maštabach krainy. «I my hladzim adzin na adnaho i pytajemsia: chto ŭ hetym vinavaty, čamu niama vialikich dalaravych zarpłat?» — skazaŭ jon. Jon padkreśliŭ, što kožny z prysutnych pavinien vyrazna zrazumieć i davieści da ŭsich padnačalenych, usich, chto pracuje ŭ krainie, što tolki ad nas samich zaležyć uzrovień našaha dabrabytu, budučaja niezaležnaść krainy.
Nijakija mižnarodnyja, valutnyja i antykryzisnyja fondy nie dapamohuć.
«Tolki praca, štodzionnaja, karpatlivaja, usich i kožnaha na svaim rabočym miescy moža zrabić nas bahaciejšymi. I my viedajem, jak hetaha dasiahnuć, usie ŭmovy ŭ našaj krainie jość», — padkreśliŭ jon. Ad kožnaha kiraŭnika Alaksandr Łukašenka ćviorda zapatrabavaŭ poŭnaha vykanańnia ŭsich metavych pakazčykaŭ, płanaŭ piacihodki, maksimalnaj addačy.
